٢٠ ساڵۍ چێوەڵتەر و ڕۊو ٢٠وو ئەیلوولوو ٢٠٠٣ێنە، پارتوو یۊبییەی دیموکراتیکی (پەیەدە)ی ئەرەمەرزیا. پی بۊنەوە هیزی ھەرێموو فوراتینە، مەراسیمێوە مەبارەکبایی لوا ڕاوە. مەراسیمەکەنە گردوو نەتەوەکاو هەرێمەکەی و دامودەزگایەکاو ئیدارەو وێڕاوەبەری و بنەیانەو گەشمەرڎا ئامادۍ بێنۍ و بە جلوبەرگی کوردییوە ئا بۊنەشا مەبارەک کەرد.

مەراسیمەکە بە دەیەقێوە ڕێزگێرتەی جە یاڎوو گەشمەرڎا دەسش پەنە کەرد. دماتەر ئەحمەد خۊجە، ئەنداموو ئەنجوومەنی گردینوو پەیەدەی قسێش کەرڎۍ و مەبارەکبایی ئا ڕووەیشە  وەنەو گردوو ئا گەشمەرڎا کەرد، کە چا بوارەنە گیانشا بەخت کەرڎەن و واتش: "پەیەدە جە دۊخوو فاڕیای و ورچەرخیاینە ئەرەمەرزیا و بەتایبەتی ئا پڕۊژە کە وەرکەوتوو دلێراسەینە ئامادە کریۍ، بە نامۍ وەرکەوتوو دلێڕاسینی تازەیۊ، چا چوارچوەنە پارتەکەما سەروو بنەمێوە ستراتیژیێی دیموکراتیکۍ وێش مەرزنارە".

خۊجە جە درێژەو قسەکاشنە ئاماژەش پانەیە کەرد، پەیەدە سەروو بنەماو ئازادیی ژەنۍ و دیموکراسیوە ئەرەمەرزییان و واتش: "هەژموونی دەسەڵاتدارنەو سەرمایەداری قەیرانێوەش وەشە کەرڎە و گردوو پلانە چەپەڵەکاش سەروو ئا بنەمێوە یاونۍ یاگۍ.  هجوومێوە تایبەت کریا سەروو گەلوو کوردی، کە کۊنتەرین نەتەوەو وەرکەوتوو دلێڕاسەین. ڕژێمی نەتەوەپەرەست بە دڕندانە هجوومش کەرد سەروو پارتەکەیما. ئامانج چەنەش دلێنەبەرڎەی ڕێکوزیایەکەی بۍ. دەیان ئەندامۍ سەرمەشقۍ ئی پارتەیە دەسبەسەرۍ، زیندانیۍ و گەشمەرڎۍ کریۍ. دژوو هجوومەکا گەلەکەما گەورەتەرین دەورش تارێخەنە و وەرکەوتوو دلێڕاسەینە گێڵنان. چارەسەروو قەیرانەکا وەرکەوتوو دلێڕاسەینە، گەلوو کوردین. تا دمایی سەروو ڕاو گەشمەرڎاوە بەرڎەوامۍ بیمێ".

لاو وێچشۊ ئایشە ئەفەندییە، هامسەرۊکەو ئەنجوومەنوو بنەیانەو گەشمەرڎاو هەرێموو فوراتی، سەرنجەش پەی دەسکەوتەکاو پەیەدەی کێشنا و واتش: "جەنگوو کۊبانێنە بە ڕۊحی ئاپۊییوە دژوو دوژمنی دڕندەی سەرکەوتیمۍ، سەبەبوو ئی سەرکەوتەیچە، ڕۊحوو سەفەربەریین، کە ڕابەر ئاپۊی دەسش پەنە کەرڎەن. ئیساتۍ چا گڕوتینی، ڕۊح و جۊشوخرۊشینە مژیومۍ، مشۊم هەڵوێستێوە قەوەتما وەراوەروو خیانەتیوە بۊ، بە ڕۊحوو خەتەی یەرەمەو ڕابەر ئاپۊی و گەشمەرڎاوە سەرکەوتەیما مسۊگەر کەرڎەن."

مەراسیمەکەنە دیاری پێشکەشوو بنەیانەو گەشمەرڎە شیلانۍ و جوانۍ کریا. دماتەر ئاھەنگەکەنە بەرنامەی هونەری پێشکەش کریا، کە ناوەندوو کولتووری و ھونەریی باقی خدۊی ئامادە کەرڎەبۍ.

س.ز