جە وۆرکشۆپێوی میاندەوڵەتییەنە کە هەڵەبجە ڕێکوزیابێ، (مەهاباد کامل عەبدوڵا هەورامی)ـە، سەرۆکەو زانستگاو هەڵەبجەی واتش: هەڵەبجەو هەورامان سەرمایەی گەشتیارییەنێ و پنەوازیشان بە ئاڕاستەکەردەی و هەرمانەی جددی جەلاو حکومەتیوە هەن.
جە کێتێبخانەو زانستگاو هەڵەبجەی وۆرکشۆپێوی میاندەوڵەتیی بەنامێ (Staycation- نشینگاو گەشتیاری) ڕێکوزیا کە ئامانجش گەشەپنەدای و وەڵێوستەی پیشەسازی گەشتیارین جە پارێزگاو هەڵەبجەی و هەورامنیەنە و جە میانشەنە ژمارێوی فرێ بەشدارێ ئامادێ بیێ.
سەرەتاو وۆرکشۆپەکەی بە قسێ (مەهاباد کامل عەبدوڵا هەورامی)ۍ، سەرۆکەو زانستگاو هەڵەبجەی دەسش پنەکەرد. جە قسەکانشەنە هەورامییە واتش: هەڵەبجەو هەورامان سەرمایەی گەشتیاریىەنۍ و پنەوازیشان بە ئاڕاستەکەردەی و هەرمانەی جددی جەلاو حکومەتیوە هەن.
(مەهاباد کامل عەبدوڵا هەورامی)یە، سەرۆکەو زانستگاو هەڵەبجەی دەستنیشانش کەرد: هەڵەبجە و هەورامان جە بوارەکێ (جوگرافیایی، ژیوگەیى، ئاسەواری فەرهەنگیی، ئاینیی و تاریخ)ـەوە، زەمینەو گەشتیاری و ئەراگێڵیشان هەن و مشیۆم حکومەت پەی گەشەپنەدای و وەڵێوستەی پیشەسازی گەشتیاری پلان و بەرنامەش ببۆنە و بە بەردەوامی شۆنیەرەلوای پەی پلان و بەرنامەکەیش بکەرۆنە.
شۆنیەرە، م. ئاکۆ محەمەد تۆفیق، د. ئەسکەندەر مورادی، د. مژدە حسێنى و م. سۆران سەعید، چوون پانێلیستێ وۆرکشۆپەکەی سەبارەت بە هەمان بابەتی قسێ و باسێشان کەردێ و کەموکوڵیێ و گرفتەکێ و چارەسەریەکێشان پەی گەشەپنەدای و وەڵێوستەی پیشەسازی گەشتیاری و مەنەیۆ گەشتیاری و خەرجکەردەی پوڵی جە پارێزگاو هەڵەبجەی و هەورامانیەنە وستێ ڕووە. جەی ئی چوارچوەنە چنڎین پرۆژێشان پەی حکومەتی و سەرمایەگوزارەکان پێشنیارێ کەردێ.
