ئاژانسوو ھەرانای، (ناوەنڎوو ئەرەیاۋناو جەمەو چالاکا مافوو مرۆڤی جە ئێران) ۋەڵاش کەرڎەنۊ، ڕۊو ٢٨ ئابی، لاوکەمیۊ ٢٥ گلېرۊبیۍ ناڕەزایۍ جە ۋەرکەوتوو کورڎسانی و ئێرانی لۋۍ ڕاوە.

ئانەیچش وستەن ڕووە، ئا گلېرۊبیۍ جە لایەن و بەشێوە جە تەقاویتا کۆمپانیای حکومی تەلەفون و پەیوەندییەکا، ژمارېوە جە کرێکارا کۆمپانیای "ماشین سازی ئەراک"ی، کرێکارا شارەوانی تارانی و بەشێوە جە کوڵەباڵایا و خانەواڎەکاشاوە ئەنجام دریۍ.

تەقاویتۍ ۋەردەوامېنۍ جە ناڕەزایی بەربڕیەی

بە پاو زانیارییەکا ماڵپەڕەکەی، تەقاویتا کۆمپانیای حکومی تەلەفونی و پەیوەنڎییەکا ئێرانی، جە پارێزگاکا کرماشان، ورمێ، سنە، ئیلام، خوزستان، گیلان، خوراسانی ڕەزەوی، ئەسفەهان، فارس، چوارمەحاڵ و بەختیاری، گۆڵستان، مازەندەران، تەورێز، لوڕستان، زەنجان، هورمزگان، مەرکەزی، تاران و یەزدی، بە مەڵامەتوو خراپی ئاژەو گوزەرانیشا و جابەجۍ نەکەرڎەی داواکارییەکاشا جە لایەن و ۋەرپەرساوە، چانیشایچ چارەسەرنەکەرڎەی قۊرتەکا تایبەت بە دەسەبەری تەندروستی و نەڎای پنەی تەمامو مافەکاشا، گلېرۊبیەی ناڕەزایشا ئەنجامدان.

گلېرۊبیەی باڵا کوڵەکا

هاموەخت شاروو تارانینە بەشێوە جە باڵا کوڵا و خانەواڎەکېشا، ۋەردەموو بیناو سەرۆکایەتی کۆمارینە گلېرۊبیەیشا ئەنجام دا و چنەشەنە داواشا کەرڎ ئا دەرمانېشا پۍ حاسڵ کریا کە پەنەوازشا پنەن.

گلېرۊبیەی ناڕەزایی کرێکارا

جەمۍ جە کرێکارا کۆمپانیاو "ماشین سازی ئەراک"ی پېسە نیشاندای ناڕەزایی ۋەران ۋەر بە جابەجۍ نەکەرڎەی داواکارییەکاشا و نەبیەی ئەمنیەتوو هەرمانۍ، دلۍ حۊشۍ ئا کۆمپانیاینە کۊبیېوە.

ئا کرێکارۍ تەئکیدشا چانەی کەرڎەنۊ،"ڕاوەبەرا کۆمپانیاکەی مەتاۋا بە عالی ڕاوەبەرش کەرا و بیاۋناش بە ئاستوو زیاڎکەرڎەی داھاتی و قازانجی".

هاموەخت بەشێوە جە کرێکارا یۊ جە پڕۆژەکا شارەوانی تارانی، ۋەردەم و بیناو شارەوانییەکەینە دژوو دماکۊتەی مەعاشەکاشا پۍ ماوەو چن مانگۍ و حەرپاسە ئاژەی نالەبارو یاگۍ هەرمانۍ، کۊبیەیۊیشا ئەنجام دابۍ.

دماو دەسپنەکەرڎەی ۋېنیشاندای و ناڕەزایەتییەکا سەرهۊردای ''ژەنۍ، ژیای، ئازاڎیی''، تەقاویتا دامودەزگا جیاجیاکا ئێرانی یۊ چا توێژا کە تا ئیسە جاڎەشا چوڵنەکەرڎەن و بە ۋەردەوامی دژ بە ئاژەی نالەباری و گوزەرانی و نەڎای پنەی تەماموو مافەکاشا، کۊبیەیۊ ناڕەزایشا ئەنجامدان.

هـ.ش