سەرو ئارامگاو بەرزتەرین شەخسیەتی ئەدەبی چوار قەرنی ویەردەی مامۆسا مسەفا بێسارانی بە بەشداری شاعراو نویسەراو هونەردۆساو ئەهڵوو قەڵەمی وەڵاتوو هەوامانی و مەریوانی  بە( هیمەتەو  مۆسسەو ڕاویان و مەریوانی و یانەو فەرهەنگ و ئەدەبوو بێسارانییو هەورامانی و ئەنجۆمەنوو فەرهەنگی ڕۆجیارو مەریوانی، ئیدارەو فەرهەنگ و ئێرشادو سەڵواوای ) یوەم بەرنامەو ئی حەفتەی لوا ڕاوە.
دەس پەنە کەردەو گلێروە بیەکەیما بە چن حەزێ و تاسێوە بە هامداڵی بڕێ جە قێخاکاو  شارو سەڵواوای پێسنەو شارەداری دەورو مەزارەکێ بە تەوەنی فەرش چن و پۆختە کریاو دڵێما چەنی بەردەو ئی هەرمانێ شاتێ ئەدەبیێ وەشتەرێش ڕەمنەیوەو سەیوەرەی پانتەرە یاوایارە سەرو پانایی زەمینی و حەزێما ئاودزێ کریەیوه... درێژەو بەنامەکامانە خێر ئامای سەرجەموو مێماناو عاشقاو بێسارانی کریا و ڕۆ قەڵەمیچ مبارەک بادی بە نویسەراو شۆنگیراو جەوهەرەو قەڵەمی واچیەیاو و بە خۆڵکەو سەرپەرستوو ئیدارەو فەرهەنگ ئێرشاد و شارو سەڵواوای کاک سامان بەختیاری پەی خێر ئاماو مێمانەکا و وەرچەم وستەو ماباقی هەرمانەکاتەرو ئی حەفتەی فەرهەنگیەی و داوا بەشدار بیەو فرەتەرو ئەهڵوو کتێبی و هونەری پەی بەشداری جە بەرنامەکاو ئی چن ڕوەیمانە درێژە پەنە دریەیا. جە دوەم بەشوو بەرنامەکەینە کاک عادڵ محەمەدپوور سەرو شەخسیەتوو بێسارانی و ئەدەبیاتوو غنایی و دەوڵەمەنوو ئی کەسایەتی بەرزەیشە کەرد و ئی پێوەرە بیەیشە بە حەزی زاتی گردی، زانا و دەسوەشانەش بە ئەنجومەنەکا وات. بەشێتەرو کۆنیشتەکەیمانە خاتوو ئایشێ مەحموودی بە دیکلەمەو دەقە شێعرەو مامۆسا بێسارانی سووری ڕەنگەو ئەدەبیش وستەنە سەروگۆناو عاشقاو شاعری نەمری. فرسەتێوی کوڵنە دەم شیرینی حەفتەی بە حازرا  دریەیاو بە تاقەتێوی گوڕدارتەروە دماین بەشوو بەرنامەکەینە گرۆ دەف نەوازی و یۆوە وەنای چن دەقێ مۆناجاتیێ و عارفانێ ئا تاقمە هۆنەریەی وێرەگانە جەسەو سەرو مەزارو شاعریشا عاشقانەتەرو تاسەبارتەرە کەردە. سووچێوتەرو ئی گلێروەبیەینە دەسوەشی جە لنزو ئا دووربینا کریەیا کە خزمەت بە فەرهەنگی و ئەدەبی و هونەری کەرا.  جە ئاخروە عەکسێ فرێ پەی یادگاری وزیەیاو پەی تاریخی وستێمانێ ئارشیوو ژیواو ئی میلەتە نەبەزەو هەورامانی. دیسان یاگێ وێشەنە  سەرەو حورمەتی پەی سەرجەم خەمەوەرا  ڕاو هەرەقەتینەو ئی ڕەوتە ئەدەبیەی نامنمێرە کە قود٘بشا گرت چی هەرمانێ. 

یانەو فەرهەنگ و ئەدەبوو بێسارانیو هەورامانی