هەپەگە شناسنامەو یەرۍ گەریلا گەشمەرڎاش ئاشکرا کەرد و ئەرەیاوناش، "هامڕێما دڵگەش، بەرخۊدان و مەروان کە بیۍ نوێنەروو ئیرادەی ئاپۊیی، زاپنە گەشمەرڎۍ بیۍ، جە خەرزانەوە تا ئامەد، تا دماهەناسەشا ڕۊحوو مدرامانی ئاپۊییشا وێنا کەرد".
ناوەندوو ئەرەیاونای و چاپەمەنیی هەپەگەی بارەو ٣ گەریلایاوە، کە ئامەدنە گەشمەرڎۍ بیۍ ئەرەیاوناێوەش وەڵا کەرڎۊ.
ئەرەیاوناکەینە ئامان:
"ڕۊو ٢٦وو ئابوو ٢٠٢٣، مەنتێقەو فارقینوو ئامەدینە، جەنگاوەراو سەرمەشقوو پارتەکەیما ھامڕێما دڵگەش و بەرخۊدان و مەروان هجوومێوە دوژمنینە، گەشمەرڎۍ بیۍ. نوێنەراو ئیرادەی ئاپۊیی ھامڕێما دڵگەش، مدرامان و مەروان، کە دژوو ھجوومەکا گیانبازانە گژیۍ، جە زاپۊ تا مێردین، خەرزانەوە تا ئامەد، تا دما هەناسەشا ڕۊحوو مدرامانی ئاپۊییشا وێنا کەرد.
ھامڕاما دڵگەش، کە نامۍ فەرماندەییش سەروو خەتەو گیانبازی، ئارڎەینە، زانابییەی و بەئیرادەبییەی بۍ، ژیوای ١٣ ساڵەی گەریلاییش پەڕاوپەڕ بۍ جە سەرکەوتەی، بی بە جەنگاوەرێوە، کە گرد وەختێوە چێوۍ جیاوازۍ خوڵقنۍ. جە گردوو مەیدانەکانە بە جۊشوخرۊش و ورەوە بەشداری جە هەرمانوکارەکانە کەرۍ و مۊرەو وێش دۍ وەنەو سەرکەوتەی، کۊشیاێوە بێھامتا بەرۍ ڕاوە پەی ڕەفیقەکاش بی بە جەنگاوەرێوە سەرمەشق.
ھامڕاما بەرخۊدان سەروو بنەماو دڵسۊزی پەی خەتەو گەشمەرڎا پەیوەندییش بە ڕیزەکاو گەریلایۊ کەرد، بی بە نموونێوە دەسچنکریا و شایستە پەی گەشمەرڎە مەبارەکەکا. ھامڕاما بەرخۊدان گردوو مەیدانەکانە کۊشیا و ھەڵوێستش نیشانە دا و بی بە بە یۊ جە جەنگاوەرە سەرمەشقەکاو پارتەکەیما پەکەکەی، کە پارتوو ڕابەر ئاپۊی و گەشمەرڎان.
ڕۊڵەو قارەمانوو سەرحەدی، جەنگاوەروو هەرمانە قورسەکا ھامڕاما مەروان، حەر جە ئەوەڵوو ژیوای گەریلاییشۊ، گردوو هەرمانە و وەرپەرسبییەێوەش بە جددیەتێوە فرەوە ئەرەپڕنا و بی بە یۊ جە جەنگاوەرە نموونەییەکاو پارتەکەیما. ڕاپیمای شۊڕشگێڵنانەش، کە وانۊ دەسش پەنە کەرد گرد وەختێوە سەرکەوتەی دەرباز بی. گەورەتەرین ئامانجش ئانە بۍ، کە ئامەدنە گەریلایەتی کەرۊ و پا ئامانجەیچش یاوا.
ھامڕێما دڵگەش، بەرخۊدان و مەروان بە شێوێوە شایستە نوێنەرایەتیی ڕۊحوو مدرامانیی ئاپۊیییشا کەرد. سەرەوەشیی وێما ئاڕاستەو بنەیانەی بەنرخوو ھامڕایاما و گەلی وەڵاتپارێزنوو کوردستانی کەرمۍ، وەعد مدەیمۍ ئا کۊشیایە ھامڕایاما پەیشا جیا ئاستێنمۍ، بە نۊعۍ کە شایستەو یادیشا بۊ، بیاوانمۍ سەرکەوتەی.
زانیاری دەربارەو شناسنامەو هامڕایە گەشمەرڎاما پێسنەن:
شناسنامە: دڵگەش زیلان گۊزەڕەش
نامۍ و دمانامێ: فەرهاد ئاکدەنیز
یاگۍ پەیدابییەی: جۊلەمێرگ
ئەدا-تاتە: مەریەم-عومەر
وەخت و شۊنەو گەشمەرڎەبییەی: ٢٦وو ئابوو ٢٠٢٣ / ئامەد
شناسنامە: بەرخۊدان فارقین
نامۍ و دمانامێ: حەنیفی سایگی
یاگۍ پەیدابییەی: ئامەد
ئەدا-تاتە: فاتمە-جەمیل
وەخت و شۊنەو گەشمەرڎەبییەی: ٢٦وو ئابوو ٢٠٢٣ / ئامەد
شناسنامە: مەروان وان
نامۍ و دمانامێ: موحتەرەم کۊچ
یاگۍ پەیدابییەی: وان
ئەدا-تاتە: سیانال-ئەحمەد
وەخت و شۊنەو گەشمەرڎەبییەی: ٢٦وو ئابوو ٢٠٢٣ / ئامەد
س.ز
