کفرینە پەردە سەرو پەیکەروو گەشمەرڎە مامۊسا شەماڵی لادریا
جە یۋەمین ساڵیاڎوو تیرۊرکەرڎەی مامۊسا شەماڵینە، بەبەشڎاری ژمارېوە ۋەرچەم جە توېژە جیاجیاکا و خانەواڎەکەیش، جە ناۋەنڎوو قەزاو کفری، پەردە سەروو پەیکەرەکەیش لادریا.
جە ساڵیاڎوو گەشمەرڎەکەرڎەو سوهەیل خورشیدینە ئشناسیا بە مامۊسا شەماڵی، نۋیسەر، تاریخ نۋیس، شارەزا جە بوارو جوگرافیای و ئەنڎاموو دەسەی ڕاوەبەری تەڤگەری ئازاڎیی گلېرگەو کورڎسانی، جە قەزاو کفری، سەر بە ئیدارەو گەرمیانی، بە ئامادەبیەی ژمارېوە وەرچەم جە هامۋڵاتیا، هامڕایاش و خانەواڎەکەیش، پەردەسەرو پەیکەرەکەیش لادریا.
چالاکیەکە بە دەیەقېوە ڕېزگېرتەی جە ڕۊحیانەتوو مامۊسا شەماڵی دەسش پنەکەرڎ، دماتەر جە لایەنوو خانەواڎەکەیشۊ پەردە سەرو پەیکەرەکەیشۊ لادریا.
پەیکەرو مامۊسا شەماڵی، جە فولکېوە دلېڕاسەو قەزاو کفرینە نریارە، کە بە فولکەو وەرگیری شارسانی مشناسیۊ و نزیک بە بازاڕو گۊرەو قەزاکېن.
پەیکەرو مامۊسا شەماڵی، سەرو ئەرک و بەشۍ جە هامڕا نزیکەکاش و جە لایەن و مامۊسایا بەشی شېوەکاری جە پەیمانگەو هونەرە جوانەکا کفریېوە وەشکریان.
ڕۊو ٢٨ و ئابوو ٢٠٢٢ سوهەیل خورشید، ئشناسیا بە مامۊسا شەماڵی، ئەنڎاموو دەسەی ڕاوەبەری تەڤگەوری ئازاڎیی گلېرگەو کورڎسانی، ۋەرو دەموو یانەکەو ۋېشەنە جە قەزاو کفری، گەشمەرڎە کریا، ئارۊ ساڵۍ سەرو گەشمەرڎەبیەیشەرە ۋەیەرۊ، بەڵام تا ئیسە تاوانبارۍ گەشمەرڎەکەرڎەیش نەگیریېنۍ.
هـ.ش
