جەُ ئەرەیاونایێوەنە میانگەو یاونەری و چاپەمەنی هێزەکانو پارێزای گەلی (HPG/هەپەگە) ئاشکراش کەرد: هەورام ئاۋیەر فەرماندەو ئیالەتو مێردینی و ٣  گەریلایێ هامڕێش جە دمای جەنگی قارەمانانەی چەنی دوژمنی ئەرەگێری تورکی، جە پارێزگاو مێردینی سەر بە سەرنیشتو کوردستانی شەهیدێ بیێنێ.
میانگەکە دەستنیشانش کەردەن: هەورام ئاۋیەر خەڵکو ناوچەو ژاوەرۆی سەر بە هەرێمو هەورامانیەن و جە شارو سنەی جە ئەڎێ بییەن و جە فرە مەیدانێ کۆشاییەنە بەشێوازێوی سەرکەوتە ئەرک و وەرپەرسیاریش بەگاە ئاوردەن.

تەمامی ئەرەیاوناکەی:

"٨ی نیسانو ٢٠٢١ی ئاشکرامان کەردەبێ: ٢٩و ئاداریەنە سەعات ١٤:٠٠ دمانیمەڕۆی، جە (دەربەندو شەهیدا)و ناوچەو باگۆکێ-ی سەر بە پارێزگاو مێردین-و سەرنیشتو کوردستانی، گرووپێ جە هامڕاکانمان کە ئەرک و وەرپەرسیاری وێشان بەجا ئاوەرێنێ، رووبەڕووێ ئەرتەشە ئەرگێرەکەو تورکیای مەبانێوە کە جە ناوچەکەنە ژلێوەی لەشکەریش دەستپنەکەردەبێ. جە دمای جەنگی و مدرامانی قارەمانانەی و کوشتەی و بریندارکەردەی چەنڎین سەربازێ دوژمنی، هامڕێمان (هەورام، رێبەر، عەگید و ڕۆستەم) شەهیدێ مەبانێ".

شناسنامێ چوار شەهیدەکەی: 

ئەشناسیا بە: هەورام ئاویەر

نامێ: حەسەن

شۆرەت: مەحمودی

یاگۍ جەئەڎابییەی: سنە

نامێ ئەڎێ: گوڵستانە

نامێ تاتەی: سالار
کات و سات و یاگۍ شەهیدبییەی: ٢٩و ئادارو ٢٠٢١ی/ مێردین

ئەشناسیا بە: ڕێبەر کوردستان

نامێ: ئەیوب

شۆرەت: چام

یاگۍ جەئەڎابییەی: مێردین

نامێ ئەڎێ: غەزاڵێ

نامێ تاتەی: چەجان

کات و سات و یاگۍ شەهیدبییەی: ٢٩و ئادارو ٢٠٢١ی/ مێردین

ئەشناسیا بە: عەگید تیمۆک

نامێ: قارەمان 

شۆرەت: سونار

یاگۍ جەئەڎابییەی: ئێلح

نامێ ئەڎێ: فاتیمە

نامێ تاتەی: بەدرەدین

کات و سات و یاگۍ شەهیدبییەی: ٢٩و ئادارو ٢٠٢١ی/ مێردین

ئشناسیا بە: ڕۆستەم فێراز

نامێ: عیسمەت

شۆرەت: بیلگیچ

یاگۍ جەئەڎابییەی: مێردین

نامێ ئەڎێ: ڕابیعە

نامێ تاتەی: عیسا

کات و سات و یاگۍ شەهیدبییەی: ٢٩و ئادارو ٢٠٢١ی/ مێردین

ژیانامە و کۆشانامەو هامڕا (هۆام ئاۋیەر)ی:

حەسەن مەحمودی نامێ جەمیەریەش (هەورام ئاۋیەر) خەڵکو یوەجە دەگایەکانو  ناوچەو ژاوەرۆی سەر بە هەرێمو هەورامانیەن و جە شارو سنەی جە ئەڎێ بییەن.
ئاۋیەر بە فەرهەنگو مدارمانی و وڵاتپارێزی هەورامانی پەروەردە و گەورە بییەن و کۆشای ئازدایش ئەشناسان. جە ساڵەو ١٩٩٩ی و جە سەروبەندو گەلەکۆمەی میاندەوڵەتی دژ بە ڕابەر ئۆجالانی، بە جەمیەری ئاپۆی ئاشنا مەبۆنە. هەر بە نەوجەوانی و گەنجی هەوڵش وستگەڕ تا هامتەریب چەنی کۆشای ئازادی، جە فرە بوارێنە ببۆنە بە کەسێوی ئەنەیاوا و پنەیاوا و وەڵکەوتە. هامڕا هەورام جە زانستگانە جە بەشو ئەندازیاری کۆمپیوتەری هۆرمەگیریۆنە و چوون مسیارێ زیرەک و سەرکەوتە جە سەنگەرو وانای و زانستیەنە بەردەوام بی تا ئا کاتە هەستش کەرد کە بە جەنگی شۆڕشگێڵانە ئازدی گەلی مسۆگەر مەبۆنە و زانستگای مازۆنە جیا و پەیوەست مەبۆنە بە کۆشای گەریلایەتی. هەر چەنی دەستبەکاربییەیش چوون گەریلا، هەر زوو فێرو ژیوای پەکەکەیی و گەریلایەتی و کۆشای کەشێ مەبۆنە و وێش بە پەروەردە و بارئاوردەی وەڵێ مەوزۆنە و بەخێرایی پلێ و قۆناغەکێش بڕیێ و بی بە فەرماندێوی چنەئاما و پێشەنگ.
ساڵەو ٢٠١٣ی خولەکێ پەروەردەی ئایدۆلۆژیکی و سەربازییش تەمامنێ و شۆنیشەرە شی سەرنیشتو کوردستانی و جە فەرماندەیی بەستایەنە ئەرکدار بی. دماتەر جە جودی چەنی فەرماندە گەلهاتی چوون دوێ فەرماندارێ چەنەئامێ هەرێمەکەی درێژەش بەکۆشای دا. دمای ئانەی کە هامڕا گەلهات شی کۆبانێ و جە مدرامان و ڕزگاری کۆبانییەنە ڕۆڵی پێشەنگانەش گێڵنا، هامڕا هەورام جە جودی یاگۍ ئاڎیش گێرتەوە و فەرمانداری جودیش پنە ئەسپاریا. ساڵەو ٢٠١٥ی جە جودی بی بە فەرماندارێوی پێشەنگ و چەنڎین چالاکیێش دژ بە دوژمنی ئەنجامێ دێ. هامڕا هەورام هامڕایەکێش ئامادێ مەکەرێ و پلانەشان پەی مجێرە و وێچش جە وەڵێشانەوە پێشەنگایەتیشان مەکەرێ.
جە قۆناغەکێ کۆشای وێسەری دیمۆکراتیی سەرنیشتو کوردستانیەنە و جە جەزیرەو بۆتانی ٩ شەوانە ڕوێ دژ بە دوژمنی ئەرەگێری مدراوە و بی بە فەرماندارو مدرامانەکەی و ئەرتەش و دەوڵەتو تورکیایش ناچار بە ئەوەکێشتەی کەردێ.

جە مانگەو نیسانو ٢٠١٦ییەنە، جە ناوچەو جزیرەی سەر بە هەرێمو بۆتانی، ڕژێمە ئەرەگێرەکەو تورکیای یورشش بەرد سەرو شارو سلوپیای و گەلەکەیش. 
هامڕا هەورام، دەمودەست ٦٠ هامڕێش پەروەردەێ و ئامادێ و سازێ کەردێ و پێوەرە ڕووبەڕووێ دوژمنی بیێوە و ٢ شەوانە ڕوێ شارشان کۆنترۆڵ کەرد. هاوەخت دەیان سەربازێ و ئەندامێ تیمێ تایبەتێ سوپاو تورکیایشان بەسزایاونێ و دمابەدمای ئانەی تۆڵەشان جە دوژمنی کەردەوە، جە شارەکەنە کێشیێوە.
هەر جە ٢٠١٦، جە بۆتان تا بەستا و گارسا و هەتا کۋیسانەکێ کاتۆی، بە شێوازی دەستەی گەریلایی ئەراگێڵی، هامڕا هەورام ئازایانە و نەتەرسانە درێژەش بە کۆشاییشی دا و دەیان چالاکیێش دژ بە دوژمنی ئەنجامێ دێ کە جە میانشانە دەیان سەربازێ و ئەندامێ تیمێ تایبەتێ ڕژێمی کوشیێ و بریندارێ بیێ. دماتەر کریا بە فەرماندەو هەرێمو کاتۆی و ئەرکەکێش بێکەموکوڵی ئەنجامێ دێ. جە ١٩و نیسانو ٢٠١٧ی، جە کاتۆ  پلانە و بەرنامەش متەرە پەی ئەنجامدای چالاکی دژ بە دوژمنی. شۆنیشەرە چالاکییەکەش ئەنجامدا و گورزی گەورە جە دوژمنی دریا. بەڵام جە چالاکییەکەنە بەقورسی برینداربی. دمای برینداربییەش پەی چارەشەری ڕەوانەو هەرێمەکانو پارێزنای میدیای کریا. هامتەریب چەنی چارەسەری 
جە فەرماندیی ئاکادمی ئاپۆلۆنی دەستبەکاربی و سەبارەت بە کۆشای گەریلایی مۆدێرنی دیمۆکراتیکی، گەریلا هامڕاکێش پەروەردێ کەردێ. ساڵەو ٢٠١٩ی، فەرماندەیی (ئیالەتو مێردین)یش پنە ئەسپاریا و تا شەهیدبییەش چنەئامایانە و سەرکەوتتانە کار و بارەکێش ڕاوەبەردێ و گورزێ قورسێش جە دوژمنی دێ.

هامڕا هەورام ئاۋیەر جە کەسایەتیی وێشەنە ناوچەگەراییش دەرباز کەرد و جە سایەو پارادیگماو نەتەوەی دیموکراتیکیەنە جە  گەنجێوی هەورامانی و سنە-یەوە بی بە گەنێجوی کوردستانی و دڵش پەی هەر چواربەشێ کوردستانی دێونە. جە هەورامان پەیوەست بە ڕێزەکانو گەریلایەتی بی و بە لوایش پەی پانیشت و سەرنیشتو کوردستانی، سەلەمناش کەسێوی ئازادی نەتەوەیین. بەگردی هامڕا هەورام بە هەڵوێستێ و چالاکییێ و کۆشایشەکەیش بی بە گەوهەر وڵاتپارێزی و سومبولی نەتەوەەیی.

بە ئی بۆنەوە سەروەشی جە وێمان، بنەماڵێ هەر چوار هامڕێمان و گەلە وڵاتپارێزەکەیمان مەکەرمۍ.