جە پاوە بەشداری یانەو ژەناو هەورامانی زاگرۆسانە ئەنجامدریا

جە شارو پاوەی یانەو ژەناو هەورامانی بەشداریش کەرد و ئاشکراش کەرد: بەشداری کەردەی جە زاگرۆسانەنە ئەرکی نیشتمانییەن.

جە شار و پاوەی و دەوروبەریشەنە،  هەڵمەتو ژیوگەپارێزی "زاگرۆسانە"ی بەبەشداری ڕێکوزیا مەدەنیێ و ژیوگەپارێزیەکانو ئا شارەیە ڕێکوزیا. جە هەڵمەتەکەنە یانەو ژەناو هەورامانی بەشداری چالاکش کەرد. جە ئی هەڵمەتەنە کە بنکەو ژیوای و قەڵەمی هامچەرخو کوردی و گروپو کەشەوانی پاوەی و هاووڵاتیێ هەرێمەکەی بەشدارێ بێنێ، جە دارستانو ڕاگاو کەلو هەڵەویاری بە دەسو ڕۆڵەکاو نیشتمانی بەلوێ نریێ.
جە مانەو هەڵمەتەکەیەنە، (ئەختەر ڕەزایی)ێ، ئەندامەی چالاکەو یانەو ژەنا هەورامانی جە شارو پاوەی بە پێشکەشکەردەی وتارێ، سپاسو ڕێکوزێ و ڕاوەبەرێ زاگرۆسانەی و گرد لایێش کەرد.
هەرپاسە تەئکیدش کەردەوە سەرو ئانەی کە پارێزنای و ئەوەژیونای کەش‌وکۆ و دارستانەکانو هەورامانی ئەرکی نیشتمانییەن و ڕێزمان هەن پەی هەر هەوڵێوی کە جە ئی بارەو مدریۆنە.
ڕەزاییێ باس سەرو ئانەیە کەرد، کە مشیۆ ئێمەی ژەناو وڵاتەکەیما چالاکانەتەر مێڎانەنە بیمێ و نەخشمان بۆ جە گەشە و ئاوەدانی وڵاتیەنە.

یانەو ژەناو هەورامانی/ لقو پاوەی

یاگۍ یادئاوەرییەن، "زاگرۆسانە" هەڵمەتێوە ژیوگەییەنە کە چەنڎین ساڵێن دەسشپەنەکەردەن و ئامانجش پارێزناو سروشتیەن و بەتایبەتی نیای نەماما و بەلووی بییەن، کە بەلو هێمان پەی ئەوەژیونای دارستانەکان. هامکات هەڵمەتەکێ گەشە بە فەرهەنگو پارێزنای ژیوگەی و هەر پاسە رێزگرتەی جە شەهیدەکانو ڕاڤیری سەوزی و ژیوگەی مڎۆنە و پەیوەست بە گرنگی ژیوگەی گلێرگەی هۆشیار مەکەرۆنەوە.