زیلان ئایدنە،گەریلاو یەژاستاری و سەیدۊ دەستینا گەریلاو هەپەگەی، بۊنەوساڵوەگېلو هەڵمەتەو ١٥ و ئابیۊ قسېشا پۍ ئاژانسو هەۋاڵی ئەنەفەی کەرڎۍ.

زیلان ئایدنە، گەریلۍ یەژاستاری بە مبارەک بایی کەرڎەی ١٥ و ئابی دەسش پنەکەرڎ و ۋاتش:"ئارۊ بەڕۊحیانەتو ١٥ و ئابی جە سەنگەرەکا مدرامانینە دژ بە سەنگەرەکا دوژمنی گژیەیمۍ".

زیلان ئایدنە تەئکیدش کەردۊ،  گەریلاکۍ هەپەگەی و یەژاستاری، حیچ وەختۍ دژ بە هجومە ئەرەگیریەکا دەوڵەتو ترکی سەرەشا نەنامنانەرە و ۋاتش:''چنی مدرامانوو گەریلای کۊشیای گەلی گیانبازیما فرە گرنگا. گەلەکەما خۊتانکەرڎەی جە گەریلای کەرا، کە دژ بە ئەرەگیرا جەنگ کەرا و قوربانی مڎا. جارېوەتەر مبارەک بایی ١٥ و ئابی کەرمۍ، کە جەژنەو ژیۋایۊ گەلوو کورڎین".

''هەڵۋېسو ڕابەر ئاپۊی پۍ ۋېما ئەساس گېرمۍ''

هەلمەتەو ١٥ و ئابی، بی بە مەڵامەتۍ پۍ ئانەی کۊشیای و مدرامانما گەشتەر کەرمۍ دژ بە ۋۍ دای دەسۊی مرڎمېوە. هجومەکۍ حەرچنە قورستەرۍ با با بانۍ، چن چەکی کیمیاۋی بەکاربارا، حەجگیز هەنگامۍ مەکیشیەیمۍ دماوە، ٤٠ ساڵېن کۊشیای کەرمۍ، ٤٠ ی تەریچ کەرمېش. پېسە گەریلاکا ئازاڎیی کورڎسانی، ئا خەتەو میراسەی جە هامڕاکاما عەگیدی و زیلانۍ و بېریتانۍ پنەما یاۋان پۍ ۋېما بەبنەماش گېرمۍ و ئا ڕۍ گېرمېنە ۋەر. ڕۊ دماو ڕۊی مدرامانما گەشتەرکەرمۍ. ئیسە جە گرڎوو مېڎانەکا کورڎسانینە، ئۊپەراسیۊنەکۍ پۍ دلېنەبەرڎەو گەریلای ۋەردەوامېنۍ. با گەلەکەما بزانۊ، کە ڕۊڵەکۍ ئی نیشتیمانیە دەس جە کۊشیای هۊرمەگېرا. چا ئۊپەراسیۊنانە قوربانیۍ گۊرېما دۍ. فرېوە جە هامڕا قارەمانەکاما تا دما گوللۍ ۋېڕاگریشا کەرڎ گەشمەرڎۍ ببیۍ. پی بۊنۊ جارېوەتەر بە ڕېزۊ یاڎوو هامرا گەشمەرڎەکاما کەرووە. وەعدەکەیما واوەی کەرمېوە، کە لایەق بە میراسو مدرامانیشا بیمۍ. هەڵۋېسو ڕابەر ئاپۊی پۍ ۋېما بە ئەساس گېرمۍ.

" حەقەو گەشمەرڎەکاما مسانمۍ"

سەیدۊ دەستینا گەریلاو هەپەگەی ئەرەیاۋناش، هەڵمەتەو ١٥ و ئابی پۍ گەلا چەوەسیای ئازاڎیی وازی فرە گرنگا و ۋاتش:''هەڵمەتەو ١٥ وئابی ڕېوە ڕۊشنەش نیشانە دایمۍ. هەڤاڵ عەگید دماو هەڵمەتەو ١٥ و ئابی نیشانەش دایمۍ، کە چنی گەلوو کورڎی متاۋۊ ۋېش ۋەران ۋەرو دەوڵەتو ترکی ئەرەگیرینە پارېزنۊ. گەلوو کورڎی و جمیەری ئازاڎیچ ساڵەو ١٩٨٤ یۊ سەرو ئا خەتۍ ملا. جە هەرېمەکا پارېزنای مەدیاینە بە تایبەتی زاپ، مەتینا، ئاڤاشین و خواکوڕکەنە مدرامانۍ گۊرە ملۊ ڕاوە. دوژمن گرڎ جۊرە چەکېوە بەکار مارۊ، بەڵام سەرەڕاو تەکنیکی و تەکنەلۊجیای، مەتاۋۊ هەنگامۍ بلۊ ۋەڵۍ. گەریلا چی کۊشیاینە پەشتی بە هەڵمەتەو ١٥ و ئابی بەسۊ. چېش بۊ با بۊ، ئېمە تا دما هەناسە ۋېڕاگری مکەرمۍ حەقەو گەشمەرڎەکاما مسانمېوە.

هـ . ش