جەنازەو گەشمەرڎە سەید ئەڤرانی و ئەسلان قامیشلۆی بەخاکی مسپاریا
جە مەراسیمێوە جەماوەرینە جە قامیشلۆ جەنازەو سەید ئەڤرانی، پەیامنێروو ANF ی و خەباتکاروو یاۋنەری ئازاڎی و ئەسلان قامیشلۆی فەرمانڎەو یەپەگەی بە خاکی مسپاریا.
بە بەشڎاری هەزاران کەسا جە سەرنیشت و ۋەرکەوتوو سوریای، ئەنڎاما ئەرەمەرزیا مەڎەنی، کۆمەڵایەتی، یاۋنەری و سەروازییەکا، کەژاوەو حەر دووە گەشمەرڎەی؛ سەید ئەڤران، پەیامنێروو ANF ی و خەباتکاروو یاۋنەری ئازاڎیی، کە ڕۊو ٢٢ۍ ئەیلولی گەشمەرڎە بی و ئەسلان قامیشلۆ، یۊ جە فەرماندەکا یەکینەکا پارېزنای گەلی (یەپەگە)، کە ڕۊو ١٧و ئەیلولی جە هجومېوە فڕۆکەی بێفڕۆکەوانی دۊڵەتوو تورکی ئەرەگیرینە گەشمەرڎە بی، بە هۊرگېرتەیۊ جەنازەکاشا جە بەشوو توێکاری نەوەشخانەو قامیشلۆی جە کۊڵانەو عەنتەرییەی بەرەو قەبرسان و گەشمەرڎە دەلیل ساروخانی کۊت ڕا.
جەنازەو ڕۆنامەوان سەید ئەڤرانی بە گوڵ و عەلەمەو یۊبیەی یاۋنەری ئازاڎیی (یەرەئا)ی و جەنازەو فەرماندە ئەسلان قامیشلۆیچ بە عەلەمە و یەپەگەی و گوڵۍ ڕازیېوە. هامڕېکېشا جەنازەو حەر دووە گەشمەرڎەکەیشا بە سەروو شاناشا هۊرگېرت و بەرەو قەبرسان و گەشمەرڎە دەلیل ساروخانی کۊتۍ ڕا.
هەزاران کەسۍ جە خەڵک و مەنتیقەکەی، ڕیش چەرمۍ و پیا ماقوڵا هۆز و عەشرەتەکا سەرنیشت و ۋەرکەوتوو سوریای جە قەبرسانەکەنە چەمەڕاو قافڵەو گەشمەرڎانۍ. مېڎانەکە بە ۋێنە و گەشمەرڎا و گوڵۍ ڕازیانۊ.
ئاماڎەبیەکۍ ۋێنە و گەشمەرڎا سەید ئەڤرانی و ئەسلان قامیشلۆیشا دان سەروو سینەیشا.
جەنازەو ئەڤرانی و قامیشلۆی دماو مەراسیمێوە کە قەرارا جە قەبرسان و گەشمەرڎە دەلیل ساروخانی بلۊڕاوە، بە خاکی مسپاریا.
