هیتیاراو مەنتێقەکاو تۊپزاوای، داقوقی، قەرەهەنجیری، سەرگەڕانی، پەلکانەی و چنڎ دەگیوە تەروو پارێزگاو کەرکووکی، کۊنگرێوە ڕۊنامەوانیشا بەست و واتشا: "دڕێژە مڎا بە مانگێرتەی تا کێشەکاشا بەتەمامی چارە کریا، جە راو ورشانایۊ گرڎوو ئا قەراراو سەرڎەموو بەعسیوە، کە تایبەتی بێنۍ بە ئەرەگێریی خاکوو تاتەی و بابایاما".

یاگۍ واتەینە، مانگێرتەکۍ کە نوێنەرۍ هیتیاراو ناحیەو سەگەڕانی و چنڎ ناحیێوە تەریچشا چەنەنۍ، ماوەو زیاڎتەر جە ٢٥ ڕوا خەیمێوەشا سەروو ڕاو تەیارەخانەو کەرکوکینە نیێنەرە و پێسە وێشا ماچا تا ئیساتۍ بەڕسمی جوابوو دواکارییەکەیشا: کە "ورسانایۊ قەرارەکاو (ئەنجوومەنوو سەرکردایەتیی شۊڕش)وو سەرڎەموو ڕژێمی وەڵینوو بەعس"ین نەدریانۊ.

خەیمۍ مانگێرتەکا، کە هیتیارەکۍ وێشا پەنەش ماچا خێمۍ مدرامانی، دژوو هەوڵەکاو سوپاو عێراقی پەی ئەرەگێرتەی زەمینە کشتوکاڵییەکا دەسشا پا مانگێرتەیە کەرڎەن.

یاگۍ واتەینە سوپاو عێراقی گەرەکشا دەس ملوو ١٣٥ هەزار دۊنما زەمینوو هیتیاراو کوردی و تورکماناو کەرکووکیرە گێرۊ، بە بەهانۍ ئانەیۊ کە جە سەرڎەموو حوکمەتی وەڵینوو بەعسینە ئا زەمینۍ بە قەراروو (هەرمانوکاروو سەرنیشتی) سەرڎەموو بەعسینە دریێنۍ بە وەزارەتوو وەرگێریی عێراقوو ئا وەختی، هیتیارە کورد و تورکمانەکاو شارەکەی ماوەو زیاڎتەر جە ٢٥ روان ناڕەزایەتییشا دەس پەنە کەرڎەن و ئەرەگێرتەی زەمینەکاشا، جە لاو سوپاو عێراقی و عەرەبی ئامایۊ ڕەت کەراوە.

پەی وێستەیۊ چارەسەری پەی ئایندەو شارەکەیما

ڕۊو یەکشەممەی جە کۊنگرە ڕۊنامەوانییەکەنە سامی غەفوور، کە یۊن جە نوێنەروو هیتیاراو کوردی خەڵکوو تۊپزاواین، پەی دەزگایەکاو ئەرەیاونای دوا و واتش: "ئێمەی کورد و تورکمان چەنی بڕیوە چا برا عەرەبا، کە سەرڎەموو ڕژێموو بەعسینە ستەمشا وەنە کریان، ئارۊ ٢٥ ڕوێن مانما گێرتەن چی خێمێنە، خێمەکێما بیێنە یانە پەی گرڎوو ئانیشا، ڕژێموو بەعسی زوڵمش وەنە کەردێنۍ، گرڎوو چینەکاو گلێرگەی ڕوانە سەرما مدا پەی وێستەیۊ چارەی پەی ئایندەو شارەکەیما".

لایەنە شۊڤێنییەکۍ وەرانوەرماوە هەڵوێس ورگێرا

هەرپاسە سامی غەفوور ئاشکراش کەرد: "بە وێگێرتەیما تاوانما بەشێوە  جە مافەکاما وەرقەرار کەرمۍ، ئادیچ بە کاراکەرڎەی ئا قەرارەیە کەجە ساڵەو ٢٠١٢ بەرشییەن، کە قەرارەکاو سەرڎەموو بەعسی دژوو خەڵکی ڕەسەنوو شارەکەی پووچەڵ کریۊوە، ئا لایەنە شۊڤینیۍ کە ورشانایۊ قەرارەکاو بەعسی نییەنۍ بەرژەوەنڎیشانە، چنڎین هەڵوێسێشا بە بەیاننامە بەرێوستێنێ".

خیمەکێما چۊڵە مەکەرمۍ تا ورشانایۊ قەرارەکاو بەعسی

 هیتیارە کورڎەکەو شاروو کەرکووکی واتیچش: "ئێمە مەبۊ خێمەکێما چۊڵە کەرمۍ و چونکوم ئانە کە مەنەن فرە گرنگا، ئاڎیچ ورشانایۊ قەرارەکاو (ئەنجوومەنوو سەرکردایەتیی شۊرش)وو سەرڎەموو ڕژێموو بەعسی دلێنەشییەین، ئانەیجە پەنەوازییش بە کۊکەرڎەیۊ دەنگین جە ئەنجوومەنوو نوێنەراو عێراقینە کە بە کۊو دەنگی قەرار مڎریۊ بە ورشانایۊ تەماموو قەرارەکاو ڕژێموو بەعسی دژ بە خەڵکی ڕەسەنوو شارەکەی".

قەرارەکاو بەعسی ماوەو ٥٠ ساڵان بیێنۍ بە تەوقۍ گەرڎەنماوە

جە ئاخیرۊ سامی غەفوور هیتیاروو تۊپزاوای جە ڕاو دەزگایەکاو ئەرەیاونایۊ، داواێوەش ئاراستەو گرڎ لاێوە کەرڎە و واتش: "تا بتاومۍ بەئازادی سەروو زەمینەکاماوە بژیومۍ، هومیدەوارێنمۍ گرڎ لایوە یارڎەیما دەیدۍ تا ڕزگاربییەیما چا قەراراو بەعسی، کە ماوەو ٥٠ ساڵان بیێنۍ بە تەوقە پەی گەرڎەنوو کوردی و تورکماناو شارەکەی".

س.ز