خانم ئایووە ئەنڎامەو ئا لوجنەیەنە کە جە سەرنیشتوو ۋەرکەوتوو سوریای ئیمزېکۍ کەمپینوو ئازاڎیی پۍ ڕابەر ئاپۊیشا پېشکەش بە کۊمیتەو ڕاگېرتەی جە ئەشکەنجەی(سیپی تی) و کۊمسیۊنوو باڵا و مافەکا مرۊڤی جە نەتەوە یۊگېرتەکانە کەرڎەن، باسش چانەی کەرڎ کە ئاخېزوو ۋەرنیشتی بەکرڎار کەرڎەو پاڕادیگماو ڕابەر ئاپۊیا.

''داواما کەرڎ یاسای میان نەتەوەیی هەرمانەش پنەوکریۊ"

هامسەرۊکەو دەسوەڵېوستەو پارېزنەرا سوریایی پەی ئازاڎیی ڕابەر ئاپۊیی ئەرەیاۋناش: کە ئاڎۍ هەم جە بارەو گۊشەگیری سەرو ڕابەر ئاپۊیی و هەمیچ جە بارەو هجومەکا دەوڵەتو ئەرەگیری تورکیوە پۍ سەروو  ۋەرنیشتی، بەتایبەت سەرېکانی و گرۍ سپی و عەفرینی، چنی ڕېکوزیاکا ئەوروپای بڕۍ کۊبیۊیېما ساز کەرڎۍ.

ئایووە ۋاتش؛"پېسە دەسوەڵېوستەکەیما جە بارەو  ڕابەر ئاپۊیۊ دامودەزگاکۍ ئۊروپایمە سەر کەرڎېوە. پۍ ئانەی گۊشەگیری سەرو ڕابەر ئاپۊی دمایش پنە بۍ، کە حیچ زانیاریېۋە  سەرش مەزانیۊ، ڕا مەڎریۊ کە پارېزنەرەکېشوو خانەواڎەکەش چەمشا پنە گنۊ. پۍ ئانەی ئېمە جە ۋەرنیشتوو کورڎسانی کەمپینو ئیمزا کۊکەرڎەیما دەسپنەکەرڎ. ئېمە ئەنجاموو ئا کەمپینەیما دا دەسوو ڕېکوزیاو سی پی تی-ۊ دما تەریچ داما دەسوو ئۊفیسوو نەتەوەیۊگېرتەکاوە پۍ مافاکا مرۊڤی. حەرڎووە ئەرەمەرزیاکەیچ بە عالی پېشوازیشا ۋنەکەرڎېمی. ئا ڕېکوزیۍ وەعدشا پنە دایمۍ کە بە جدی هەرمانەش سەر کەرا.

''هجومە ئەرەگیریەکۍ دەوڵەتو ئەرەگیری تورکی گفتوگۊشا جەبارۊ کریا''

خانم ئایووە باسش چانەی کەرڎ، مژارۍ تەر کە قسەوباسش جەبارۊ کریا هجومەکۍ دەوڵەتو تورکی بېنۍ پۍ سەرو ۋەرنیشتوو کورڎسانی و ۋاتش،''دەوڵەتو تورکی هجومەکاش پۍ سەرو ۋەرنیشتیی درېژە پنەمڎۊ. چا هجومانە ژمارېوە فرە خەڵک بۊ بەقوربانی کە فرەیشا مەڎەنیېنۍ. چا بارۊ زانیاریەکېما یاۋنۍ. ئاڎېچ وەعدشا دا کە دەنگما بیاۋنا بە وەرپەرسا".

"هجومەکۍ دژ بە ئەندېشەکا ئۊجالانینۍ"

خانم ئایووە ئانەش وست ڕووە، نمونەی هامشېوەو ئا گۊشەگیریەی سەروو ڕابەر ئاپۊیۊ پەیڕەو کریۊ، جە حیچ یاگۍ دنیېنە هامشېوەش نیا و پی جۊرە ۋەردەوامە بۍ،''دەوڵەتو تورکی گەرەکشا بە گرڎیی جە بەینو گەلا ۋەرکەوتو میامینی و بەتایبەتتەر گەلو کورڎی و ڕابەر ئاپۊینە حیچ جۊرە پەیوەندیۍ نازۊ. گەرەکشا پاڕادیگماو نەتەوەی دیموکراتیکی کە ئارڎەنش ئاراوە، دلېنەبەرۊ و نازۊ یاۋۊ بە گەلی. چارەسەری دیموکراتیکی  چارەسەریۍ ڕیالیستا. گرڎو جەهانی ئاگاڎارو  ئانەینە. ۋەرو ئانەینە دۊڵەتەکۍ پەشتیوانی جە تورکیای کەرا. جە بنەڕةتو گرڎوو هجومەکانە ئا ڕاسیە هەن".

''دەسوەڵۍ وستەو پارېزنەرا تا ماڕای گۊشەگیری ۋەردەوامیش بۊ"

خانم ئایووە باسش چانەی کەرڎ چنی ئەرەنیشتا حەلەبی و دیمەشقی، گەلو کورڎی، عەرەبی، ئاشوری، ئەرمەنی، تورکمانی جە سەرنیشتوو ۋەرکەوتوو سوریای، پانیشتوو کورڎسانیچ بەشڎاریشا جە کەمپینوو ئیمزاکانە کەرڎەن. ئایووە دەسنیشانش کەرڎ کە پېسە دەسوەڵېوستەکەیشا پەی ئازاڎیی ئۊجالانی تا هۊرگېرتەی گۊشەگیری  بە شېۋۍ جیاجیا درېژە بەکۊشیای ۋېشا مڎا''.

ئایووە سەرنجش وست سەرو ئانەی کە جە ۋەرکەوتوو میامینینە جە ڕاو پاڕادیگما و ڕابەر ئاپۊیۊ سەردەمېوە تازە دەسش پنەکەرڎەن و ۋاتش،''١٠ ساڵۍ سەرو ئاخېزو ۋەرنیشتیرە ۋیەرڎ. پاڕادیگمای نەتەوەی دیموکراتیکی چا ئاخېزەنە بە کردار کریان. ئا پاڕادیگما پۍ ئېمە گرنگا. ئېمە جە سایەو ئا پاڕادیگمایۊ یاۋېنمۍ بە ئارۊی. ۋەرو ئانەی ئازاڎیی ڕابە ئاپۊی ۋەڵۍ گرڎ چېۋېنە ئازاڎیی ئېمەن. نەک حەر پۍ ئېمە، پۍ گرڎو گەڵا چېر دەسیچا".

''پېسە گرڎ کەسۍ مشۊم کورڎیچ خۊتان مافۍ بنەڕەتی بۊ''

خانم ئایووە ئاماژەش بە دەورو ئۊروپای کەرڎ جە گۊشەگیرینە و ۋاتش،''پەیمانەو جنېفی جە بوارو مەفەکا مرۊڤینە یاگېۋە گرنگەش هەنە. جە ساڵەو ١٩٤٨ یۊ باس جە مافەکا مرۊڤی کریۊ. دژ بە پاشېلکاریەکا مافی و ئازاڎییەکا کۊشیای ئینا ئارانە. ئانەی چا پەیمانېنە نۋیسیان، پەنەوازەن بە کرڎاری جابەجۍ کریۊ. ۋەرو ئینەین ئامېنمۍ پۍ ئۊروپای. مشۊم ڕېکوزیا ۋەرپەرسەکۍ ئەرکەکاشا بەیاگۍ بیاۋنا. مشۊم گەلو کورڎی پېسە گرڎو گەلا تەری خۊتان مافە بنەڕەتیاکاشا با''.

''ئېمە گەرەکمانە جە ماۋېوە کوڵەنە زانیاری جە بارەو ڕابەر ئۊجالانیۊ هۊرگېرمۍ''

خانم ئایووە جە دمادماینە داواش جە ڕېکوزیا میان نەتەوەییەکا بوارو مافەکا مرۊڤی کەرڎ ئەرەیاۋناش،''ئا گۊشەگیریەی سەرو ڕابەر ئاپۊېۊ قورستەر کریان مشۊم دەمودەس هۊرگیریۊ. پەنەوازەن دەمودەس پارېزنەرەکېش و خانەواڎەکەش چەمپنەکۊتەیش چنی سازکەرا. جە بارەو ئاژەو  ژیۋای ڕابەریۊ نیگەرانېنمۍ. گرڎ کەسۍ بە نیگەرانیۊ چا ئاژەیە  مڎیۊ. گەرەکمانە خېرا زانیاریما پنەبڎریۊ. حەرپاسە هجومەکۍ دەوڵەتو تورکی سەرو ۋەرنیشتی ۋەردەوامېنۍ. مشۊم هجومەکۍ دەسنیشان کریاو  جواب بڎاوە. ئیتر بۍ دەنگی وچەم قوجنای وەسېن. ئېمە داوا جە گرڎو ڕېکوزیاکا مافو مرۊڤی کەرمۍ کە دەنگو ۋېشا هۊربڕا''.

هـ . ش