سەرسەعبو ئارۊی جە چوارچێوەو ئۆپەراسیۆنو قڕکەردەی سیاسیینە و جە هۊرکوای سەرو یانانە چڼین کەسۍ جە ئەستەنبوڵنە باڵبەسۍ کریۍ. جە ئۆپراسیۆنەکەنە کە چڼین کەسۍ باڵبەسۍ کریێنۍ ئەنداماو کۆنگرەو دیموکراتیکی (هەدەکە)، پارتو هەرێمە دیموکراتیکەکا (دەبەپە)، پارتو ڕەنجی (ئەمەپ)، پارتو ئەرەمەرزنایۆ سۆسیالیستی (سەیەکەپە)، پارتو سۆسیالیستی چېردەسا (ئەسەپە) و پارتو چەپو سەوزیش ئینۍ چنە.

داواکارو گرڎیی کۆمارو ئەستەنبوڵی ئەرەیاۋناش کە ئۆپەراسیۆنەکە جە دژو هەدەکەی ئەنجام دریان و جە چوارچێوەو ۋنەپەرسایۆینە جە ١٠ شارانە قەرارو باڵبەسکەردەی پەی ٦٠ کەسا بەرشیەن و تا ئیساتۍ ٥٢ ۍ کەسێشا باڵبەسۍ کریێنۍ.

لاو ۋێشۆ پارتو ڕەنج'ئەمەپ'ەی ئۆپەراسیۆنەکۍ دادگاو دۊڵەتو تورکیش شەرمەزار کەرڎ و ئەرەیاۋناش: "ئی بێ قانونی و بۍ هەڵوێسیە شەرمەزار مکەرمۍ. دەسەڵاتداری ۋۍ سەپن کە گەرەکشا تورکیای بکەرۆ بە زینانێوە گۊرە، حەجگیز نمەیاوۆ بە مەرامو ۋێش. ملکەچۍ ئی ئاوەزیەتیە نمەبیمۍ و درێژە بە ئەوەکۊشایما مڎەیمۍ'