سوپاو تورکی شەوەو ٢٠ تەمووزی هەرێموو گەشمەرڎە دەلیلوو وەرنیشتوو زاپینە، دەسش بە ئۊپراسیۊنێوە تازەی ئەرەگیری کەرد. سوپا گردوو ئۊپراسیۊنە ئەرەگیرکارییەکا پەی سەروو کوردستانی ڕوێوە مانادارنە دەس پەنە کەرد، گەرەکشانە پێسە پەیامی جیاجیای سیاسی بیاونا. ئی جارەیچە سەروبەندوو ١٠٠ ساڵەو پەیمانەو لۊزانینە دەسش پەنە کەرد.

ئا پەیامە کە گەرەکشابۍ بیاوناش پێسنە بێ: " جە سەدەم ساڵەو لۊزانینە جینۊساید، ئەرەگیری، تاوانوو جەنگی، گردوو خراپەکارییەکا،  سەروو ڕووەو زەمینیوە بەرڎەوامۍ با".

هەرچند ڕوۍ چانە ورچنیا یان نا، گەریلا ئیتر کاراکتەروو سوپاو تورکی فرە خاس مشناسۊ و مزانۊ کە چارەنویسوو کوردی نەک  سەروو مێزەو هامپەیمانیی ئەرەگیرانە، بەڵکوم ئینا دلۍ سەنگەرەکاشانە. وەروو ئانەی هامسەنگی، هامپەیمانی، مامەڵەی سیاسی بە چە نۊعێوەیچ بۊ، گەریلا جگە جە جەنگی و کۊشیای وێش، پەشتی بە هیچ هێزێوە مەبەسۊ، بۍ ئانەی دەسەوزەنگۊڵ چەمەڕوانینە بۊ. دژوو دەوڵەتوو تورکی کە ستەمکارتەرین ڕوخساروو مەنتێقەکەین، بۍ مرڎای درێژە بە مدرامانوو وێشا مدا. یۊ جە نموونە بەرجەسەکاش ئی کۊشیاینە جە مەیدانوو کەشوو جودیی هەرێموو گەشمەرڎە دەلیلوو وەرنیشتوو زاپینە.

ئا لەیەکدایۊ کە قەرارگاکەشانە کەرڎەبێشا، زاپنە ناما دی

سوپاو تورکی مزانۊ چی مەیدانەنە زەرەری فرە گنۊ وەنەو ئۊپراسیۊنەکەیش. دماو حەوت مانگا ناچار بی، کە مەیدانەکەنە کیشیۊوە و دماو ئانەی سەروازاو وێش سەروو ئا کەشیوە سۊچنۍ و کەسایەتی و بڕواو وێش دۊڕنا. پەوکای مەتاوۊ کادرە پەروەرڎەکریایەکاش بارۊ سەروو ئی کەشی، سەروازە ئاساییەکایچش دماو مدرامانێوە درێژخواینی  ئیتر مەتاوا جووڵیاوە. جگە چانەیە فرە خاڵۍ تەرۍ هەنۍ مەیدانەکەنە، کە دژوو سوپاو تورکینۍ. خاسا سەرباروو گردوو ئا خاڵە نەرێنییا، سوپاو تورکی چا مەیدانەنە شکسش ئارڎەن، چی سەرجەنۊ دەسش کەرڎەنۊ بە ئۊپراسیۊنی؟

ئا ئۊپراسیۊنەو سوپاو تورک جە١٤ نیسانوو ٢٠٢٢ هەرێموو زاپینە دەسش پەنە کەرد،  سەنگەرەکاو  مدرامانوو سیدای و مەیدانەکاو مدرامانوو وەرنیشتوو زاپینە عاسی بی. بە پاو لەیەکایۊکاشا تا ئاخیروو ساڵەو ٢٠٢٢ تەماموو زاپی گێرێنۍ، وەلۍ نەتاواشا. مدرامانوو گەریلای بە پێچەوانەو چەمەڕوانییەکاوە زیادتەر درێژەش کێشت، تەسەور نەکەرێنۍ کە ناچارۍ با مەیدانوو وەرنیشتوو زاپینە وربەیا. هەڵبێن. یانۍ هەرچیشا کەرد نەتاواشا سەرکەوتەی ئەرەبیاونا. ئۊپراسیۊنوو زاپی شکس بۍ پەیشا. وەلۍ دەوڵەتوو تورکی کە ساعیبوو کاراکتەرێوە چانەین، کە سەروو ونێوە مژیوۊ، وەروو ئانەیە بەتایبەتی جە هەرێمەکاو پارێزنای مێدیاینە درێژە بە مەنەیۊ وێش بدۊ، ناچار بی کە ئۊپراسیۊنێوە پێسنە دەس پەنە کەرۊ. یانۍ ئا ئۊپراسیۊنە، کە ٢٠ تەمووزینە دەسش پەنە کەرد پەی دەوڵەتوو تورکی هەوڵداێوە تازە بۍ تا ڕزگار  کریۊ.

مدرامانوو گەریلای تازەن                   

لێوە تەرۊ سوپاو تورکی ئجێش، کە گەریلا پیسە ئەوەڵۍ مەتاوۊ وەراوەروو ئۊپراسیۊنی دووەمینە پێرفۊرمانسێوە قەوەت نیشانە بدۊ. چەمەڕوانۍ بێنۍ وەراوەرشانە هێزێوە لاواز، بۍ ئامادەکاری و خەمسەردوو گەریلای وینا.جە وینای ئادیشاوە گەریلا مەتاوۊ مدرامانۍ ڕێکوپێک کەرۊ، پەوکای جارێوە تەر هەوڵێشا دۍ مەیدانوو کەشوو جودینە بنۍ وزا. وەلۍ ئانە چاگە لەیەکشا داوە زاپنە و مەیدانوو جەنگینە ناما دی. گەریلا بەتایبەتی جە مانگەو کانوونوو دووەمی پی لاوە کە سوپاو تورکی کەشوو جودینە کێشیاوە، بە بۍ کەمتەرخەمی فرە خاس وێش ئامادە کەرد. شەوەو هجوومەکەی بە ڕاوشۊن، سەرووێیی و دەسکەرڎەیۊ یاگێنە لوۍ گژۍ هەوڵە ئەرەگیرییەکاو سوپاو تورکیرە. چا هجوومانە تا ئیساتۍ کریێنۍ یەک زەرەری گیانی چێشا نەبییەن، پێسە سەنگەرەکاشا پارێزنا.

زەرەرە گیانییەکاشا ئاشکرا مەکەرا

ناوەندوو ئەرەیاونای و چاپەمەنیی هەپەگەی ڕاسیی جەنگەکەی بە ورڎەکاریوە گرد ڕوۍ ڕۊژێک جە ڕاو ئەرەیاونایۊ وەلا کەراوە. وەلۍ سوپاو تورکی هەوڵۍ مدۊ پاسەش نیشانە بدۊ، پێسە ئانەی ئۊپراسیۊنەکە مەیدانێوە فرە وافرنە بلۊ ڕاوە پاسە باسش کەرۊ، ئینجا  ٢٠  تەمووزی بەدماوە شناسنامەو ئا سەروازا ئاشکرا مەکەرۊ کە کوشیێنۍ. تەنیا چند ڕوۍ چیوەڵتەر واتشا، 'جە مەنتێقەو ئۊپراسیۊنوو پەنجە قوفڵینە' سەروازێوەشا کوشیان. ئینە چەنی بۊ، واتشا دریان هەلیکۊپتەرەکەی و کوشیان. سەروازێوەیچ بە نامۍ ئەرڎەم کاڤالاک یانۍ بە چەکەکەیشۊ جە ڕووەداێوەنە مەرڎەن. وەڵۍ چند ڕوایچنە یانۍ گابارنە جەرڎەوانێوە قاچش خزان و کەوتەنەرە وار و مەرڎەن. مەحاڵا ئینۍ بە ڕێککەوت با. ئانەیچ سەرنجکێشا ئانەن کە گەلوو تورکی یا بنەیانەو ئا سەروازا نمەیاوە دەنگ و مەواچا ئینە چە سوپێونە، کە گرد ڕووۍ یۊشا کتوپڕێنە مڕۊ؟ 

سوپاو تورکی شناسنامەو سەروازەکاش کە بە دەسوو گەریلای سزا دریێنۍ، شارۊوە. گەریلا بە دەیان جارۍ ئانەش بە بەڵگە وستەن ڕووە. جە مەیدانوو کەشوو جودینە جە جەنگوو ٥ ڕۊی ویەرڎەینە زیادتەر جە ٢٥ سەروازا کوشیێنۍ.

گەریلا سەروازانە جەنگ  کەرۊ

گەریلاکاو یەژاستاری و هەپەگەی وەراوەروو بازنەو خراپەکارینە، دوور جە فرتوفێڵی، دوور جە دراو و بەجەوهەری و بەرجەسە گژیا. ساڵەو ٢٠٢٢دا ٧ مانگۍ جە جەنگوو مەیدانی و تونێلەکانە یۊ جە گەورەتەرین گورزەکاشا تاریخوو سوپاو تورکیاینە چا سوپۍ شانا و پاسەشا کەرد، کە ئەرەگیرۍ کێشیاوە. ئەنجامەکاو ڕواو ئەوەڵوو جەنگی بەرش وزۊ، کە جە هەرێموو وەرنیشتوو زاپینە دووەم سەرکەوتەی تۊمار کریۊ. 

س.ز