نەوەشی شێرپەنجە 'سەرەتان'ی کە وەڵتەر جە پاوە و هەورامانەنە فەرە دەگمەن بییەن و کەمەتەر خەڵک تووشش بییەن، بەڵام ئارۆ بییەن بە یۆ جە ئا نەوەشیا کە ڕۆج بە ڕۆج هاوموڵاتیێ زیاتەرێ تووشێش مەبانێ.
بە پاو ئامارێ کە کۆمسیۆنو پزشکی سەر بە ئەنجومەنو ئەیتامی جە شارو پاوەی وەڵاوشکەردەنەوە، تەنها جە شارستانو پاوە'یەنە 400 هاموڵاتیێ هەورامیێ تووشێ نەوەشی شێرپەنجەی بینێ. 
هاموەخت باس جە ئانەی مەکریۆن کە جە شارستانەکێ هەرێمو هەورامانات'یەنە "جوانڕۆ، سەلاس و باوەجانی، ڕەوانسەر و پاوە" نزیک 1500هەزار و پەنجسەد هاوڵاتیێ شێرپەنجە'شان هەن و پنەوزایشان بە نەوەشخانەی و چەمداری پزشکی تایبەت بە نەوەشیەکەی هەن. بەڵام نەوەشخانێوی تایبەت بە نەوەشیەکەی جە هەرێمەکەنە نییەن و نەوەشخانەکێ تەرێ هەرێمەکەی توانایی و ئامادەیی چارەسەری ئا جۆرە نەوەشیەیشان نییەن و نەوەشێ هەورامانی پەی چارەسەری ناچارێنێ سەردانی شارە دوورە دەستەکێ ئێرانی بکەرانێ. هاوەخت دەوڵەت و کاربەدەستێ و سازییە تەندروستییەکێ ئێرانی جە ئی بوارەنە کەمتەرغەمێنێ و بە ئەرک و وەرپەرسیاری وێشان هۆرنمەئێزانێ. هەر پەوکەی ئەنجومەنێ و کەسانێ خێرمەندێ و خێروازێ هەورامانی بەشێ جە ئا ئەرک و وەرپەرسیارییەشانە گێرتەن سەرو وێشان.
جە ئی چوارەچوەنە خێروازێوی پاوەیی ئەرەنیشتەو کرماشانی 50 ملیۆن تومانێش بەخشان بە ئەنجومەنو ئەیتامی جە پاوە و ئەنجومەنەکە ئا بڕە پوڵەشە یاونان 36 نەوەشێ شێرپەنجەی کە فرەتەرین پنەوازیشان بە هامکاری هەن.
ئەنجومەنو ئەیتامی نزیک بە 10 ساڵێن مەرزنیارنەرە و ژمارێو کەسایەتیێ خێرمەندێ و خێروازێ هەورامانی وێبەخشانە مەبەرانێش ڕاوە و جە فرە بوارێنە خزمەت بە هەورامانی و هەورامیەکان مەکەرانێ.