گەریلاو گلێرگەو ژەنە ئازاڎاو وەرکەوتوو کورڎسانی (کەژار) ئەلفتریا گابار جزیرە، بۊنەو ٢٧ەمین ساڵیاڎوو گەشمەرڎەبییەی زیلان (زەینەب کناچی)ێوە، قسێش پەی ئاژانسوو هەواڵوو فوراتی (ANF)ی کەرڎی.

گەریلا ئەلەفتریا گابار جزیرە، ئەوەڵوو قسەکاشنە پێسەش وات: "جە ٢٧ەمین ساڵیاڎوو گەشمەرڎەبییەی گەشمەرڎە زیلانێنە جە کەسایەتیی گەشمەرڎە گوڵانۍ و گەشمەرڎە زیلانێنە جەموو گەشمەرڎاو مانگەو ئایاری یاڎ کەرمێوە و سەرەو وێم ئاستوو یاڎەوەریشانە کۊمنوورە. بە کۊشیای و مدرامانوو وێما بەرڎەوام درێژەپەنەدەرۍ ڕاو ئا هامڕایاما بیمۍ. هامڕا زیلانە بە گیانبازیی وێش و وەشەسیایی وێش پەی ژیوای سەلەمناش، کە متاوۊ گرڎ چێوێوە کەرۊ. ئامێتۍ هزر و فەلسەفەو ڕابەرایەتی بۍ، ئا ڕاسییە کە دیش گەرەکش بۍ بە فیڎاکاریی وێشۊ ژیواینە سەلەمنۊش، سەلەمنایچش. هێزوو ژەنۍ تاریخنە شاریاوە بۍ، جە ڕاو چالاکیی هامڕا زیلانێوە، ئا هێزە جە تاریکی ڕزگار کریا. هامڕا زیلانە بە ئامێتەبییەی ویۊگێرتەیش چەنی قۊناغەکەی و ڕابەرایەتی، ئانەشە ئەرەیاونا کە هیچ ئەقڵیەتێوە مەتاوۊ قووەو ئیراڎەو ژەنۍ وزۊ چێروو دەسەڵاتوو وێشۊ. ئارۊنە بە هەزاران هامڕۍ شۊنکەوتۍ ڕای ڕاسەو زیلانێنۍ نامێسۍ وێشا منیا زیلانە و ئیسەیچنە پا منیا یاگەپایەکاو ئاڎۍ کەشەکاو کورڎسانینە و کۊشیا، تا دما هەناسە ڕێبازوو ئازاڎیی گەشمەرڎە زیلانۍ گێرمێنە وەرو بیمی قابلۍ ڕەنجوو گرڎوو گەشمەرڎا."

'مشۊم بیاومۍ بە ڕاو ئازاڎی کە زیلانەکا نەخشنێنە'

جزیرە سەرنجەش وستە سەروو کاریگەریی زیلانۍ سەروو گەلا و ژەنا و واتش، 'ڕاسا هامڕا زیلانە یەک ساڵ جەنگەوانە بۍ، وەلێم قووە و دڵسۊزیی ئاڎۍ پەی ژیوای گرڎ وەختێوە پەی ئێمە نموونەن. بە سەڎان ژەنی گەنجۍ بیۍ بە ڕاویارۍ و شۊنکەوتۍ زیلانۍ، میراتوو ئاڎێشا درێژە پەنە دا و گەشمەرڎی بیۍ. پەی نموونەی چی مانگێنە گەشمەرڎە زیلانە پەپوولە، زیلان ماکو و فرە هامڕۍ تەرێچ کە نامۍ زیلانێشا ورگێرتێبۍ، بە هەڵوێسی وێڕاگیرانەشا بیۍ بە جەنگەوانۍ گەشمەرڎە زیلانۍ. مشۊم تەماوو ژەنە گەنجا با بە ڕاویارۍ ڕاسیی زیلانۍ، تا بتاوا ئا میراتەو هامڕا زیلانۍ کە پەی ئێمەش نیانەرە وەرگێرییش چەنە کەرمۍ و بە هینوو وێماش بزانمۍ. هاموەخت پەی قۊناغی ئارۊیی بیمۍ بە جوابێوە بەقووەت. وەختێوە چا چێوا یاوایمێنە کە هامڕا زیلانۍ واتێنۍ، ئا وەختە زیاڎتەر جە قۊناغەکەی و ڕابەرایەتی میاومێنە، تا بیاومۍ ڕاو ئازاڎیی کە زیلانۍ نەخشنێنە."

'مشۊم گرڎوو ژەنا وێشا بە ساعیبۍ شۊڕشی و ڕەنجوو گەشمەرڎا بزانا'

گەریلا ئەلەفتریا گابار جزیرە ئانەیچش وست ڕووە، کە مشۊم زیاڎتەر کۊشیا و داواش کەرڎە کە: " ئا هەرمانۍ گنۊ سەروو سانەو ئێمە کە وێبەساعیبزانای ڕەنج و مانیای گەشمەرڎان، ئاستشنە بیمۍ و ئاویروو شۊڕشی گیسیانەتەر کەرمۍ. مشۊم ژەنی گەنجۍ زیاڎتەر جە هزر و فەلسەفەو ڕابەرایەتی بیاوانە و بشناساش، با بە شۊنکەوتۍ ڕاو ئازاڎیی زیلانەکا. ئانە کە پاسە کەرۊ ئی شۊڕشە سەروو پایاو وێشۊ بمرڎۊ ئیراڎەو ژەنێن. داوا وەنەو گرڎوو ژەنا کەروو وێشا بە ساعیبۍ ئی شۊڕشی و ڕەنجییە بزانا. وێشا بە ساعیبۍ ڕابەرایەتی و گەشمەرڎا بزانا و ڕا نەدا ونەو گەشمەرڎاما سەروو زەمینیوە مەنۊوە. جەموو گەشمەرڎا مانگەو ئایاری یاڎ کەرووە و سەرەو ڕێزی ئاستشانە کۊمنوورە و تا ئاخیر کۊشیەو پەی ئانەیە بوو بە قابیلەو ڕەنجوو ئا گەشمەرڎا."

س.ز