بارەو هجوومەکەو سەروو فڕۊکەخانەی کشتوکاڵیی عەربەتێوە، دەسەو هامسەرۊکایەتیی تەڤگەری ئازاڎیی گلێرگەو کورڎسانی، ئەرەیاوناێوەش وەڵا کەرڎۊ.

ئەرەیاوناکەینە ئامان، "حیچ پاساوێوە ورمەگێرۊ و ھەڵوێستێوە دوژمنکارانە و قیناویین وەراوەروون ئا ھێزە تۊکمەو ھەرێموو کورڎسانیوە، کە دەورێوە گرنگ و وەرەچەمش بییەن، جە وەرگێریی گرووپە تیرۊریستییەکانە و جەنگوو دژوو داعشینە پانیشت و وەرنیشتوو کورڎسانینە:

باسوو ئانەیچە کریان، "ھجوومە بەرڎەوامەکاو دەوڵەتوو تورکی ئەرەگیری پەی سەروو مەنتێقەکاو سەرنیشت و وەرکەوتوو سووریای و شنگالی و پیلانگێڵنییەکاو سەروو پانیشتوو کورڎسانی و بەتایبەت پارێزگاو سلێمانیی بەساوە بە تۊڵەو ئەرڎۊغانیوە چا هێزا، کە داعششا ماڕا و دلێشنە ئامان، کە چندین جارۍ سەروو زوانوو وەرپەرسە باڵاکاشاوە ھەڕەشێشا کەرڎێنە یان مشۊم مل پەی پڕۊژە ئەرەگیرکارییەکەیشا بدریۊ و با بە کەواسووروو وەروو لەشکری پێسە ئانەیە ئیساتۍ پارتی و بارزانی کەراش یان جەنگ و گەمارۊدای و تیرۊر!".

باسشا چانەیچە کەرڎەن، کە ئەرەگیراو کوردسانی، هجووم و پیلانگێڵنییەکاشا هەستەرۍ کەرڎێنیوە، دماو شکسوو گەمە قێزەونەکەیشاوە کەرکووکنە، کە لاو بەرەی تورکمانی و پەدەکەی و تورکیایوە مجیابێرە، ئی جارە پەلامارەو ھێزوو دژەتیرۊریشا سلێمانیینە دا، وەلۍ مشۊم ئەرەگیراو کورڎسانی بزانا سلێمانی حیچ وەخت سەرەش پەی حیچ ستەمکار و ئەرەگیرێوە شۊڕ نەکەرڎەن و مەکەرۊیچ بەڵکوم وەرانوەروو پیلانگێڵنی و ھجوومەکانە بە درێژایی تارێخی خەتەو مدرامانی و نیشتیمانپەروەرییش قەوەتە کەرڎێنە".

جەختیچشا چانەیە کەرڎەنۊ، کە تاکە ڕا و هەرمانەما تەنیا یەکڕیزی و پێوەبییەی و وەرگێریکەرڎەین جە وێما، وۍ ئسپارای بە سیاسەتوو ئەرەگیرا هەرمانەو سیخوڕ و وێورەشانە و ئەنجامەکەش پەرتەوازەیی و ڕیسوابییەین.

هاموەخت داوا کەرا، حکومەتی عێراقی فیدراڵی، پەرلەمانتارۍ، دۊسەکاو گەلوو کوردی و ھامپەیمانیی میاننەتەوەیی، هەرمانەی ئەخلاقییە و یاساییەو وێشا بیاونا یاگۍ و ئا کرڎەوە دوژمنکارانەیەو دەوڵەتە ئەرەگیرا، پەی سەروو ھەرێموو کورڎسانی مردنا و بەھەمیشەیی ھجوومی عاسمانی و زەمینیی قەدەغە کریۊ.  

ئاخریچشۊ ئامان، "ھەزاران سڵامۍ پەی گیانی بەرزەفڕووئا پێشمەرگە قارەماناو دژەتیرۊری، کە جە بۊردومانەکەو سەروو فڕۊکەخانەو عەربەتێوە گەشمەرڎۍ بیۍ، ڕسوایی و شەرمەزاری پەی وێورەشا و ئەرەگیراو کورڎسانی."

س.ز