عەبدولعەلیم کایا جەئەدابییەو ١٩٤٣ بۊنەو بەشدارییش جە کۊنفرانسێوە  ڕۊنامەوانینە جە ساڵەو ٢٠٠٨ینە دۊسیوە دژش کریێبێوە. جە ئەنجاموو دۊسیەکەینە جە ٢٤وو کانوونوو یووەموو ٢٠٠٩ جە لاو ٥ەمین دادگاو سزا قورسەکاو ئامەدیوە بە تۊمەتوو "پڕوپاگەندەی پەی ڕێکوزیاێوە" سزاو ٥ ساڵا زینڎانییش ملەرە سەپیا و ئا سزێچە جە ساڵەو ٢٠١١ پەسەندە کریا.  

کایا کە جە تشرینوو یووەموو ٢٠٢٠ینە بۊنەو نەوەشیی پڕۊستاتیوە عەمەلیاتش پەی کریابۍ، جە ١٤ تشرینوو دووەموو ٢٠٢٠ینە یانەکەشنە سەرباروو ئانەیە زەخمۍ نەوەشییەکەیش خاسۍ نەبیبێنێوە، تەقەڵەکێس بەرنامێبێنێوە گیریا و وزیا زینڎانوو نۊعوو ئێچی بورسایۊ.

کایا تەنیا گورچیلێوەش هەرمانە کەرۊ و بۊنەو نەوەشیی دڕێژخواینی و دڵیوە تا مۍ  تەندرووسییش ناڕەحەتتەر بۊ و چەمێجش کزۍ با.

'جە عومروو ٨٨ ساڵینە و بە ڕێژەو سەڎا ٩١ی کەمئەنداما'

کوڕوو زینڎانیی نەوەشەکەی عەبدولعەلیم کایا ئیسماعیل کایا باسوو ئانەیشە کەرد، کە تاتەش ئیتر مەتاووۊ گمێز مردنۊ و واتیچش، جە ئەوەڵوو زینڎانیکەرڎەیشۊ پەی ماوەو ٦٠ ڕوا ژوورێوە تاکەکەسینە بییەن وزینڎانوو بورساینە گیریان و واتش: "جە ٢٩و تشرینوو یووەموو ٢٠٢٠ینە وەختێوە بورسانە سەرۍ تاتەیم دام، واتاش پەنە، نەوەشنا و قاچیشم مێشا و کاربەدەسەکۍ وەنەم مەپەرساوە'. سەرباروو ئانەیە نەوەشییەکەش قورس بۍ دەموودەس ئازاڎ نەکریا. جە ٢٨وو ئەیلوولوو ٢٠٢١ینە ڕاپۊرتۍ بارەو تاتەیمۊ ئەرەیاونیا و دلێشنە ئامان، کە سەڎەنە ٩١ کەمئەندام و ساعیبپەنەوازی تایبەتا. جگە جە نەوەشیی پڕۊستاتی، تواناو ژنیەیش کەم بیەنۊ و گۊشیوەش بە ڕێژەو سەڎا ٨٠ مەژنەوۊ. سەڎەنە ٥٠ وینایش نەمەنەن و چەمی چەپش ئاوی چەرمێس ئامێنەنە. گورچیلێوەش جەدەس دان و بە گورچیلێوە ژیوۊ. جە ڕووەو دەمارییچۊ تووشوو نەوەشیی ویرشیەیۊ سووکی بییەن. نەوەشیی دڵیش هەن و وەڵتەرێچ تووشوو ماسای ونبەروو دڵی بییەن. "

مشۊم ڕای گردینە هەستیارە بۊ

کایا ئانەیچش وست ڕووە، کە تاتەش نییا دۊخێوەنە کە بەتەنیا پەنەوازییەکاش جابەجا کەرۊ و واتش: "بە هامکاریی پاسەوانەکا مۍ پەی چەمپەنەکەوتەی. ئێمەیچ پێسە ئاڎی وەختێوە ناڕەحەت گوزەرنمۍ، چەنی هەر سەرڎاێوەما زەخمەکێما قووڵۍ باوە، چوون تاتەم دۊخش قورس و گولا. داوا جە ڕای گردینۍ کەروو پەی تاتەیم و نەوەشەکای تەرێچ بە هەستیاریوە جووڵیاوە، دەموودەس ئازاڎۍ کریا. ئێمە سەروو ئاستی میانەتەوەییچ درێژە بە هەوڵەکاما مدەیمۍ. ئەگەر تاتەم جەنازەکەیش بارمۍ جبەر دەینش بە گەرڎەنوو ئانیشا کە بێدەنگێنۍ. تا ئیساتۍ دۊسیۍ تاتەیم پەی فرەو کاربەدەسا کیانێنە وەلۍ تا ئیساتۍ هیچ جوابێوەم ورنەگێرتەن. "

س.ز