هۆرام: کۆچی دمایی وەلی فەتاحی خەسارێ گەورەن پەی زوان و ئەدەبیاتو هەورامی
پلاتفۆرموو هۆرام-ی بە بۆنەو کۆچی دمایی شاعیر و ڕۆشنویرو هۆرامانی وەلی فەتاحی پەرسەنامەش دان و کۆچەکەش بە خەسارێ گەورە پەی زوان و ئەدەبیاتی هۆرامی نامێ بەردەن.
کۆمسیۆنوو فەرهەنگی پلاتفۆرموو هۆرام-ی بە بۆنەو کۆچی دمایی شاعیر، ڕۆشنویر، نویسەر و مامۆستاو هۆرامانی وەلی فەتاحی پەرسەنامەش دان.
کۆمیسۆنەکە کۆچی دمایی فەتاحیش بە خەسارێ گەورە پەی زوان و ئەدەبیاتی هۆرامی نامێ بەردەن و ئاشکراش کەردەن: ئەگەر چی کۆچوو هەر ئازیزێ و نزیکێ ناوەشا، بەڵام کۆچوو کەسانێ سەڕەراو ناوەش بییەی، دماو وێشاوە؟کەڵینە گەورێ چا بەشەنە کە هەرمانەشا چنە کەردێنە جیا مازانێ. کۆچوو کاک وەلی فەتاحی یۆ چا کۆچانە کە جە دماو وێش کەڵێنێ گەورێش جە ساراو ئەدەبیات و زوانوو هۆرامییەنە جیا ئاستە.
تەمامی پەرسەنامەکەی:
بەداخەوە هەواڵو کۆچوو ناوەختوو شاعیر و ڕۆشنویری بە ئاوازەو هۆرامانی، کاک وەلی فەتاحی پسۆ یۆ جە دڵسۆزا و گەلەکەیما خەمبارێش کەردێمێ. ئەگەر چێ کۆچوو هەر ئازیزێ و نزیکێ ناوەشا، بەڵام کۆچوو کەسانێ سەرەراو ناوەش بییەی، دماو وێشا کەڵینە گەورێ چا بەشەنە کە هەرمانەشا کەردێنە جیا مازا. کۆچوو ڕۆشنویر کاک وەلی فەتاحی یۆ چا کۆچانە کە جە دماو وێش کەڵێنێ گەورێش جە ساراو ئەدەبیات و زوانوو هۆرامی جیا ئاستە.
مامۆستا وەلی، یۆ جه نویسه‌ره دڵسۆزه‌کانوو هۆرامانی بێ کە جە وتارێ و نویستەکانشەنە فرە جارێ شێوازێوی ڕەخنەگێرانەی گاڵتەئامێزش گێرتەبێنەوەر. کۆچکەردە هاموەخت یۆ جە ئەرەمەرزنەرانو کۆگاو فەرهەنگی ئەدەبی میراز ئەحمەد داودوشی جە ڕەوانسەر و ئەندامو ئه‌نجومه‌ن ئه‌ده‌بی شنه‌و فه‌رهه‌نگوو هه‌ورامانوو پاوه-ی بێ و جە ماوەو تەمەنیشەنە چن بەرهەمێش پێشکەش بە کتێبخانەو هۆرامانی کەردێ .
پسۆ پلاتفۆرموو هۆرام-ی سەرەراو سەرەوەشی جە خانەوادە و کەسوکاریش، وێما بە قەرزاروو ڕاو و قەڵەمەکەیش وینمێ. کۆچش هەرمانەو ئێمە و ڕۆشنویرا هۆرامانیش پەێی یاوای بە ئامانجەکاش قۆرستەر کەردەوە. هیواما ئانەن کە ڕووناکویرێ، چاڵاکێ و قەڵەم بەدەسێ هۆرامانی، بەرێکوستەو وێشا و بە سیستم کەردەو کۆشایشا شکۆداری پارێزناو زوان و ئەدەبیاتو هۆرامی گێرا مل. باوەڕما ئانەن کە هەرمانە تاکەکەسیەکا سەرەراو ئانەی کە ئەرکوو ئا کەسا قۆرس مەکەرۆ ، جە روەدای هەر ئەگەرێ، کۆسپێ گەورە و کەڵێنی قووڵ پەی هامویرەکاش جیا مازۆ. پنەوازەن پەێی ئانەی ڕەنجوو دڵسۆزا گەلەکەیما بە خەسار نەڵۆنە، هۆنەرمەند، نویسکار، رۆشنویر و شاعیرێ وێشا جە چوارچێوەو کۆگا ئەدەبی و فەرهەنگی و زوانەوانی جەمێ بکەرانێوە و رێکبوزا. ئەگەر نەبیمێ بە سیستم ئا ڕەنج و خەباتە کە جە ساڵانی ویەردەنە تا بە ئارۆ دریان، مەتەرسی فۆتیایش فرەتەر مەبۆنە.
کۆمسیۆنوو فەرهەنگی پلاتفۆرموو هۆرام-ی
