هامسەرۊکوو گلێرگەو زۊراڤای دڵشاد بەدۊ قسێش پەی ئاژانسوو هەواڵوو فورات (ANF)ی کەرڎۍ و باسوو ئانەیش کەرد، کە سەبەبوو هجوومەکا پەی ئاینوو ئێزدییەکا گێڵۊوە و واتش: "ئێمە  ساعیبۍ بڕوۍ و ئایینێوە ڕەسەنوو ئی خاکەینمۍ. ئێمە ساعیبۍ کەشە شکۊمەندانمۍ، ئی مەنتێقە جە ڕووەو ستراتیژییوە کاریگەریی  کەرۊ سەروو یەرۍ وەڵاتا و بەسۊشاوە وێشۊ. پەوکای بۊ بە چەقوو هجوومەکا. گەلوو ئێزدی ساعیبوو کولتووری، ویر و باوڕی و ئایینێوە پۊڵایینین".

'ئێمە ئیتر ڕێکۍ وزیێنمۍ '

بەدۊ ئانەیچش وست ڕووە، کە ئەگەر گەلوو ئێزدی پێسە وەڵۍ ٢٠١٤ وێشا ڕێک نەوستۍ دەوڵەتوو تورکی ئا گرد هجوومەیە نەکەرۍ و واتش، " ئا وەختە چێروو دەسەڵاتوو پەدەکەینە بێنمۍ و ئێمە کۊیلایەتیما قبووڵ کەرڎەبۍ. وەلۍ ئیساتۍ ئیساتێڕێکۍ وزیێنمۍ، ئێمە چێروو دەسەڵاتیشانە ئامێنمۍ جبەر و وێما بەرمۍ ڕاوە، بە دەیان ئەرەمەرزیۍ و دەزگۍ هەنۍ، وەروو ئانەیە هجووم کەرا سەروو سەرمەشقەکاما".

بەدۊ ئانەیچش وست ڕووە، کە ئازادی و وێڕاوەبەری بۍ قوربانیدای دەسەبەر مەبۊ و پێسە درێژەش بە قسەکاش دا، "ئێمە شانازی بە گەشمەرڎەکاماوە کەرمۍ. ئەگەر دەوڵەتوو تورکی ئەرەگیری ئازان با بۍ و دەسەویەخە رووبەڕووما بۊوە. وەلۍ چونکوم مەیارا پێسە بێئەخلاقانە هجوومۍ کەرا سەروو سەرمەشقەکاما. نەک حەر دەوڵەتی تورکی ئەرەگیر، حەر هێزێوە تەر مۍ با بۍ، ئێمە سەرە مەکۊمنمێرە و خیانەت و کۊیلایەتی قبووڵ مەکەرمۍ. دەوڵەتوو تورکی ئەرەگیری  بێدەنگیی حکومەتوو عێراقی قۊزۊوە و هجوومۍ کەرۊ. مەنتێقەکاو  چێروو کۊنترۊڵوو حکومەتوو عێراقینە هجوومشا کەرد سەروو سەرمەشقەکاما و گەشمەرڎێشا کەرڎۍ. ڕووەی هەقەتینەو  حکومەتوو عێراقی وەراوەروو شەنگالیوە ئاشکرا بییە. عێراق شکسش ئارد و  پێسە گەلوو ئێزدی ئێمە سەرۍ کەوتیمۍ. ئانە پەی گردوو هجووم و پیلانگێڵییەکا بۊ بە نموونەو مدرامانی".

'دژوو هجوومەکا ئێمە سەرە مەکۊمنمێرە'

خەڵەف قاسمیچ ئانەش وست ڕووە، کە ئادۍ دژوو هجوومەکانە سەرە مەکۊمنارە و واتش، " وەروو ئانەیە ئێمە ئێزدیێنمۍ ئا گرڎە هجوومەما ئینا سەرۊ و سەرمەشقەکێما کریا ئامانج. گەرەکشانە ڕێکوستەیما وەنە ورشاناوە زەنگۊڵۍ بە هێز و ئیرادەیما بدارە.  پێسە گەلی دژوو ئا هجووماوە سەرە مەکۊمنمێرە. ئەگەر بەڕاسیی ویرۍ چی گەلە کەراوە با ئێزدییەکۍ گێڵاوە پەی یاگۍ وێشا و هامکاریی ڕێکوستەی و پارێزنایشا بدا. ٩ ساڵۍ سەروو کۊکوشیەکەیرە ویەرڎەن، گرد لایۍ و بەتایبەتی حکومەتوو عێراقی وەراوەروو ئێزدییەکاوە  بێدەنگێنۍ. ئا بێدەنگییە ئا ئینسانا وزۊ دلۍ گومانیوە.

قاسم پێسە بەرڎەوام بی، "ئێمە وێما مەخەڵەتنمۍ، تا ئێمە پارێزگاری وەنەو وێما نەکەرمۍ، وێڕێوەبەریی شەنگالی پێک نارمۍ  و هێزی سەروازیی وێما وەرفراوان نەکەرمۍ، حیچ هێزێوە پەی بەرژەوەندیی ئێمە هەنگامە مەنییۊ، مشۊم متمانەما بە هێزەکاو وێما بۊ و خاستەر وێگێرۍ بیمێ".

س.ز