سەرسەبای چوارشەممەی 10\02\2021ی، جە زەمین و ئاسمانەوە سوپا ڕژێمە ئەرەگێر و دژە کوردەکەو تورکیای، یورش و پەلاماردایش دژ بە پانیشتو کوردستانی دەستپنە کەردەوە و ئی جارە یوتەر جە هەرێمەکانو پارێزنانی میدیای یانی هەرێمو 'گارە'ش کەرد ئامانج. جە وەرانوەرەنە گەریلاکێ ئازادی بە توندی ڕووبەڕووێشان بیێنێوە و گورزی قورسشان دێنێ ونە.

''ئامانج جە یورش و پەلامارداکەی''

سەرەتا ڕژێمە چەتەگەریەکەو تورکیا و سەرچەتەکەش ئەردۆغان بڕیارش دابێ کە شەنگالی بکەرانێ ئامانج و واتەبێشان: "شەوێوە بدێمی سەرو شەنگالیەرە". بەڵام ئانەشان نەکەرد و جە جیاتی شەنگالی داشا سەرو 'گارە'یەرە. کەردە دوژمانکاریەکەو تورکیای دژ بە گارە'ی هۆرسەنگایێ جیا جیێش پەی مەکریۆن و شارەزێ بوارەکەی پەیلوایشان ئانەن کە یەکەم: 'تورکیا توانایی پەلاماردایش شەنگالیش نییەن'، پەوکەی پەی پەردەپۆشکەردەی ئانەیە و پارێزنانی ئاوڕوو ئەردۆغانی کە واتەبێش: "شەوێوە بدێمی سەرو شەنگالیەرە"، پەنەوازیش بە کەردێوی سەربازی بێنە. دووەم: ئەردۆغان و ڕژێمەکەش بە ئا ئۆمێدە کە ئەگەر گارە'نە سەرکەوتێ ببانێ، ئا وەختە ورە و هازی بە سوپا و هێزەکانشان ببەخشانێ تا ئاسان تەر یورش بکەرانێ سەرو شەنگالی. یەرەم: جە ئەرەگێرەتەی گارە'یەنە دەستکەوتێ گەورێ سەربازیێ وەرچەم گیریێ بێنێ چوون، 'دەستگیرکەردەی چەندین سەرکردێ و فەرماندێ پەکەکەی و گەریلای و ئازادکەردەی دیلەکێ تورکیا بە تایبەتی 'میت'ـە دیلەکێ کە ئینێ جە کامپەکانو گارە'یەنە. هەر پەوکەی ئەردۆغان هیوای فەرەش سەرو پەلامارداکەی هۆرچنیەبێ و سەرو ئا بنەمایە واتەبێش: "چوارشەممە نیزانی و پەیام و هەواڵی گرنگمان هەن".

"دوژمن ئامانجش نەپێکا و جە سەرەتاوە گەریلای شکست دا"

بەڵام هەر جە یەکەم ساتەوەختو پەلاماردای هەرێمو 'گارە'یەنە کە ڕژێمەکەو ئەردۆغانی بە حساب پیلانی هێقمێش پەی ئەرەگێرەتەیش متەبێرە و ئومێد و هیوای فرەش سەرەوە هۆرچنیەبێ، گەریلاکێ هێزەکێ پارێزنانی گەلی- 'هەپەگە' و یەکینەکێ ژەنێ ئازادێ- 'یەژاستار'ی ڕێسەکەشان جە دوژمنی کەردەوە بە پەژم و سەرجەم پیلانێ و هیواکێ ئەردۆغانی و سوپاکەیشان مایەپووچێ کەردێوە. دوژمن سەرەتا بە باڵەپڕێ و هەلیکۆپەرێ 'چەرباڵێ' جەنگیێ هەرێمەکەش بە چڕی و قورسی بۆردمان کەردەبێ. دماتەر بە هەلیکۆپتەرێ کۆبرێ و سکۆرسکیێ هێزشان جە چەند دەڤەرێنە وەزنابێرە. سەرچەمە سەربازیەکێ باس جە بەشداربییەی زیاتەر جە 2500 دوێ هەزارێ و پەنجسەد فەرماندێ و پلەدارێ و ئەندامێ هێزە تایبەتەکانو سوپاو تورکیای جە پەلاماردایەکەنە مەکەرانێ کە جە بەهێزتەرین و پۆشتەوپەرختەرین هێزەکانو دوژمنیەنێ و وەڵکەوتەتەرین چەک و تفاق و تەکنەلۆژی سەربازیشان وەردەدەستەنە بییەن و جە زەمین و ئاسمانەوە بە باڵەپڕێ و کۆپتەرێ کۆبرێ و سکۆرسکیێ و ڕادارێ و تەنانەت مانگێ دەستکەردێ پەشتیوانی کریێنێ. ئانە با پەشتیوانی و چەمساخی لۆجستی پەدەکەی بمدرۆنە پەیشان. بەڵام سەرجەم ئانێ فریاشان نەکەوتێ و نەبیێ بە ئامڕازێ پەی پێکای ئامانجی و واوای بە سەرکەوتەی. جە وەرانوەرەنە گەریلاکێ ئازادی کە خاوەن سادەتەرین چەک و تفاقی سەربازیەنێ، بەباوەڕ بەوێ بییەی گەورە گورزی قورسشان جە هێزە پۆشتەوپەرداخەکەو تورکیای دا و ڕووبەڕووێ شکستی قورسیشان کەردێنێوە.

"زیانەکێ دوژمنی"

هەرپاسە کە باسش کریا، گەریلاکێ ئازادی هەر جە سەرەتاوە بە توندی ڕووبەڕووێ دوژمنی بیێنێوە و گورزی قورسشان ونەدێنێ و چەندین پلەدارێ و فەرماندێ و دەیان سەربازێ سوپا ئەرەگێرەکەو تورکیاشان سزێ دێنێ کە ڕژێم دزانش نیان کوشیا و برینداربییەی چەندین پلەدارێ و سەربازەکانشەرە.
جە ئی بارەوە هێزەکێ پاێزنای گەلی- هەپەگە ئەرەیاونای لەشکریش دان و جە میانشەنە ئی زانیاریێشە دێنێ: "سەرسەبای 10و ئی مانگێ هێزەکێ ڕژێمو تورکیای یورششان کەردەن سەرو دەڤەرو سیانی سەر بە هەرێمو 'گارە'ی و جە ئاکامشەنە میانو سوپا ئەرەگێرەکەو تورکیای و گەریلاکێ ئازادییەنە جەنگ و ڕووبەڕووبییەی قورس ڕووەشدان. جە جەنگ و ڕووبەڕووبییەکەنە گەریلا گورزی قورسش جە دوژمنی دان. هامکات ئا سەربازێ کە بە کۆپتەرێ وەزنیێبێنەرە، گەریلای گەمارۆ دێنێ. دەرنجام دەیان پلەدارێ و فەرماندێ و دەیان سەربازێ دوژمنی کوشیێنێ کە جە ئایندەی نزیکەنە جە ئی بارەوە وردەکاریێ و زانیاریێ پەی ڕاو گردینی ئاشکرێ مەکەرمێنە. دوژمن پەی قەرەبووکەردەی شکستەکەیش، بەبەردەوامی دەگایەکێ هەرێمەکەی بۆردومان مەکەرۆنە، بەتایبەتی ئا کامپێشە کەردێنێ ئامانج کە سەربازێ و کاربەدەستە میتە دیلەکێشان چنەنێ".

"قسەکێ خلوسی ئاکاری دوورێنێ جە ڕاستییەوە و پڕوپاگەندێنێ"

هەپەگە سەرنجش وسەتەن سەرو جەنگی تایبەتی و دەروونی کە ڕژێمو تورکیای دژ بە جەمیەری ئازادی و گەریلای ئەنجامش مدۆنە و جە ئی بارەوە ئاشکراش کەردەن: "دوژمن هەوڵشدان جە دەڤەرەکێ ئەرگەنێ و سیانێ یاگەگیرێ ببانێ و جە ئاگەوە ناوچەکەرە وەڵاوێ ببانێوە، بەڵام هەوڵەکەشان ناکام کریا و گەریلاکێ ئازادی دەمودەست دێنێشان ونە و شکستشان دێنێ و دوژمن کوشتێ و بریندارێ فرێش دێنێ. بەڵام خلوسی ئاکار وەزیرو جەنگو تورکیای بانگەشەش کەردەن، گوایا 3 پلەدارێشان کوشیێنێ و 4ی تەرێ بریندارێ بیێنێ. ئانە دوورەن جە ڕاستیەوە. چونکە دوژمن زیاتەر جە 30 کوشتێش دێنێ و هێزەکەشان جە گارە وەزنانشارە گەمارۆ دریان و جە ژڵێویای وزیان. قسەکێ خلوسی ئاکاری بەتەمامی پڕوپاگەندێنێ و پەی پەردەپۆش کەردەی شکستەکەیشانە جە گارە."

"ئیبراهیم پارم وەڵتەر تەسلیم بییەنەوە"

هەپەگە سەبارەت بە کەسێوی بەنامێ 'ئیبراهیم پارم'ی کە دوژمن بانگەشەش کەردەن، گوایا سەرکردەو لۆجستی پەکەکەی بییەن و جە گارە دەستگیرشان کەردەن دەستنیشان کەردەن: "ئا کەسە وەڵەتەر جە ڕێکوزیاکانمانە بەرکریان و تەسلیم بە دوژمنی بییەنەوە و هیچ پەیوەندیێوش بە پەکەکە'یەوە نییەن. ئا جۆرە هەواڵی جەنگی تایبەت و دەروونییەن کە دژ بە جمیەری ئازادی مەبریۆنەڕاوە''.

"پەدەکە ڕاستە ڕاست بەشدار نەبییەن بەڵام"

هەپەگە سەبارەت بە بەشداری پەدەکە'ی جە پەلاماردای گارە'یەنە ئاشکراش کەردەن: "هیچ ئاماژێو پەی بەشداری پەدەکەی جە پەلاماردای و جەنگەکەیەنە نییەن. سوپاو تورکیای جە شرناخەوە شییەن باشیک و جە ئاگێچەوە هێزەکێش فاڕێنێوە شارچەو باکرمانی سەربە ئاکرێی. جە باکرمانەوە سەرپەرستی پەلاماردای گارەی کریان و ناوچەکە سنورو دەسەڵاتداری پەدەکە'یەن و ئا پارتە کاروەدای و ناڕەزایەتیش دژش نیشانە نەدان.

"گەریلا باڵا دەستەن"

هەم هەپەگە و هەم سەرچەمە هەرێمیەکێ ئاشکراشان کەردەن: ''جە جەنگەکەنە کە نزیک بە 3 شەوانە ڕوێن بە دژواری بەردەوامەن، گەریلاکێ هەپەگە'ی باڵا دەستێنێ و نەک هەر سوپاو تورکیای شکست دریان، بەڵکو ئا هێزێ کە جە ناوچەکەنە وەزنیێرە گەریلای گەمارۆ دێنێ و ڕاو دەربازبییەشان فرە ئاستەمەن".

"گارە خاڵەو هۆرچەخیایەنە"

شارەزێ بواری سەربازی ئینێ جە ئا باوەڕەنە کە "شکستدای تورکیا جە گارە، مەبۆنە خاڵەو هۆرچەخیای و فاڕیای گەورە شونەو وێشەرە باوەرۆنە و ببۆنە بەسەرەتا پەی دمایی ئاوماو هەژەموون و کاریگەری تورکیای و ڕژێمەکەو ئەردۆغانی جە هەرێمەکەنە". پەی پەشتڕاستکەردەی ئانەیە دمایین قسەکێ خلوسی ئاکار وەزیرو جەنگو ڕژێمی بە نمونە ماوەرانێوە کە جە میانشانە ئامادەییش نیشانەدابێ ڕژێمەکەش دەستبەردارو سیستەمی موشەکی ئێس 400ی ڕووسی ببۆنە بە ئا مەرجە ئەمەریکا سەبارەت بە ڕۆژاڤاو کوردستانی و جەمیەرو ئازادی کوردی سەودا و مامەڵە و بازاریشان چەنی بکەرۆنە. ڕژێمو ئەردۆغانی وەڵێ شکستەکەو گارەی هەرگیز ئامادە نەبێ باس جە وازئاوردەی جە ئێس 400 ڕوسی بکریۆنە و کاربەدەستێ ئا ڕژێمەیە هەمیشە باس جە سوربییەی سەرو سیستەمەکەی مەکەرێنێ و چوون هەڕەشێوە وەرانوەر بە ئەمەریکای و ئەورووپای و ناتۆی بەکارش مەبەرێنێ".