هونەرمەند هۊزان دیار داوێوەش ئاڕاستەو گەلوو کوردی، بەتایبەتی هونەرمەندا و ڕۊشنویراو کوردی کەرڎە و واتش: "بە هەڵوێستێوە کورڎەوارییانە متاومۍ ڕاگێری جە خیانەتوو پەدەکەی کەرمۍ و بێهێزش کەرمۍ. نمازمۍ کەس گەمە بە چارەنویسماوە کەرۊ".
ناڕەزایەتییەکۍ دژوو جەنگی کورڎساننە بەرڎەوامێنۍ، کە لاو دەوڵەتوو تورکیوە و بە هامکاریی پەدەکەی کریا. هونەرمەند هۊزان دیار سەرنجەش پەی خەتەو خیانەتوو پەدەکەی کێشنا و داواو هەڵوێستیش کەرڎە.
هۊزان دیار بەتایبەتی داواش وەنەو خەڵکوو پانیشتوو کورڎسانی کەرڎە و ویرش وستێوە، کە ئادی ئینۍ سەرڎەمێوە تاریخینە و واتش: " تەرسیوە چانێنە کە هامشێوەش جە سەدەی وەڵینەنە کریا، دوژمناو گەلەکەیما گەرەکشانە گەمە بە چارەنویسوو گەلەکەیمان کەرا، ئێمە کەرا بە کۊیلە، کورڎسانی پارچە کەرا، پێسە ئاغایەکا وێشا ملمارە سەپنا".
'مشۊم گردلایۍ دژوو هجوومەکا هەڵوێست نیشانە بدا'
هۊزان دیار بارەو هجوومەکاوە پەنجێش پەی تەرسەکا کێشنا و واتش: "پێسە وەڵاتپارێزنێوە، هونەرمەندێوە گەلوو کوردی، تەرسێوە گەورۍ وینوو و گەرەکما دەسش وزوو سەر. ئێمە هونەرمەندێنمۍ، گەرەکمانە بە هونەرەکەیما بلمۍ وەرڎەموو گەلی، وەلۍ دۊخی سیاسیی کورڎسانی، ئا کرڎەواو دەوڵەتوو تورکی چەنی هامکارەکاش کە کورڎساننە کەراشا، پاسە کەرۊ کە گرد وەڵاتپارێزنێوە ساعیب ویژدان، هونەرمەند، ڕۊشنویر، گرد کەسێوە ساعیب ویژدان ناچار بۊ هەڵوێست ورگێرۊ".
'گەرەکشانە دەسکەوتەکا کورڎساننە دلێنە بەرا'
هۊزان دیار واتیچش: دەوڵەتوو تورکی پانیشتوو کورڎسانینە ڕاو سوپاکێشۊ، میتیوە، سیخوڕەکاشۊ گەرەکشا کوردی ڕێخەوە بارۊ و گرد یاگێوەنە دەسکەوتەکاو کورڎسانی دلێنە بەرۊ و واتیچش ، " پەی ماوەو سەد ساڵا ئینە یۊ جە ئامانجە سەرەکییەکاو دەوڵەتی تورکین. ئێمە دوژمنەکەیما خاس مشناسمۍ، پێویسا گردوو واڵە و براکاما ئی دوژمنە ونمجەیە خاس بشناسا. دەوڵەتوو تورکی دەیان بنکۍ سەروازیێش وەشۍ کەرڎێنۍ و پانیشتوو کورڎسانیش گێرتەن. پانیشتوو کورڎسانیش کەرڎەن پێسە پارێزگێوە دەوڵەتوو تورکی. بە کولتوور، سوپا، میت و هتد ئینا جموجووڵێوە گەورەنە. ئینە پەی گەلوو کوردی یاگۍ شەرمەزاریین. چێروو ستەموو سوپاو سەدامینە بە ونەو هەزاران گەشمەرڎا خاکوو پانیشتوو کورڎسانی ئازاد کریا، وەلۍ بەداخۊ ئیساتۍ پێشکەشوو قاچەکاو سوپاو تورکی کرییۊ، ئینە پەی ئێمە شەرمەزاریێوە گەورەن".
'مشۊم پەدەکە واز جە خەتەو خیانەتی بارۊ'
هونەرمەند هۊزان دیار واتیچش، پەدەکە هامکاریی دوژمناو کوردی کەرۊ و ئامانجیچش گەریلاکاو ئازادیی کورڎسانینۍ. جەختیچش کەرڎۊ، "مشۊم واز چی خەتەو خیانەتییە بارا، من گەرەکم بۍ نۊعێوە تەر واچووش، وەلۍ خیانەت خیانەتا، بە نۊعێوە تەر مەوچییۊ. هونەرمەنداو کورڎسانی، بەتایبەتی هونەرمەندۍ و ڕۊشنویرۍ پانیشتی، پێشمەرگۍ کورڎسانی، ئا خەتەو خیانەتی کە کورڎساننە هەنە، بە نامۍ شمەوە کرییۊ ڕاش مەدەیدۍ پەنە. ئێمە متاومۍ خیانەتی مردنمۍ، ئانە کە گەرەکشانە گورزەش بدا وەنە گەریلاکاو ئازادیی کورڎسانینۍ، ئادۍ تەنیا گەریلاو یەک پارچەی نییەنۍ، ئا گەریلاێنۍ پەی ئازادیی چوار پارچەو کورڎسانی کۊشییا.
'دەتوانین ئەم خیانەتە راوەستێنین'
هۊزان دیار درێژەو قسەکاشنە واتش: واتێوە وەڵینا هەنە بارەو دوژمنیوە، کە ماچۊ "ئادۍ نانوو بەیانی با، شمە پارشەو بیدێ". ئینە دۊخێوە ئاسایی دوژمناو گەلوو کوردین، هەمیشە تارێخەنە ئا هەرمانێشا کارەیان کەرڎێنە. مەبۊ جارێوە تەر گنمۍ دلۍ ئی دامێوە. مشۊم جە وەرموو بێئاگایی هۊشیارۍ بیمێوە. متاومۍ ئی خیانەتەیە مردنمۍ.
واتیچش: جیاوازیی بەینوو ئەرڎۊغانی و سەدامی چێشا؟ جیاوازیی بەینوو هاکان فیدانی و عەلی کیمیایی، کە وەرپەرسوو کیمیاوارانکەرڎەی هەڵەبجەیی؟ هەرمانبەدەساو پەدەکەی کە بەگەرمی گێراشا باوشی، پێویسا ویرۍ چی بابەتەیە کەراوە. شەرمەزاریین، ئەدایاو گەریلای و ئەدایاو کورڎسانی عەزیەت مدا. شه‌رما!
جەختیچش کەرڎۊ، ئەگەر پەشتیوانی وەنەو گەریلاکاو ئازادیی کورڎسانیچ نەکەرا، مەبۊ ڕا پی سیخوڕەیە بدا، ڕا بە دەوڵەتی و سوپاو تورکی بدا. گەمە بە چارەنویسوو گەلەکەیمان کەرا. گەریلاکاو ئازادیی کورڎسانی پەی ژیواێوە شکۊمەندانەی وێشا کەرا فیداو ئێمە. ئادۍ واڵە و برامانۍ. چەنی تاوا ڕا پەی دەوڵەتوو تورکی وەش کەرا و پاڵپەشتیی لۊجستیکییش کەرا، تا بتاوا وەرەچەماماوە گەلەکەیما کۊکوش کەرا؟ ئینەیچە قبوڵکریا نییا. ئانە مایۍ قبووڵکەرڎەی نییەنە. نامۍ ئانەیچە خیانەتا.
واتیچش، ئی جەنگە بەینوو گەلوو کوردی و دوژمناشنە ڕووە مدۊ. جەنگوو بەینوو گەریلای و دەوڵەتوو تورکین. نامێوە تەرەش نییەنە، پێناسەکەرڎەی ئینەیە بە کەلیمۍ 'براکوشی' ڕاستەوخۊ یا ناڕاستەوخۊ هامکاریکەرڎەین جە خیانەتنە".
هۊزان دیارئاخرۊ داوێوە چینێش کەرڎە: "پێسە هونەرمەندێوە وڵاتپارێزنی داوا وەنەو گردوو هونەرمەندا، ڕۊشنویرا کەروو: دەنگوو وێشا بەرز کەراوە. ئێمەی وەڵاتپارێزنا بە هەڵوێستێوە کورڎەوارییانە متاومۍ خیانەتی مردنمۍ و بێقوەش کەرمۍ. ڕا مەدەیمۍ کەس گەمە بە چارەنویسیماوە کەرۊ. ئا هێزەما هەن، متاومۍ وەر بە خیانەتی گێرمۍ. مرۊ خیانەت. بژیوۊ کورڎسان. بژیوا کورڎۍ وێگیرۍ و شکۊمەندێ".
س.ز
