چنی نزیکبیەیۊ و ساڵیاڎوو سەرهۊردای ''ژەنی، ژیای، ئازاڎیی'' فشارەکۍ ناوەنڎە ئەمنییەکا ئێرانی پۍ سەروو چالاکا و خانەواڎە گیانبەخشاکا زیاڎشا کەرڎەن و جە دوۋۍ حەفتېنۍ نزیک بە ٤٠ چالاکا جە ۋەرکەوتوو کورڎسانینە گیریېنۍ.
ماۋېوەن چنی نزیکبیەیۊ یۋەمین ساڵیاڎوو سەرهۊردای ''ژەنی، ژیای، ئازاڎیی''، هێزەکۍ سەر بە دەسەڵاتوو ئێرانی، شەپۆلێوە تازۍ ڕەشبگیریشا جە ۋەرکەوتوو کورڎسانی و ئێرانی دەسپنەکەرڎەن و ڕۋانە دەیان هاموڵاتیۍ و چالاکۍ بە بێ وستەی ڕووی حیچ ئەمرېوە گېرتەی، گیریېنۍ و پۍ یاگۍ نادیارۍ فاڕاشاوە.
بە پاو ئامارێوە تۆڕەکا مافوو مرۆڤوو کوردسانی، تەنیا جە ماوەو دوۍ حەفتا ۋیەرڎةینە، لاوکەمیۊ ٤٠ چالاکۍ و ھاموڵاتیۍ کورڎی جە لایەن و ھێزەکا سەر بە دەوڵەتی جە شارە جیاجیاکا ۋەرکەوتوو کوردسانی دەسبەسەر کریېنۍ.
بەپاو زانیارییەکا ماڵپەڕەکەی ئا ھاموڵاتیۍ، جە شارەکا تاران، سنە، مەھاباد، سەقز، کامیاران، جوانڕۆ، پیرانشار و شنۆ نە گیریېنۍ و فرەیشا پۍ یاگۍ نادیاری بریېنۍ.
جە لایۍ تەرۊ، جە ۋەردەوامی فشارەکا دامودەزگا ئەمنییەکانە پۍ سەروو خانەواڎەو گیانبەخشایا سەرھۊردای ''ژەنی، ژیای، ئازاڎیی'' ، تا ئیسە ژمارېوە جە ئەنڎاما خانەواڎەکاشا گیریېنۍ و بڕېچشا سەرەڕاو ھەڕەشا و ئاگاڎیی پنەدای، بە نۋیستەی قەرارنامەشا چنە هۊرگیریان، کە بەشڎاری جە مەراسیمەکا ساڵیاڎوو سەرھۊرداکەینە نەکەرا و دماتەر ئازاڎۍ کریېنۍ.
جە دماین نموونەیچەنە، ڕۊو ٢٢ۍ ئی مانگۍ عەبدوڵا ئەبوبەکری، تاتەو زانیار ئەبوبەکری، یۊ جە گیانبەخشایا سەرھۊردای''ژەنی، ژیای، ئازاڎیی'' دماو ئانەی چڕیان پۍ ئیتلاعاتوو شاروو مەھابادی، پۍ ماوەو چن سەعاتۍ گیریان و جە لاو ۋنەکۊڵیەرا ئا ناوەنڎەیۊ ھەڕەشېش ۋنەکریېنۍ کە بە حیچ جۆرۍ بەشڎاری مەراسیمەکا ساڵیاڎوو سەرھۊرداکەی نەکەرۊ و دماتەر بە نۋیستەی قەرارنامەش چنە هورگیریان و دماتەر ئازاڎ کریان.
سەرکوتکەرڎەی و ۋەردوامی فشارەکا دەوڵەتوو ئێرانی پۍ سەروو چالاکا، ژەنا و خانەواڎةو گیانبەخشایا سەرھۊردای ''ژەنی، ژیای، ئازاڎیی'' ، بە ئامانجوو مەنەیۊی جە دەسەڵاتەنە، جە وەختېنە کە یۋەمین ساڵیاڎوو ئا سەرھۊردایە نزیک بیەنۊ و چەمەڕاکریۊ جارێوەتەر مەراسیمەکۍ ساڵیاڎوو سەرھۊردای ''ژەنی، ژیای، ئازاڎیی'' گوڕە بە ناڕەزایەیی و ۋېنیشاندا جەماوەرییەکا بڎۊوە.
جەبارەو شەپۆلەی تازۍ گېرتەیۊ جە ۋەرکەوتوو کوردسانی و ئێرانی، ئەنجومەنوو پارتوو ژیای ئازاڎیی کوردسانی (پژاک) جە دماین شرۆڤەی سیاسی ۋېشەنە ئەرەیاۋنابېش، "شەپۆلەی وەرفراوانەو گېرتەی، جە مانگەکا ۋیەرڎەینە، کە بە پلانەی سیستماتیکیەو ڕژێمی پۍ ڕاگېرتەی جە دەسپنەکەرڎەیۊ سەرهۊرڎای جە سەروبەنڎوو جمایۊیی ''ژەنی، ژیای، ئازاڎیی'' نە وزیان ڕووە، میاچەما ڕژێمیش زیاتەر جە جارانی ۋەرو چەما گلېرگەینە وەڕسو بېزیاتەر کەرڎەن".
تەئکیدش کەرڎەبېوە، "شەپۆلەو گېرتەی و حۊڵاکا ڕژێمی پۍ کاولکەرڎەی ژیۋگەی و سەرکوتکەرڎەی جاڎەی، ئاماژەن پۍ تەرسۍ و بێدەرەتانی ڕژێمی جە ۋەران ۋەروو گەلوو کورڎینە. پاڵپەشتی گەلەکەیما و ۋەردەوامبیەی ېۊبیەی و یەکڕیزیی، پاسەکەرۊ کە رژێمی کۊکوشکار ئیتر تواناو سەرکوتکەرڎەیش نەمەنۊ".
هـ.ش
