بەپاو ئامارەکا ئەنجوومەن و سڵامەتی و ئاسایش و هەرمانۍ(ئیسیگ)، جە ماوەو ٩ ساڵانە ١٧ هەزارۍ و ٦٩١ کرېکارۍ تورکیانە جە وەختوو هەرمان کەرڎەینە گیانشا جە دەسدان. فرەیی ئا کرېکارا کورڎۍ بیېنۍ.
جە ماوەو دەسەڵاڎداری ئاکەپەینە سیاسەتەکۍ فشاری دژ بە کرېکارا ۋەردەوامېنۍ و کرېکارۍ ناچارۍ بیېنۍ بەکەمتەرین مەعاش هەرمانەکەرا و جە مافەکاشا مەحروومۍ کریېنۍ. بەپاو گوزارشتەکا ئەنجومەن و سڵامەتی و ئاسایش و هەرمانۍ(ئیسیگ)، جە بەینوو ساڵەکا ٢٠١٤ی پۍ ٢٠٢٢ لاو کەمیۊ ١٧ هەزارۍ و ٦٩١ کرېکارا جە وەختوو هەرمانکەرڎەینە گیانشا جە دەسدان.
فرەیی ئا کرېکارا گیانشا جە دەسدان، جە بواروو بیناسازینە هەرمانەشا کەرڎېنە و دماو ئانەیچ بەپلەی دووەم کەرتی کشتوکاڵی فەسڵش دەسپنە کەرۊ کە فرەتەرین کرېکارۍ چنەشەنە با بە قوربانی.
فرەیی ئا کرېکارا جە شارەکا تورکیاینە گیانشا جە دەسدان کورڎېنۍ، ئینە جیا چانەی جە ماوەو ئا ٩ ساڵەینە جە شارەکا سەرنیشتوو کورڎسانیچ ٢ هەزارۍ و ٥٣٨ کرېکارۍ گیانشا جە دەسدان، کە فرەیشا جە بواروو کشتوکاڵینە هەرمانەشا کەرڎېنە.
حاسڵ نەکەردەی شەرتەکا سڵامەتی هەرمانۍ جە لایەنوو خۊتان هەرمانۍ و وەبەرئاوەراوە، بەمەڵامەتوو سەرەکی مەرڎەی جە یاگۍ هەرمانېنە منریۊرە.
