حسێن حاجی، هامسەرۊکوو پارتی ئازاد و دیموکراتیکوو ئێزدییەکا (پادێ) چەنەدواێوەشنە پەی ئاژانسوو فورات (ANF)ی، بارەو هجوومەکاو دەوڵەتوو تورکی و هامکارەکاشۊ پەی سەروو سەرمەشقەکاو پێکئاماو ئێزدی قسێش کەرڎۍ.

حاجی واتش، گەرەکشابۍ جە ڕاو بەئامانجگێرتەی سەرمەشقەکاوە دمایی بە سیاسەتی و وەڵیوەلوایشا بارا و واتش: "وەلۍ نەزاناشا حەرگەشمەرڎێوە، هەزاران وانیارۍ و شۊنکەوتۍ دماو وێش جیا مازۊ. چونکوم گەشمەرڎەکێما گەشمەرڎۍ خەتەو ئازادیینۍ، نە شۊڕش و نە ئازادی بەبۍ ئا گەشمەرڎا مسۊگەر مەبۊ. ویرمان نەشۊ تا ئیساتێچ پیلانە میاننەتەوەیی و ھەرێمییەکۍ و ھجووومەکۍ پەی سەروو ئێمە و گەلەکەیما بەرڎەوامێنۍ. وەلۍ چێگەنە ئەرەیاونمێش، کە وێڕاوەبەری و ئازادی بەبۍ شییەینەی و قوربانیدای دەسەبەر مەبۊ و گردما پەی ئا قوبانیدایە ئامادێنمێ".

ھامسەرۊکوو پادۍ جەختیچش کەرڎۊ، وەراوەروو هجوومەکانە بێدەنگۍ مەبا و واتش: "گرد وەختۍ جوابوو دوژمنی مدەیمێوە و قەوەتتەرین جوابیچما ئانەن، کە گەشمەرڎەکاما ویر مەبەرمێوە و دامودەزگایەکاو ئیدارەو وێڕاوەبەری قەوەتتەرۍ کەرمۍ. با پاڵپەشتی چا جەنگەوانا کەرمۍ کە ئیساتۍ وەرگێریی شەنگالی کەرا. وەراوەروو حەرپیلانێوەنە ئامادێنمۍ، کە دژوو گلێرگاکەیما کریۊ، پێسە چەنی پیلانەکاو وەڵێما پووچەڵۍ کەرڎێوە، پلانەکاو دماییچشا پووچەڵۍ کەرمێوە، حەرگیز وێما مەڎەیمۍ دەسوو دوژمنیوە".