کۊڕبەنڎ، وۊرکشۊپ و کۊبییەیۊکۍ چەنی خەڵکی دماییشا ئاما، کە پارتی دیموکراتیکوو گەلا (هەدەپە) و پارتوو چەپی سەوزی، دماو ورچنیەی چوارچوە قۊناغوو ڕەخنەی و ڕەخنەگێرتەینە و سەرجەنۊ ڕێکوستەیۊوە دەسش پەنە کەرڎەبۍ.

کۊڕبەنڎ و وۊرکشۊپەکۍ دماو کۊبییەیۊکا چەنی خەڵکی،مانگەو ئابینە دەسشا پەنە کەرد. چا چوارچوەنە دووۍ کۊڕبەنڎۍ سەروو بنەماو وێڕێکوستەیۊ و سیاسەتی لوۍ ڕاوە. ھەرپاسە کۊڕبەنڎێوە سەربەوۍ پەی ژەنایچ ساز کریا و دلێشەنە بەگردیوە ٥ وۊرکشۊپۍ کریۍ. چا کۊڕبەنڎ و وۊرکشۊپانە، نوێنەراو ھامپەیمانیی ڕەنج و ئازاڎی، ئەکادیمیستەکۍ، ئەنداماو لوجنەو ڕاوێژکاریی هەدەپەی، ڕاوەبەراو پارتەکا و جەماوەر بەشدارۍ بێنۍ.

پێویسا چالاکییەکۍ پەیوەست بە ئیسلامی دیموکراتیکی زیاڎۍ بکریا

بەشداریێوە وەرفراوان چا کۊڕبەنڎ و وۊرکشۊپانە کریا و بە نویسای وەڵێنیازەکۍ پێشکەشۍ کریۍ. داوا جە لایەنەکا کریا، کە سەرڎەمی تازەنە چالاکییەکاو پەیوەست بە ئیسلامی دیموکراتیکی زیاڎۍ کریا و بەها کۊمەڵایەتییەکۍ وەرەچەم گیریا و سیاسەتی تایبەت پانەیە گێریۊنە وەر. دلۍ وەڵێنیازەکانە ھەرپاسە داوا کریا، کە ئایینەکۍ بە ئازاڎ و یەکسان ورێسەنگنیا و  دژوو پەیدیای ئیسلامی سیاسی، هامکاریی ئا ڕێکوزیا و ئەرەمەرزیایا کریۊ، کە ورگێرۍ پەیلوای ئیسلامی دیموکراتیکینۍ.

ھاموەخت وۊرکشۊپەکاو پێوەس بە ئایینەکانە داوا کریا، چوارچوەو جەوھەروو ئایینوو عەلەوییەکانە، فرسەتوو ڕەخسنای فرسەتی پەی وێڕێکوستەیۊی ئازاڎی جبەروو دەسەڵاتیوە خوڵقنیۊ و پەی پارێزنای داواکاریی هاموەڵاتبییەی یەکسانی، کۊشیای گەشتەر کریۊ.

پەنەوازا هەڵمەتێوە تازۍ دەس پەنەکریۊ

لە کۊڕبەنڎەکانە بارەو دیدگاو هەدەپەی و پارتوو چەپی سەوزی پەی چارەسەرکەرڎەی کێشەکاو کوردی و سیاسەتەکاو چارەسەرکەرڎەی کێشە نەتەوەییەکاو کوردی واتەواچ کریا و جەخت چانەیە کریاوە، پەنەوازا بە سەرمەشقایەتیی هامپەیمانیی کوردستانی، پارتوو هەرێمە دیموکراتیکەکا (دەبەپە) و کۊنگرەو گلێرگەی دیموکراتیکی (کەجەدە) ھەڵمەتێوە تازۍ دەس پەنە کریۊ. ئەرەیاونیا پارتوو چەپی سەوزی و هەدەپە جە چوارچوەو ا وەڵێنیازانە، کە وزیێنۍ ڕووە، قەراری گرنگ پەی چارەسەرکەرڎەی کێشەو کوردی بدا.

بابەتێوە تەر کە قسێش سەر کریێنۍ، ئا بێهومێدییەنە، کە دماو ورچنیەکاو ١٤و ئایاری دلۍ خەڵکینە وەڵا بییەنۊ. قسەوباسە پێوەسەکاو ئا بابەتینە ئەرەیاونیا، ئا کەشە نەرێییەو دماو ورچنیەی ئامان ئاراوە، بە حیچ نۊعێوە لاو هێزە دیموکراسییەکاوە مایۍ قبووڵکەرڎەی نییا. هەرپاسە ڕەخنە چانەیچە گیریا، کە ھامپەیمانیی ڕەنج و ئازاڎی جە بابەتوو بییەی بە چەترەو گردوو لایەنە چەوسیاوەکانە، ژەنی، کرێکارۍ، دێموکراتەکۍ و هێزە سۊسیالیستییە چەپەکۍ کەموکوڵی بییەن. جە ئەنجاموو قسەوباسەکانە ئەرەیاونیا، مشۊم ھامپەیمانی خەتێوە سیاسییە ساز کەرۊ جە سەرڎەمی تازەنە سەرمەشقوو ئۊپۊزسیۊنی بۊ.  

هەدەپە و پارتوو چەپی سەوزی بەرەو قۊناغوو کۊنگرەی ملا، قەرارا ئا ڕەخنە و وەڵێنیازاو دلۍ کۊبییەیۊکاو خەڵکی و ئانیشاو کۊڕبەنڎ و وۊرکشۊپەکا، پێسە ڕاپۊرتێوە پێشکەشوو کۊمیسیۊنوو کۊنگرەی کریا. هەدەپە و پارتوو چەپی سەوزیچ جە چوارچوەو ئا ئەنجامانە خەتەی سیاسییەو ڕاوەبەرڎەی تازەی دیاری کەرا

س.ز