گەریلاو یەژاستاری ژیان رڕێدورە بۊنەو ٢٧ەمین ساڵیاڎوو گەشمەرڎەبییەی زیلان (زەینەب کناجی) کە ٣٠ی حوزەیرانوو ١٩٩٦ جە دێرسیمنە چالاکیی گیانبازیش کەرد، قسێش پەی ئاژانسوو هەواڵوو فورات (ANF)ی کەرڎۍ.

ژیان ڕێدورە جە کەسایەتیی گەشمەرڎە زیلانێنە گرڎوو گەشمەرڎاو شۊڕشیش ویرۍ وستێوە وپێسە درێژەش بە قسەکاش دا: "وێبەساعیبزانای کۊشیای ئازادیی هەڤاڵ زیلانۍ بەهێوەنە. گەرەکمانە کەشە ئازادەکانە خاوەندارییش کەرمۍ. هامڕا زیلانە کە تەنیا ساڵێوە دلۍ پارتەکەیمانە مەنۊ، پەی ئێمە سەرمەشقەو گیانبازینە. وەروو ئانەی هامڕا زیلانە ڕاو گیانبازییش پەی ئێمە خولقنا. ئا بەهۍ دلۍ پارتەکەیمانە خولقنێنێس تا ئیساتۍ درێژەشا هەن. ئینسان سەرەش سڕ مەنۊ کە جەنگەوانۍ چانۍ پی جۊرە. بە دڵسۊزیی وێش پەی پارتەکەیما، کەسایەتی و چالاکیی وێش جە تەمەنێوە گەنجنە سەروو خەتەو گیانبازیوە خولقنا.

گیانوو مدرامانوو هامڕا زیلانێم دایمە ئیناما چەنی، دلۍ جمیەرەکەیمانە و ڕاویارا و شۊنکەوتا و گیانبازا پێسە هامڕا زیلانۍ پێسە ئاندۊک، هێرش، زنار، دۊغا، ئەیلەم و تیرێژۍ و بە هەزاران هامڕۍ چانێما هەنۍ. پەی بەدیئارڎەی ئامانجوو گەشمەرڎاما ئینایمۍ سەروو ڕیبازوو ئاڎیشاوە. ئا هامڕێما کە ڕاو زیلانێسا گێرتەرە وەر و بیۍ بە گیانبازۍ، ئارۊ بەحروو ئازدییشا خولقنا، کە دوژمن دایمە هەوڵۍ مڎۊ ئا بەحرەیە وشک کەرۊ، وەلۍ مەتاوۊ و سەرکەوتە مەبۊ، گەشمەرڎەکێما بیۍ بە دڵۊپێوە جە بەحروو ئازادی و ئا ئازادییەشا فەراهەم کەرڎ. تا گیانبازۍ ئاپۊیۍ با، دوژمن مەتاوۊ بەئاسانی دەسۍ گڵیاوێش بیاونۊ خاک، ژەنی، گەنجەکاما.

ئی کۊشیایە دژوو دوژمنی ملۊ ڕاوە، میراتوو هامڕا زیلانێن، جە سەیەو هامڕا زیلانیۍ، سەما، سارۍ و بێریتانێنە ئێمە ئارۊ ئینایمۍ سەنگەرەکاو ئازادیینە. ئانەیچە کە ئێمە پی ژیوایە بەسۊوە ڕابەرایەتی وهامڕا گەشمەرڎەکێمانۍ، جە سەیەو ئاڎیشاوە جمیەرووو ژەنا یاوان ئیساتۍ. ئی مدرامانە بە درووشموو 'ژەنی، ژیوای، ئازادی' گەورە بی، ئارۊیچ شارەکاو کورڎسانیرە وەڵا بیۊ کاریگەرییش سەروو تەماموو جیهانیرە نیانرە، ئینەیجە ئینا سەیەو زیلانۍ و ساراکانە، هەزاران ژەنۍ یەژاستاری چەمنەتەرسانە بۍ دووەدڵی ورکوا سەرووو دوژمنی. هەقەو هەزاران ساڵەی کەراوە.

پێسە گەریلاکاو یەژا ستاری گەرەکمانە ئی کۊشیایە، کە بە قوربانیدای گەورە وەش کریان، ئانڎەی تەر گەورە کەرمۍ. بیمۍ پیموو ڕومانەو زیلانۍ، ئاویروو جەسەو سەمۍ. دروشموو 'ژەنی، ژیوای، ئازادی'ی خەتەو ڕابەرایەتی وکۊشیای هامڕا زیلانۍ  دنیارە وەڵا بییەینۊ و پاسەش کەرڎەن کە ئێمە سەروو پایاو وێماوە مرڎمێرە، ئێمە جەنگەوانۍ هامڕا زیلانێنمۍ، بە ڕۊحوو زیلانۍ، سەمۍ، بێریتانۍ، سارۍ بەدڵنیاییوە سەرۍ گنمۍ."

س.ز