جە مانگەو خەرمانانی (٢١و ئابی تا ٢٢ۍ ئەیلول)ی لاوکەمیۊ ١٦٢ کەسۍ جە ۋەرکەوتوو کوردسانی گیریېنۍ، حەر چا مانگېنە ٢ ۍ کاسبکارۍ کوشیېنۍ و شش کۆڵبەرېچ زامڎارۍ کریېنۍ و چوار زینڎانیۍ کوردیچ دریېنۍ قەنارە
تۆڕەو مافەکا مرۆڤوو کوردسانی ئامارەو پاشێلکارییەکا مافەکا مرۆڤیش جە ماوەو مانگەو خەرمانان و ئېساڵی جە ۋەرکەوتوو کوردسانی ۋەڵاکەرڎۊ.
مانگەو خەرمانانی بەمەڵامەتوو ئانەی ساڵیاڎوو کوشتەی ژینا ئەمینیۍ و دەسپنەکەرڎەو سەرهۊردای ژەنۍ، ژیای، ئازاڎیی کەوتەبۍ ئا مانگېوە، چنەشەنە فشار و هەڕەشەکۍ هێزەکا دەوڵەتی ۋەران ۋەر بە چالاکا و خانەواڎەو گیانبەخشایا سەرهۊرداکەی یاۋا بە بەرزتەرین ئاست.
پېسە جە ئامارەکېنە ئامان جە مانگەو خەرمانانینە زیاڎ جە ٥٠٠ چالاکا سیاسی و مەڎەنی جەتەرەفوو ئیتلاعاتی و سوپاو پاسدارا و فەرمانگە و ئیلاعاتیوە چڕیېبێنۍ و هەڕەشېشا ۋنە کریېبۍ کە بەحیچ جۆرۍ بەشڎاری جە مەراسیمەکا یاڎکەرڎەیۊ ساڵیاڎوو سەرهۊرداکەی و یووەم ساڵەو گیانبەخشای ۋېنیشاندەرانە نەکەرا.
هەمان ئا فشارۍ وزیۍ سەروو خانەواڎەو گیانبەخشایا و پەی ڕا گېرتەی جە ڕاوەبەردەی ساڵیاڎوو کوشیای ئازیزاشانە فشارشا وزیابۍ سەر و بەشێچشا گیریېبێنۍ.
پېسە جە مژارەکۍ تۆڕەو مافەکا مرۆڤوو کوردسانینە ئامان، جە ٢٥و خەرمانانی (١٦و ئەیلول)ی کە هاموەخت بۍ چنی یووەم ساڵیاڎوو کوشتەی ژینا ئەمینیۍ جە تەرەفوو هێزەکا دەوڵەتوو ئێرانی و دەسپنەکەرڎەو سەرهۊردای "ژەنۍ، ژیای، ئازاڎیی" هێزەکۍ دەوڵەتوو ئێرانی جە شاروو سەقزی شاروو ژینۍ بەمەبەسوو ڕاگېرتەی جە گرڎ جۆرە مەراسیمێوە قەبرسان و ئایچیی و دەوروبەروو یانەو ژینېشا تەوقەدا و پۍ ماوېوەیچ ئەمجەد ئەمینیشا گېرت.
هەمان ڕۊ نزیک بە قەبرسان و ئایچی کە قەبرەو ژینا ئەمینیېش ئینا چەنە و بە زریپۆش تەوقەدریابۍ، هێزەکۍ سوپاو پاسدارا تەقەشا جە گەنجێوە خۊتان پەنەوازی تایبەتی بە نامۍ فەردین جەعفەری کەرڎ، کە تائیسەیچ ئینا ئاژەو کۆماینە، حەر چا ڕووەنە جە سنە و مەهابادیچ دووۍ کەسۍ بە تەقەو هێزەکا سوپاو پاسدارا زامڎارۍ کریۍ.
جە درێژەو ئامارۍ و مژارەکېنە ئامان، جە مانگەو خەرمانانینە ١٦٢ چالاکۍ و کورڎۍ جە پاڕێزگاکا ورمێ، سنە، کرماشان، ئیلام و تارانینە بە تۆمەتەو چالاکی سیاسی گیریېنۍ. جە کۆو گیریایەکا ٦ کەسېشا پۍ ۋیەرناو ماوەو سزاکېشا رەوانەو زینڎانی کریېنۍ.، حەرپاسە ١٤ گیریۍ تەریچشا بە نیایرەی بارمتەی بە شێۋېوە وەختی ئازاڎ کریېنۍ، ئەوۍ تەرۍ تائیسە دەسبەسەرېنۍ و جەبارەو چارەنۋیسوو بڕېچشاوە حیچ زانیاریېوە وەردەس نییا.
حەر جە مانگەو خەرمانانینە ١٩ هامووڵاتیۍ و چالاکۍ مەڎەنیۍ کورڎی جە تەرەفوو داڎگاکا شۆڕشی و داڎگا گردینەییەکاوە جە شارەکا تاران، سەقز، سنە، پیرانشار و مەهابادی سزا و زینڎانیشا سەرەرە سەپیان.
ئانەیچ وزیان ڕووە کە چا مانگېنە سزاو جە قەنارەدای سەروو چوار کورڎارە جە زینڎانەکا قزل حیساری کەرەجی و سەقزینە جابەجۍ کریان، کە ئا کەسۍ تۆمەتەو کوشتەی ئەنقەسی و تاوانەکا پەیوەس بە ماددە هۆشبەرەکاشا رووبەڕوو کریابېوە.
کاسبکارێوە خەڵکوو جوانڕۆی بە نامۍ پویا بابایی کە بە گومانەو بە قاچاخبەرڎەی کاڵا و کەلوپەلی گیریابۍ، جە ئاکاموو ئەشکەنجەدای دلۍ بنکەو پۆلیسینە جە کرماشان گیانش جەدەسدا. جە پارێزگاو ئەلبورزیچ بەتەقەو هێزەکا پۆلیسی کاسبکارێوە خەڵکوو شابادی بەنامۍ حامد باقری کوشیا، حەر چا مانگېنە شش کۆڵبەرېچ بە تەقەی راسەوخۆو هێزەکا دەوڵەتی جە مەنتیقە سنوریەکا بانەی، سەردەشتی و چاڵدېرانینە زامڎارۍ بیۍ.
بەشێوە تەروو ئامارەکۍ تەرخان کریان بە تنووتیژی ۋەران ۋەر بە ژەنا و ئەرەیاۋیان کە چا مانگېنە لاو کەمیۊ ٢ ژەنۍ جە شارەکا ڕوانسەر و سەرپێڵی جە تەرەفوو ئەنڎاما خانەواڎەکاشاوە کوشیېنۍ.
جە ئاخر بەش و ئامارەکېنە لایۍ جە ئاژەو کرێکارا و مەیسەرنەکەرڎەی شەرتەکا سڵامەتی جە یاگۍ هەرمانېنە کریانۊ و چا بارۊ باس چانەی کریان کە لاو کەمیۊ شش کرێکارۍ بە مەڵامەتوو ڕووەدایەکا یاگۍ هەرمانېوە جە شارەکا سنە، پیرانشار، بانە، بۆکان و مەهابادی گیانشا جە دەسدان.
