ئارۊ یەکشەممە سەرسەعبوو (٢٠٢٣/٦/٢٥) بە چەمڎاریی ڕاوەبەروو ناحیەو خورماڵی، بەشوو ڕۊشنویریی خورماڵی و ماڵپەڕوو  هەوراماننیوزی، مەراسیمێوە شکۊڎارنە و بە ئاماڎەبییەی نوێنەروو وەزیروو ڕۊشنویری و گەنجا و  جەمیل هەورامی سەرۊکوو کۊمەڵەو پێشمەرگە دێرینەکا و کەسایەتییە گەورەکاو هەورامانی و وەرپەرسە ئیداری و حیزبی و حکومییەکا، پەردە سەروو پەیکەروو کەسایەتیی دیاروو شارۊچکەو خورماڵی و هەورامانی و ئەنداموو ئەنجوومەنوو خورماڵی (شێخ قادر)ی لا دریا.

مەراسیمەکە بە دەیەقێوە مرڎای پەی گیانوو پاکوو گەشمەرڎا دەسش پەنە کەرد، هەر یۊ جە ڕاوەبەروو ناحیەی و نوێنەروو وەزیروو ڕۊشنویری و وەرپەرسوو ماڵپەڕوو هەوراماننیوزی و بنەیانەو شێخ قادڎری واچێوەشا پێشکەش کەرد و هەرمانە و چالاکییەکا شێخ قاڎریشا ورسەنگنۍ.

دماتەر پەردە سەروو پەیکەرەکەیۊ لا دریا و خەڵاتوو ئێژانەو کەسایەتی و لایەنە حیزبی و حکومییەکا بەخشیا بە شێخ قاڎری و  جە لاو بنەیانەو شێخ قاڎریچۊ خەڵات بە ڕاوەبەراو مەراسیمەکەی دریا، وەرپەرسوو ماڵپەڕوو هەوراماننیوزی ئەمین حاجی جە وتارەکەشنە واتش "مشۊم قەڎرگێرتەی گەورەکاما گنۊ سەرڎەموو زیندەییشا و وەڵی مەرڎەیشا، تا بەرهەموو خەباتەکەیشا وینا بە زینڎەیی".

شێخ قاڎر دماو سەرەوردای وەهاروو ١٩٩٢ وە بییەن بە ئەنجوومەنی جەماوەریی خورماڵی و دەگایەکاو دەورووبەریش، ماوێوەیچ هەرمانوکاروو ڕاوەبەریی ناحیەو خورماڵیش بەرڎەن ڕاوە، چا وەختۊن تا ئیسە ئەنجوومەنی میللین و خزمەت کەرۊ، چەنی هەرمانە ئیدارییەکێش بە پیایۍ سەرەڕاس و کۊمەڵایەتی ئشناسیان و دووکاندارۍ هەرزانجانوو خورماڵین و دەسنڎە و پیاوەتیش شکڵوو کەریموو عەلەکەی و گەورەپیایە بەخشنڎاو کوردین، شێخ دوکانە گولانەکەش یاگۍ ئەنجوومەنیشنەو  ساڵەو ١٩٩٢ وەن تا ئیساتۍ مۊرە پەی هەرمانە ئیدارییاو  خەڵکی کەرۊ کە پەی گرد مۊرۍ بە یاسا متاوۊ بڕی زەڕ وەرانوەرشنە ورگێرۊ وەلۍ شیخ تا ئیساتۍ یەک دینارش جە کەسی ورنەگێرتەن.

بارەو پەیکەرەکەیۊ پەیکەرساز "عومەر جەمیل" پەنەش واتیمۍ کە " ماتریاڵوو پەیکەرەکەی فایبەرگڵاسا و قەبارەکەش دووۍ مەترێن" و یاگۍ واتەینە پەیکەرەکە بە سپۊنسەری دارایی "فریا بامۊکی" کریان.

س.ز