بە پاو هەواڵێوی کۆڵبەرنیوزی ڕۆو چوارشەممەی هێزە ئەمنییەکاو ورمێ بە ژمارێوی فرە سەیاراوە، ورشا کوان سەروو دەگاو عەبدی بەیگوو سۆمابرادۆستوو ئا شارەیە و کەوتێنێ وشکنای و ماڕای بەرەو یانا و  گێرتەی کەلوپەلی و دارایی بەشێو جە ئەرەنیشتاو دەگێکێ.  

حەر جە هجوومەکەنە پیاێوی ٦٠ ساڵە بە نامێ سەید زاهد موسەوی خەڵکوو دەگاو عەبدی بەیگی گیریا و فاڕیاوە پەی یاگێوی نادیاری.

هەڵای مەڵامەتوو گێرتەی و ئا تۆمەتا ڕووبەڕوو ئا هاموەڵاتەیە کریێنیوە، نەئەرەیاونیێنێ.

هەمان ڕۆ سەلاح سوڵتانی خەڵکوو دەگاو سەروکانی و ئەمیر فەقێ خەڵکوو دەگاو خورنجێ سەر بە شاروو پیرانشاری هێزە ئەمنییەکاو ئا شارەیە گێرتێنێ و پەی یاگێوی نادیاری بریێنێ.

هێزە ئەمنییەکێ بە بێ وستەیڕووەو قەراروو دادگای ئا هاموەڵاتێشا گێرتێنێ و هەڵای سەبەبوو گێرتەی، یاگێ گێرتەی و تۆمەتەکێشا، نەزانیێنێ.

 مانگەو ئاداروو ئێساڵیوە هەڵمەتەو کۆگێریی چالاکا و هاموەڵاتاو وەرکەوتوو کوردستانی هەس بییەنۆ و بە پاو ئامارێوی تۆڕەو مافەکاو ئینسانوو کوردستانی تەنیا بەینوو ٢١و ئاداری تا ٢١و نیسانینە (مانگەو خاکەلێوە)ی لاو کەمیوە ٣٦ چالاکێ و هاموەڵاتێ، بەینوو ٢١وو نیسانی و ٢١و ئایاری (مانگەو بانەمەڕی) ٧٢ چالاکێ، هونەرمەندێ و هاموەڵاتێ هێزە ئەمنییەکاو دەوڵەتوو ئێرانی گێرتێنێ.