جە ئەرەیاوناێوەنە ٢٧ ڕێکوزیۍ و گرووپۍ چەپۍ، دیموکراتیکۍ، فیمینیستۍ و کوئیرۍ داوا کەرا، جە ١٦وو ئەیلوولی، ساڵیادوو دەسپەنەکەرڎەی سەرەورڎای ژەنی، ژیوای، ئازاڎیینە سەرتاسەروو دنیێنە مەبەسوو بەروستەی پەشتیوانی جە وێنیشاندەراو دلۍ ئێرانی وێنشانەدای کریۊ.

واتەنیچشا: سەرباروو ئانەیە دەسەڵاتداراو ئێرانی بە مەبەستوو بە ئاستەیۊ دەسەڵاتە درزوەنەبییەکەیشا سڵ جە حیچ تاوانێوە مەکەراوە، وەلۍ سەرجەموو چینەکا و چالاکاو بوارە جیاجیاکا، دژوو سەرکوتی، بڕنایرەی، نایەکسانی، نادادپەروەری، حیجابی بەزۊری و جیاوازیی ڕەگەزی، دلێنەبەرڎەی ژیوگەی، بەرڎەوامۍ بیۍ جە کۊشیا و ئا وێگیڕییە جە وێنیشانەدایەکاو ساڵاو ٢٠١٧ و ٢٠١٩ یاوا قەلاپۊپە.

هەر پێسە باسوو ئانەیچشا کەرڎەن، جە ١٦و ئەیلوولوو ٢٠٢٢ دروشموو ژەنی، ژیوای، ئازاڎی کریا بە هاواری هامبەشوو ورێستەی جەماوەری پەی ئازاڎی، یەکسانی و ڕزگاری جە دەوڵەتی ئایینینە و ئا سیستمەینە سەروو بنەماو نادادپەروەری و چەوسیایۊ ئەرەمەرزیان.

باس چانەیچە کریان، ئا سەرەورڎایە ڕاسەڕاو رزگاربیینەی جە دیکتاتۊریی کۊماروو ئیسلامی و یاوای بە ئازاڎی، یەکسانی، ڕزگاری و دادپەروەری بە دیموکراتیک پەی تەماموو گەلاو ئێرانی بە ڕۊشنی رەنگڕێژ کریان، تاوانش بۊ بە مایۍ یۊگێرتەیێوە خاسوو گەلە چەوسیاوە و ستەموەنەکریایا ئێراننە و جیهاننە.

پەوکای ئا ڕێکوزیۍ داواشا کەرڎێنە، کە جە یوەم ساڵیادوو کوشیای ژینا ئەمینیۍ و دەس پەنە کەرڎەی سەرەورڎای ژەنی، ژیوای، ئازاڎی-ینە کە هاموەختیچا چەنی ٣٥ەمین ساڵیادوو کۊکوشیی زیندانییە سیاسییەکا، جە هامنوو ١٩٨٨ بە شێوێوە یۊگێرتانە سەرتاسەروو جیهانینە با بە دەنگوو گەلە ئازاڎیواز و یەکسانیوزاو ئێرانی.

پەیئانەیچە ڕۊو شەممەی ١٦و ئەیلوولوو ٢٠٢٣ جە شار و وەڵاتە جیاجیاو دنیێنە پەی پەشتیوانی وەنەو خەڵکوو ئێرانی و سەرەورڎای ژەنی، ژیوای، ئازاڎی وێنیشانەدای ڕێک وزا و داواکارێچنۍ سەرجەموو چینەکا و لایەنە جیاجیاکا بەشداری چا وێنیشاندایانە کەرا.

داوایچشا کەرڎێنە، کە ئا ئەرەمەرزیۍ و ڕێکوزیۍ کە گەرەکشانە چا هەنگامێن، چەنیشا بەشدارۍ با، بە مەبەستوو هەماهەنگی جە ڕاو ئی ئیمەیلیوە پەیوەندییشا پۊوە کەرا: rise.up.jina2023@gmail.com

س.ز