جە ڕۆو جهانی زوانی ئەڎایەنە، ڕێکوزیاو (”هەورام“ پەی فەرهەنگ و زوانی)، جە بەیاننامێوەنە؛ چەنی پیرۆز بایی جە بۆنەکەی، زوانی هۆرامیش بە یۆ جە پەنەیاواتەرین و هێقم تەرین زوانەکان بە نامێ کەردەن.

جە ڕۆو جهانی زوانی ئەڎایەنە، ڕێکوزیاو (”هەورام“ پەی فەرهەنگ و زوانی)، بەیاننامێوشدان و جە میانشەنە سەرەڕاو پیرۆزبایی جە بۆنەکە، زوانی هۆرامیش بە یۆ جە پەنەیاواتەرین و هێقم تەرین زوانەکان بە نامێ کەردەن و ئەرەیاونانش: ئی بومێ کە نامێش کوردستانا درێژایی مێژویەنە بیەی وێش سەلەمنان و هەمیشە داراو زوان و فەرهەنگو وێش بیەن و ئارۆ هۆرامی میراتگرو ئا وەڵینە دۆڵەمەندەیەنە و ئیسەیچ کەسەردەمو وەڵێکەوتەو کۆمەڵگەیا مشیۆ کار پەی پارێزنای گردو زوانەکا کریۆ.

تەمامی بەیاننامەکەو ڕێکوزیاو ( هەورام پەی فەرهەنگ و زوان ی)

بەبۆنەو رۆو زوانی ئەدایی ۆ

سەرەتا پیرۆزبایی جە گۆکەرا گردو زوانەکا کەرمێنە و ئاواتەوازێنمێ گردوو زوانەکا زەمینێوی ئارام و دیموکراسییەنە گەشە کەراو تنگیاوە.
زوان ناسنامەو بیەو میللەتان، زوانو هەر میللەتێوی نیشاندەرو رەسەنایەتی و توانایی ئا نەتەوەیەنە.
ئی بومێ کە نامێش کوردستانا درێژایی مێژویەنە بیەی وێش سەلەمنان و هەمیشە داراو زوان و فەرهەنگو وێش بیەن و ئارۆ هۆرامی میراتگرو ئا وەڵینە دۆڵەمەندەیەنە.
بەدرێژایی مێژوی فرە زوانێ ئامێ و بەینەنە شیێ، چون ئانێ بەکارش ئارێنێ خەمسەردیشا کەرد، ئینە سەربارو زاڵ بیەی زوانی دینی و زوانی سیاسی و دەسەڵاتدارا.
زوانی هەورامی سەربارو ئاگردە فشارا سەرشۆ، چونکە هەم زوانی ئاینی و هەم زوانی ئەدەبی بیەن، تاواش چێرو باری سەختییەنە وەرگە گێرۆنەو مەنۆوە.
ئیسەیچ کەسەردەمو وەڵێکەوتەو کۆمەڵگەیا مشیۆ کار پەی پارێزنای گردو زوانەکا کریۆ، جەلاو سازمانە جیهانی و وێمانەکاوە، چانەیچە گرنگتەر مشیۆ هەورامی گۆکی فرەتەر گرنگی بەزوانەکەیشا دانە و جەفۆتنای پارێزناش.
زوانی هۆرامی یۆ جە پەنەیاواتەرین و هێقم تەرین زوانو مەحاڵەکەیا و هەرئانەیچە بیەن هۆکارو مەنەیۆش، ئینە سەربارو گرنگییە ئاینییەکێش کە زوانی فەرمی ئاینو یارسانییاو تائیسەیچە پەیڕەوکارێ ئا ئایینەیە پی زوانییە سروتە ئایینیەکاشا بەرا راوە.
ویرمەندێ هۆرامانی مشیۆ زانستیانە و بەئاوەزۆ کاری ژیرانە پەی ئی زوانەیە کەرا، دور جە دەمارگیری، مشیۆ ئەوێ تەرێچ بە تەمامو عەقڵ و ئەنەیاوایۆ ئی زوانییە قبوڵ کەرا، هەورامی بیەی ماناش ئانێ نییەنە ئێمە کوردێ نییەنمێ، چون زوان و نەتەوە دوێ چێوێ جیانێ پێناسەنە، چون ئاساییا نەتەوێ زوانێ زیاتەرش بۆنە، با کوردیچ جەزوانێ زیاتەرش بۆنە.
وەرو رۆشنایی جاڕنامە جیهانییەکانە سەرو ئازادی و زوانی و مافو مرۆڤی، کە جەبەین شیەی هەر زوانێوی جەبەین شیەی بەشێ جە سامانی فەرهەنگی گلێرگەی بەشەرییا، چی بۆنەنە مشیۆ بە پرۆژەی ئارۆییانۆ بلمێ وەرۆو داواو لانی کەمو داواکاما چی خاڵانە وزمێ وەرو دەسو کاربەدەسا حکومەتو کوردستانی:
1- چا یاگانە فرەیی خەڵکەکەی هەورامییا، حەفتێنە لانی کەم 5 دەرسێ هەورامیێ بونیا مەکتەبەکانە.
2- ئینە تا قۆناغو سەرەتایی تەمامیۆ بەردەوام بۆ.
3- دلێ کتێبەکا وانایەنە بە کوردی میانە و کرمانجی، جەبارەو زوان و فەرهەنگو هەورامانیۆ بابەت بۆنە.
4- ناوەندوو هەورامان ناسی زانکۆکانە کریۆوە، وەنەیۆ سەرو زوان و فەرهەنگو هەورامانی کریۆنە و بەشە جیاجیاکانە کارنامەو وەنەی سەرو هەورامانی کریۆ.
ئێمە پێسە رێکوزیاو ( هەورام)ی پەی فەرهەنگ و زوانیی، پرۆژەی ئامادەما هەن و ئامادەیی هامکاری گرد لایەما هەن پەی ئی کارەیە.
ئێساڵ بەدروشمو ( زوانی هەورامی .. ویەردە، ئیسە، ئایندەمانە) کاری فرەتەر کەرمێ پەی داواکاریەکاما..

نامق هۆرامی، ڕاوەبەرو ڕێکوزیاو (هەورام)ی پەی فەرهەنگ و زوانی
2سیاوکامی