پەرلەمانتارو پارتو چەپی سەوزی یڵماز هون جە بارەو گۆشەگیرکەرڎەی رابەرو گەلوو کورڎی عەبدوڵا ئۆجالانی و پاشێلکەرڎەی مافەکا مرۆڤی جە زینڎانەکانە قسېش پۍ ئاژانسو هەواڵی فورات (ANF)ی کەرڎ.

هون ئاماژەش پانەی کەرڎ کە زینڎانەکا تورکیاینە تاوانۍ دژ بە مرۆڤایەتی ئەنجام دریا و ۋاتش، "جە پەیماننامە و یاسا میان نەتەوەییەکانە جە بارەو زینڎانیا نەۋەشیوە جە زینڎانەکانە ژمارېوە فرۍ یاسۍ هەنۍ. بە داخۊ سەردەمو ئی دەسەڵاتەینە سەرەڕاو زینڎانیکەرڎەی بە ناحەقی و نایاسایی حەرپاسە دژ بە زینڎانیا نەۋەشی سیاسەتێوە قڕکەرڎەی و دلېنەبەرڎەی پەیڕەو کریۊ. هەڤاڵەکېما سەرەڕاو نەۋەشی قورسی  نە بە شێۋېوە رێکوپێک چارەسەری پزیشکیشا پۍ کریۊ، نە ئازاڎۍ کریا. پارتەکەما سەبارەڎ بە زینڎانەکا پلانێۋە ئاماڎە کەرۊ. بېجگە چانەیچ جە ڕاو پەرلەمانیچۊ پڕۆژە یاسا، کۆنفڕانسی رۊنامەوانی و پەرسنای سەرو ئا مژارا وزۊنە ڕوۋە".

ئاماڎەکاری پۍ پاکتاوی سیاسی

هون ئانەیچش وست ڕووە کە گرڎ ڕوۋۍ زینڎانێوە تازە کریۊوە، پینەیچ بنەڕەتو پاکتاوی سیاسی تەمام کریۊ و ۋاتش: "بەتایبەتی ئێمە پەیوەس بە زینڎانەکا نۊعو "ئێس"ی جە ئیدر، سەبارەڎ بە زینڎانو نۊعو "وای" ، شەکوا و تانەکېما هۊرگېرتېنۍ. چا زینڎانانە ژووری تاکەکەسی پۍ ئەشکەنجە کەرڎەی بەکارمۍ. ئێمە شۊنیرە لۋای پۍ ئا مژارا کەرمۍ".

'دەسەڵاڎ حۊلو تۆقانای و تەرسۍ مڎۊ'

هون ئاماژەش بە سیاسەتو تەرسنای-تۊقنای و دلېنەبەرڎەی جە دژوو گەلوو کورڎی کەرڎ و ۋاتش، "پۍ ئانەی داواکارییەکا کورڎی پۍ یەکسانی ، داڎپەروەری و ئازاڎیی سەرکوت کەرا، دەنگو هێزە دیموکراسییەکا کپ کەرا و نازا کە دلۍ رای گرڎینە بژنەۋیا، حۊل مڎۊ کە بە ئۆپەراسیۆنی سیاسیی ڕوانە تەرسنای و ڕاگیری ئەنجام بڎۊ. دماو هۊرچنیەکاوە، چنی ئا پارتای کە ئینۍ چېرو چەترەو پارتەکەیمانە ئێمە جەبارەو شێۋاز و رێبازەکا کۊشیای جە قۆناغەکەنە کۊبیەیۊ ساز کەرمۍ. جەڕاو هۊرسەنگنا و هۊرگېرتەو پێشنیاز و دەسنیشانکەرڎەکا گەلی قەراری هامبەش دریۊ. بە پاو ئانەی ئێمە پێرسپێکتیڤ و دوورنماو هەرمانەو ۋېما پۍ ئی قۊناغیە دیاری کەرمۍ".

هـ . ش