بە پاو زانیارییەکاو پەلیانەو کۊڵبەرنیوزی، ڕۊو ٢٨وو تشرینوو یوەمی، ھێزەکاو پاسەوانوو سنوووروو سەر بە دەوڵەتوو ئێرانی، تەقەشا وەنەو پێڕۍ کۊڵبەرا و دەوروو "نەوسوود"ەو  پارێزگاو کرماشانی کەرڎەن و ئەنجامنە لاوکەمیوە ١٥ کۊڵبەرۍ بریندارۍ بیێنۍ.

وچیان، کە کۊڵبەرەکۍ خەڵکوو سەلاسوو باوەجانی و جوانڕۊینۍ و دۊخی تەندروسیی بڕێشا خاس نیا،  حەرپاسە ئا ھێزۍ دەسشا سەروو ٧٠ باراو ئا کۊڵبەرارە گێرتەن.

حەر ھەمان ڕۊ، ئەنجاموو تەقەو ھێزەکاو دەوڵەتوو ئێرانینە سنووروو "کێلە"و بانەینە کۊڵبەرێوە بە نامۍ "سرور شەریفی"، ٢٦ ساڵە فیشەک ۍ وەروو سەرەیش کەوتەن و ماچا، کە دۊخی تەندروسیی ئا گەنجەیە کە خەڵکوو دەگاو "کەوپێچ"وو بانەین خاس نیا.

لیوە تەرۊ، ڕۊو ٢٨وو تشرینوو یوەمی، ھێزەکاو پاسەوانوو سنووری بەرزاییەکاو 'تەتە'و ھەورامانینە وەرکەوتوو کورڎسانینە بەشێوە جە کۊڵ و باروو کۊڵبەراشا سۊچنان و بە چەکوو تاپڕی کۊڵبەرێوە بە نامۍ "ئارمان سەلیمی" ٢٥ ساڵە خەڵکوو شاروو مەریوان-یشا بە سەختی بریندار کەرڎەن.

ئینە وەختێوەنە، ڕۊو ٢٤وو ئی مانگۍ، مەنتێقەو سنووروو "کێلە"و سەر بە شاروو بانەینە، کۊڵبەرێوە بە نامۍ "موحسین عەبدوڵایی" ئشناسیا بە "موحسین کانی بەرد"ی، ٣٥ ساڵەی بە تەقەی ڕاستەوخۊو ھێزەکاو ئێرانی مەرد، کە خێزاندارا و ٤ زارۊڵێش هەنۍ. 

چێگەوە و بە پاو ئامارێوە کۊڵبەر نیوزی، بەینوو ٢١وو ئەیلوولینە تا ٢٢ۍ تشرینوو یوەموو ٢٠٢٣، لاو کەمیوە ٢٦ کۊڵبەرۍ و کاسبکارۍ کورڎۍ یاگە سنوورییەکاو وەرکەوتوو کورڎسانینە کوشیێنۍ و بریندارۍ بیێنۍ، کە فرێشا بە تەقەی ڕاستەوخۊو هێزەکاو دەوڵەتوو ئێرانی کریێنۍ ئامانج.