جڤاتی گرڎینوو تەڤگەری شۊڕشگێڵنیی یۊگێرتەو (کەبەدەهە)، بەیاننامێونە واتشا: "ئازادیی کوبانۍ ئەنجاموو ڕەنجی، بەدیلی قورس و ئیرادێوە قەوەتیوە ئاما،  کۊبانی کە گیریێبۍ گڵوەو دەوڵەتوو فاشیستی تورکی و نوێنەروو ئیساتۍ ڕژێموو ئەرڎۊغانی، ڕۊحی شۊڕشگێڵنیی جە کەسایەتیی ئارین میرکانێنە تەپوو مشتەنوریوە یاواو تەماموو گەلاو دنیۍ. ڕۊو سەرکەوتەی کۊبانۍ کە پێسە ڕوو رزگاری گرڎوو جیهانینە مەبارەک کریۊ ، ئی ڕووە ڕۊو گیسناینە مەشخەڵی/ ڕۊشانیی و هومێدین وەراوەروو تاریکییەکاو داعشیوە.

درێژەو بەیاننامەکەینە ئاماژەشا پی خاڵا کەرڎەن:  

"پێسە چەنی هیزی هەوڵەکاو عەقڵییەتی فاشیست و پیاسالار کۊبانێنە سەرنەکەوت، ئارۊیچ مەتاوا چا یاگانە کەمدرامان هەن سەرۍ گنا، کۊبانۍ سرودەو سەرکەوتەینە پەڕەنە ئەزموون و دەرس. ئینەیچە بۊ بایسوو ئانەیە جیای ئانەیە گلەیۍ جە هەلومەرجی سەختی کەرمۍ، جە پێویسییەوە فرسەت خولقنمۍ و درێژە بە کۊشیای ڕزگاریوازی بدەیمۍ دژوو داعشی و هامپەیمانەکاش، کۊبانی پەڕەنە ئەزموونوو فەرماندەیی ژەنا.

مدرامانوو ئارۊیچما پا ئانجامانە، کە دەرسما چەنە ورگێرتێنۍ. دروشموو 'ژەنی، ژیوای، ئازادی' فاڕیۊ پەی زریانێوە کە نەزموو پیاسالاری جە ژیوای و مەژگمانە ورووژییۊ. دەوڵەتوو تورکی مزانۊ کە شۊڕشوو وەرنیشتی شۊڕشوو ژەنان، شۊڕشێوەن کە سەرەڕاو گرڎوو زەخت و هجوومێوە مدرامانش  کەرڎەن و سەروو پایاو وێشۊ مەنەنۊ، ئینەیچە دەوڵەتوو تورکی شێت کەرۊ، پەوکای چی دمایۊ هجوومەکاو سەروو وەرنیشتیش زیادۍ کەرڎێنی، ئینە جگە جە بەکارئارڎەی  گرڎ چەکێوە کیمیاوی و تەکنیکی فرەقەوەتی سەروو گەریلا ژەنەکاوە، کە نمەتاوۊیچ  ئیرادەو ژەنا کەشەنە ماڕۊ. ئی یارای و ئازایەتییە کە جە ئارینۍ، ساریۍ و قادریوە مەنەنۊ پەیما  جە تاریکتەرین وەختەکانە مەشخەڵەو هومێدی  گیسنۊنە و کۊشیای شۊڕشگێڵنانەی یۊگێرتەما تاجدار کەرۊ.