ڕابەر ئاپۆ جە ١٥و شوباتو ١٩٩٩یوە هەتا ئیسە جە دوورگەو ئیمراڵینە پەی ئاشتی و نەتەوەی دیموکراتیکی ئەرەکۆشۆنە. جە دماین دیڎارشەنە جە ٢٣ۍ ئۆکتۆبەرینە ئەرەیاوناش: "گۆشەگیری بەردەواما، ئەگەر هەلومەرج بڕەخسیۆنە، هەرەکەتو تیۆری و پراکتیکیم هەن پەرسو کوردی جە بواری یاسایی و سیاسینە چارەسەر مکەرو."

هیواش بە گەلو کوردی بەخشا"

ئەحمەد کارامووسا هامسەرۆکو کۆنگرەو نەتەوەیی کوردەسانی (کەنەکە) ی سەبارەت بە گۆشەگیریی ڕەهاو سەرو ڕابەر ئاپۆی و چەمکو جەنگی کۆمکوژی جە کوردەسانەنە چنی ئاژانسو هەواڵو فوراتی قسێش کەردۍ.

کارامووسا ئاماژەش پانەیە کەرد کە گۆشەگیری سەرو ڕابەر ئاپۆی پەرەش ئەسان و جە گردو گلېرگەینە وەڵابییەنۆ و واتش: "هەرچنە دیڎار ئەنجام دریان، بەڵام گۆشەگیری بەردەواما. گۆشەگیری و چەمکو بڕییەی پەیوەندییەکا کە سەرو ئێژا عەبدوڵا ئۆجالانیرە ملۆ ڕاوە، کردەوێوە نایاسایین و دوورا جە گرد یاسا میاننەتەوەییەکا. ئێژا عەبدوڵا ئۆجالان وێش جە پەیامەکەشەنە بە ڕۆشنی ئەرەیاوناش کە گۆشەگیری بەردەواما. هەرچنە تەنیا دیڎارێ ئەنجامدریان، بەڵام هیواش بە گەلو کوردی بەخشا. لاوکەمیۆ سەرو دۆخو تەندروسی زانیاریما لا یاوا، ئینەیچ دڵوەشیێ گەورەش پنە بەخشایمێ."

گەلو کوردی گۆشەگیر مکریۆ

کارامووسا جە میانەو قسەکاشەنە واتش: "گۆشەگیری جە بنەڕەتەنە بەشێوەن جە پەرسو چارەسەری کوردی، هەرچنە جە ساڵۊو ٢٠٠٩، ٢٠١٣ تا ٢٠١٥ پرۆسەو چارەسەری جە ئارانە بێ، بەڵام بەرکۆت دۆڵەتو تورکی حیچ نیازپاکیێش جە پرۆسەو چارەسەرکەردەینە نییا، ڕۆشنبیۆ کە ئا گلێرۆبیەیۍ کە جە قۆناغە جیاوازەکانە ئەنجام دریێنێ، مەبەسشا جە فریودای گەلو کوردی بییەن. بەتایبەتی جە ساڵۊو ٢٠١٦ینە ئا پڕۆسەی کە جە تورکیانە ئاما  وەڵێوە، ئا فشار و هجومۍ، سیاسەت و چەمکێوەن ڕووەشدا، گردو مەرامیشا قڕکەردەو گەلوو کوردی بۍ. جە بنەڕەتەنە ئا گۆشەگیرییەی سەرو بەڕێز عەبدوڵا ئۆجالانیرە سەپیان، بەشێوەن چا چەمک و سیاسەتەیە و نیازو چارەسەری نییا. ئایا ئی گۆشەگیرییەو سەرو ئێژا عەبدوڵا ئۆجالانی، مەسەلێ شەخسییا؟ نا! بەڵکوووم سەرو گردو گەلو کوردیرە ملۆ ڕاوە. جە کەسایەتی ئێژا عەبدوڵا ئۆجالانینە گردو گەلو کوردی گۆشەگیر کریان.

دەیان هەزار کەسێ جە کۆلنەنە دەنگشا هۆربڕی: عەبدوڵا ئۆجالان ئیراڎەمانە

کارامووسا جە درێژەو قسەکاشەنە واتش: "سەرەڕاو ئا گرد هجوم و گۆشەگیرییەیە کە سەرو ئێژا عەبدوڵا ئۆجالانیرە جابەجێکریا، بەڵام ئیراڎەو گەلو کوردی پەی جەهانی، پەی مێڎانی میاننەتەوەیی نیشانە دریا کە هەر  کۆنسێپتێ و ڕا و رێبازێ جە دژو ئێژا عەبدوڵا ئۆجالانی، جە دژو جمېیەرو ئازادی گەلوو کوردی بگێرانە وەر، مەتاوا شکس با ڕێبازەیە بارا. بەدەیان هەزار کەسێ جە شارو کۆڵنینە گلێرێ بیێوە و پەیامو ئانەیشا بە راو گردی جەهانیدا کە ئێژا عەبدوڵا ئۆجالان ئیرادەو ئی گەلەینە، ئەرەیاوناشا بەبێ ئیرادە، ڕوڵ و پێگەو ئێژا عەبدوڵا ئۆجالانی، پەرسو کوردی بە حیچ شێوێوە چارەسەر نمەبۆنە. ئارۆ حکومەت ڕاو گردی میاننەتەوەیش چانەیە یاونانەنە. گەلو کوردی و کوردەسانی، دۆسا گەلو کوردی کە بە دەیان هەزارێ جە شارو کۆڵنینە گلێربیێوە پەی ئانەی نیشانەشادا ئێژا عەبدوڵا ئۆجالان ئیرادەشانە. پا مەعنۍ کە عەبدوڵا ئۆجالان تەنیا کەسێن متاۆنە پرۆسەو چارەسەری بە شێوازێ سیاسی بە ئەنجام بیاونۆنە.

'وەرنیشت مۆدێلو چارەسەری کێشەکا وەرکەوتو مېیامینین'

کارامووسا سەرنجش وست سەرو هجومەکا دۆڵەتو ئەرەگیرو تورکی پەی سەرو سەرنیشت و وەرکەوتو سوریای و واتش: "ئیسە پەرسو وەرنیشتی، پێگەو وەرنیشتی یۆن چا پەرسە سەرەکیا کە مشۆم جە پەرسو کوردینە چارەسەر کریۆنە. چونکی وەرنیشتو کوردەسانی بە پارادایم و ویر و فەلسەفەو بەڕێز عەبدوڵا ئۆجالان یاوان پی ئاستە. ئی دیمەنە جوابو پەرسو وەرکەوتو مېیامینی جە چارەسەرو کێشەکانە مڎۆوە. سەرو ئا بنەمایۍ هجومەکی دۆڵەتو تورکی پەی سەرو وەرنیشتی ئانجام مڎریا، چانەیە تەرسۆ کە کورد بتاۆنە بە چارەسەرێ ئەڵتەرناتیڤ کێشەکا وەرکەوتو مېیامینی چارەسەر بکەرۆ و یاگۍ ژیوای گەلا پێک بارۆ. ئایا چارەسەر ئینا جەنگەنە، جە کۆمکوژیی و کوشتەو مرۆڤەکانە؟ پۆکەی مودێلو وەرنیشتی جوابو گردو ئانیشاش دانۆ، هیواڎارێنمێ ئا هێزە میاننەتەویۍ کە هامکاریی ستراتیژیشا چنی دۆڵەتا ئەرەگیر و بەتایبەت دۆڵەتو تورکیای هەن، بیاوا با قەناعەتەی کە ئا سیاسەتۍ حیچ چارەسەریێ بەرهەم نمارا.

بانگەواز پەی پەدەکەی

کارامووسا جە قسەکاشەنە، ئانەش وات: "ئارۆ گەلو کوردی بە قۆناغێ هەستیار و مەترسیڎارەنە موییەرۆنە، کۆنگرەو نەتەوەیی کوردەسانی بەدەیان جارۍ کۆششکەردەن یەکڕیزی جە دلێ جمېیەرەکا کوردەسانینە جە هەر چوار پارچەو کوردەسانی پێک بارۆنە. ئێمە ئا هەوڵەما چنی پەدەکەی دان، بەڵام پەدەکە هەرمان کەردەیش چنی دۆڵەتو ئەرەگیری هۆرچنییەن کە گەرەکشا بە گرد شێوێ بییەی گەلو کوردی جە مەنتیقەکەنە سەڕۆوە. ئارۆ ئینایمی جە قۆناغێ فرە هەستیار و مەترسیڎارەنە. ئێمە چڼین جارۍ داواما جە پەدەکەی کەردەن و ئەرەیاونانما کە هامکاری شمە چنی دۆڵەتو تورکیای چارەسەری نمارۆ. جارێوەتەر بانگەواز جە پەدەکەی مکەرمێ، با لۆزانی دووەم جە سەدەو٢١ینە واوەی نەکەرمێ. با نەبیمۍ بە دوس و هامکارۍ دۆڵەتو تورکی جە کۆمکوژی و پیلانە جەنگیەکانە دژ بە گەلەکەیما. هیواڎارێنمی جە سیاسەتی، ستراتیج و ئامانجەکا دۆڵەتو تورکی بیاومێنە ودلۍ هێزە کوردییەکانە بەشدارۍ بیمۍ. با پێوەرە بیمۍ بە ئەکتەرێوە سەرەکی جە چارەسەری پەرسو گەلەکەیمانە."