حەفتەو شەرمی، حەفتەو ئەتککەرڎەی ڕۊحوو کورڎایەتی
ڕۊژماروو مانگەو ئابی، کە ئەوەڵەکەش بە خیانەت وەنەو ئێزدییەکا و دماییەکەش بە ناپاکی وەرانوەروو هەولێری و ڕاپەڕین بۍ پا خێراماییەو وەرپەرساو پەدەکەی جە هاکان فیدانی پەڵێوە سیاوتەر و قێزەونتەرش ئاما سەر.
ئابوو شانازی و ئابوو سەرشۊڕی
چند مانگێوە سەیرەنە ئاب! ئەوەڵوو و دماییش ناپاکی و سەرشۊڕی و دلێڕاسەکەش شانازی.. ئینە ڕێک ڕازەو کوردینە، ڕازەو دووۍ خەتە هامتەریباو قارەمانێتی لاێوە و خیانەت و دارڎەسەیی لێوە تەرۊ.
ژیونایۊ و ورێزنایۊ نەتەوێوە لاێوە، و چەمنایۊ و کۊمنایۊ و بەکوشتدای نەتەوێوە چەو لاوە.
ئەگەر ئیلا کورد بۊ و لاکەی تەریچ کورد، یانۍ ئابیچ هەرچندە دلێڕاسەکەش بۊنەو یوەم فیشەکوو عەگیدیوە مانگەو شەرەفی و شانازینە، بە ٣ و ٣١ وو مانگەکێچ، مانگەو شەرم و سەرشۊڕیینە.
پەڵێوە تەری سیاو ئابنە
جە ڕوەکاو ٢٣ و ٢٤وو ئابینە هەولێرنە مێمانداریی دوژمنێوە قەسەموارڎە، تیرۊریستێوە بێبەزەیی، کورڎێوە جە تاتە و بابایاش ورگێڵاوەی کەرد، تا ئاستوو چەمیایۊ و کۊمیایۊ وەرڎەمشنە دەسەڵاتداراو پەدەکەی و حوکمەتوو پانیشتی خێرامایشا وەنەو هاکان فیدانی ونچەکنی کەرد.
لێستەیۊ چەقوەو جەلادی
کوشتەی، کۊکوشی و جینۊساید ئەوپەڕوو کارەساتی نییا، بەڵکوم قولۍ کارەساتی ئانێنە قوربانی وەرڎەموو جەلادینە کۊمیۊوە و چەقووەکێش لێسۊوە، یان قوربانیێوە دەسدرێژی کە وێش کەرۊ قوربانیی دەسدرێژیکارەکەی، ئارەقەکەیش بسەڕۊ و نەمانیای و دەسوەشییش وەنە کەرۊ.
جە خیانەتی زیاتەر
٣١وو ئابی و ئارڎەیۊ بەعسی پەی سەروو هەولێری نە ئەوەڵا و نە ئاخر خیانەتەکاو پارتی دیموکرات (پەدەکە)ینە، بەڵکوم قولۍ هەرماننامەی پەڕ جە خیانەت و ناپاکیی ئا حیزبەینە، وەختۍ چێوۍ دیارڎێوە میاوۊ قولۍ، مشۊم چەمک و دەسەواچەی تەر پەی کرڎەوەکاش بنریۊرە، ئانە کە جە ٢٣ و ٢٤وو ئابینە ڕووەش دا جە خێرامای هاکان فیدانینە، جە کۊمیایۊ و قومچیایۊ وەرڎەمیشنە ئەتککەرڎەی ڕۊحوو کورڎایەتیین. هەمان ئا کورڎایەتییە چندین ساڵێن پەدەکە وێش ورواستەن پۊرەشرە، وەلۍ کەس ئندەو ئادی سووک و تڕۊش نەکەرڎەن.
ئەتککەرڎەی دلۍ ئەتککەرڎەینە
خێرامای جە تیرۊریست و بکوش و ونچەکنێوە ئەگەر چێروو نامۍ سیاسەتی و دیپلۊماسینە کوچۍ ڕەوایەتییش پەنە بدریۊ –کە گردوو ئانیشا بە پیمانە و پیمەری شکۊمەندانە کریا- وەلۍ ئانە، کە حیچ بەهانێوە ورمەگێرۊ، دووەجار ئەتککەرڎەی یانە وەیەکەین، ڕێک وەختوو سەرڎایەکەینە سیدەکانۊ تا پێنجوێننە مێمانەکە دەسدرێژییش کەرۊ سەر و یانەوەی نقەش چۊوە نمۍ.
ئیتر خزمەت بە (پەدەکە)ی نەکریۊ
گرد ساڵێوە جە ٣١وو ئابینە خەڵک و ملەملەکەرەکاو پارتی (پەدەکە)ی، ویرۍ خیانەتەکاش کەراوە، پێسە ئانەیە کە ئا حزبە تەنیا یەک پەڵەی سیاو دلێچەماشۊ بۊ، ئانا چند ساڵێوەن ڕووقایمانە ئا خیانەتەیچش بە شانازی بە خەڵکی ورەشۊوە، یانۍ نەیار و ملەملەکەرەکاو پەدەکەی بە کوڵکەرڎەیۊ خیانەتەکا جە ٣١وو ئابینە، گەورەتەرین خزمەتشا پەنە کەرڎەن.
خیانەتەکاو پەدەکەی ٧٧ ساڵەشنە بەشوو گردوو پەلەکاو ڕۊژماروو گردوو ساڵەکا کەرا، وەلۍ بەزنای ئاستوو خیانەتی پاسە کەرۊ، سەروو دەسوو ئا حیزبەیۊ حەفتەو ئەتککەرڎەی ڕۊحوو کورڎایەتی، ڕووشنای کەرامەتوو تاکی و نەتەوێوە بۍ دلۍ ڕۊژماری و حەقا ساڵانە بەینوو ٢٤ و ٣١ ئابینە پاسە و پێسە حەفتەو سەرشۊڕکەرڎەی نەتەوێوە باریۊوە یاد و نەعلەتەش وەنە کریۊ.
نامێوە و چوار دروێ
پەدەکە یان پارتی دیموکراتوو کوردستانوو عێراقی، کە هەرچوار بڕگەو نامەکێش دروێوە زەقە و گەورێنە، ڕاسینە خێڵیوو دیکتاتۊری ناکوردستانی و تورانینە. بستێوە خاکوو کوردستانی و پەشتەو هیچ کۊشەرێوە کوردی نەمەنەن خەنجەرەو پەدەکەیش وەرنەکەوتێبۊ و نامەکێش دووانێوە جەیۊینەبڕیێنە چەنی خیانەتی.
ڕوانە گەورەتەرین دروەکۍ دەموو پەدەکەیۊ مەیا بەر و مەکینە زەبەلاحە میدیاییەکەیچشا بە زەڕی پیسوو نەوتۍ سیاوۍ ڕووەی سیاوەشا چەرمۍ کەراوە، وەلۍ ئانە جە حەفتەو سەرشۊڕی و ئەتککەرڎەی ڕۊحی نەتەوەیی ڕووەش دێنە، وەسێن پەی قرتیای پەتەو گردوو دروەکا و فڕەدای پەدەکەی پەی جبەروو بازنەو کوردبییەی و کورڎایەتی.
