قسەکەروو سوپاو ئیسرائیلی دانیەل هاگاری ئەرەیاوناێوەنە باسوو ئانەیش کەرڎەن، کە ئۊپراسیۊنی زەمینی دژوو غەززەی وەرفراوانتەر بۊ. هاموەخت شەوەی ویەرڎێ غەززە بەهەسی بۊردومان کریا. وچیا کە ئی هجوومە  جە وەڵینەکا دژوارتەر بییەن و دلێشنە زیاتەر جە بۊردومانی عاسمانی کریان. هەرپاسە ئیسرائیل داواش جە ئەرەنیشتاو غەززەی کەرد بەرەو پانیشتوو شارەکەی پاشەکشێ کەرا.

تۊڕەکاو پەیوەندی پڕچیێنێ

وەختێ بۊردومانەکێ بەرڎەوامێ بیێ، کۊمپانیاو پەیوەندییەکاو فەلەستینی واتش، کە غەززەنە خزمەتگوزاریی پەیوەندییە تەلەفونییەکا، یاونای و ئینتەرنێت بەتەمامەتی مردیێنێ.

ڕێکوزیاو پزیشکاو بێسنوورییچ واتش، کە پەیوەندییەکێشا چەنی هامپیشەکاشا فەلەستیننە پڕچیێنێ.

پەیامکیانوو بی بی سی-یچ وەڵاش کەردۊ، ئا پەیامێ کە جە ڕاو تۊڕەو واتسئەپیوە پەی کەسوکاریشا کیانێنێشا پەی غەززەی نەیاوێنێ.

نەتەوەیۊگێرتەکێ داواش کەرد، ئیسرائیلیچ ڕەتش کەردۊ  

کۊمەڵەی گردینوو نەتەوە یۊگێرتەکا وەڵێنیازە قەرارێوەش بارەو ئەرەیاونای ئاویربەسی مرۊیی غەززنە پەسەند کەرد.

١٢٠ وەڵاتێ پەشتیوانییشا جە قەرارەکەی کەرد، ١٤ وەڵاتێ دژش بێنێ، ٤٥ وڵاتێچ دەنگشا پەنە نەدا.

ئیسرائیل قەراروو نەتەوەیۊگێرتەکاش پەی "ئاویربەسی مرۊیی" غەززەنە ڕەت کەردۊ و واتش، کە درێژە بە وەرگێرییکەرڎەی وێشا مدا.

زیانە گیانییەکێ ئینێ بەرزبییەیۊنە، ئەرەیاونیێ جیێ جیێ جە دووە لایەناو جەنگەکەیۊ

بە پاو دما ئاماروو تەندروستیی غەززەی جە ئەنجاموو هجووم و بۊردومانەکانە، ٧وو تشرینوو یوەمیوە زیاتەر جە ٧ هەزارا و ٣٠٠ کەسا کوشیێنێ، کە زیاتەر جە ٣ هەزار کەساشا زارۊڵێنێ. هاموەخت سوپاو ئیسرائیلی وەڵاش کەردۊ، سەرنیشتوو غەززەینە ١٥٠ خاڵێ حەماسیشا کەرڎێنێ ئامانج و فەرماندێوە باڵاو ئا جمیەریشا کوشتەن. ئاشکرایچش کەرڎەن، کە شەوەی وەڵینە بە ١٠٠ فڕۊکێ جەنگیێ غەززەشا بۊردومان کەرڎەن.

حەماسیچ ئەرەیاوناش، "داوا جە وڵاتاو عەرەبی، ئیسلامی و ئەنجوومەنوو ئاسایشی میاننەتەوەیی کەرمێ، کە وەرپەرسبییەیشا  بیاونا یاگێ و ڕاگێری جە زنجیرە کۊکوشییەکا کەرا"، هاموەخت کەتیبەکاو عزەدین قەسامی باڵوو سەروازیی حەماسی ئەرەیاوناش، کە چەکدارەکێشا سەرنیشتوو غەززەینە چەنی ئیسرائیلی تووشوو جەنگی بیێ.