ھاموەڵاتێوە خەڵکوو کۊبانۍ بە نامۍ خەلیب عەلوشیوە، کە چەمش کەوتەن بە ڕابەروو گەلوو کوردی، عەبدوڵڵا ئۊجالانی، کارڎایۊش وەراوەروو گۊشەگیریی تنڎکریایۊ نیشانە دا و واتش: "مشۊم گرد یاگێوەنە هاگاشا ڕابەرەکەیما بۊ و ئازاڎیی ڕابەر ئاپۊی مسۊگەر کەرمۍ".
گۊشەگیریی تنڎ سەروو ڕابەروو گەلوو کوردی، عەبدوڵڵا ئۊجالانی بەرڎەواما. نزیکەو یەرۍ ساڵان حیچ زانیاریێوە بارەشۊ وەرڎەس نییا و بە بەهانۍ "سزاو دیسپلین"یوە، داواکاریی بنەیانە و پارێزنەرا پەی کەرڎەی دیداری ڕەت کریۊوە. دمایین جار محەمەد ئۊجالان، ڕۊو ٢٥وو ئاداروو ٢٠٢١ چەنی براکەو ڕابەروو گەلوو کوردی، عەبدوڵڵا ئۊجالانی، قسێش کەرڎە. چا وەختۊ تا ئیساتۍ حیچ زانیاریێوە ئیمراڵییوە ورنەگیریان، پەوکای نیگەرانیی گردیین چا بارۊ زیادش کەرڎەن.
ھاموەڵاتێوە خەڵکوو کۊبانۍ بە نامۍ خەلیب عەلوشیوە، کە چەمش بە ڕابەروو گەلوو کوردی، عەبدوڵڵا ئۊجالانی کەوتەن، کارڎایۊش وەراوەروو گۊشەگیریی تنڎکریایۊ نیشانە دا و واتش: "مشۊم گرد یاگێوەنە ڕووە کەرمۍ مەیدانەکا، هاگاما جە ڕابەرەکەیما بۊ و ئازاڎییش مسۊگەر کەرمێ".
عەلوش پێسە باسوو دیدارەکەیش چەنی ڕابەروو گەلوو کوردی کەرد و واتش: "جە ساڵەکاو ١٩٧٨-١٩٨٠ مامۊزێوە تاتەیم بە نامۍ 'ئەدھەم'یوە پڕاوە پەی وەرنیشتی. حەفتۍ دماو گێڵایۊش ئاماوە و باسوو پارتێوەش پەی کەردیمۍ. واتش: 'پارتێوەما ھەن، ئێمە کورڎێنمۍ. مشۊم پەشتیوانی وەنەو پارتەکەیما کەرمۍ و خەبات کەرمێ'. ئەدھەم جارێوە تەر پڕاوە پەی وەرنیشتی و پەنەش واتیمێ: 'ھامڕێوەما هەن کە مشۊم فاڕمێشۊ پەی وەرنیشتی. وەلۍ مەبۊ کەس پینەیە بزانۊ'.
کەسێوە بە نامۍ جەنی ڕابەرایەتی فاڕۊوە پەی وەرنیشتی. ڕۊی دووەم ڕابەر ئاپۊ بە تراکتۊر ملۊ کۊبانۍ و وەرڎەموو مەکتەبوو ڕەش-ینە وەزۊرە. ڕابەر ئاپۊ ملۊ یانەو ئەنوەر عەلوشی. دماو ماوێوە ڕابەر ئاپۊ چاوە ڕووە کەرۊ حەلەب. ڕابەر ئاپۊ ئا وەختە بە نامۍ "عەلی فورات"یوە ئشناسیۍ. مامۊزاکەم ئا وەخت پەی ماوەو یەرۍ مانگا چەنی ڕابەر ئاپۊی مەنۊ. دماتەر ڕابەر ئاپۊ ڕووە کەرۊ دیمەشقی و دماتەر ملۊوە لوبنان".
عەلوش ئاماژەش پانەیچ کەرد، وەختێوە پەی یوەم جاری ڕابەروو گەلوو کوردی، عەبدوڵڵا ئۊجەلانش دییەن و پەنەش واتەن ڕابەرەکەم، چەمەڕۍ ئی ڕۊیە بێنمۍ، ئێمە کورڎێنمۍ و وێما بە ساعیبۍ کورڎایەتی مزانمۍ. ڕابەر ئاپۊ واتش: شۊڕش پەی گەلەکەیمانە، مشۊم گەلەکەما هاگاشا جە شۊڕشی بۊ.
'جە ئەندێشە و ئەرەمەنەی ڕابەر ئاپۊی تەرسا'
عەلوش واتیچش: چەنی ئەرەمەرزنای پەکەکەی، ئیتر کورڎۍ وێشا ئشناسا. جە ڕاو پەکەکەی و ڕابەر ئاپۊیۊ، گلێرگەی کوردی ئازاڎ بی. دەوڵەتۍ دەسەڵاتدارۍ جە ئازاڎبییەی کورڎا تەرسێنۍ. نکۊڵی و جینۊساید ملوو شوناس و کولتووری کورڎارە سەپنیۍ. جە ڕاو ڕابەر ئاپۊیۊ کورد ڕۊ بە ڕۊ بەرەو وەڵی لوۍ و جە ئازاڎیی نزیکتەر بێوە. پەوکای جە ئەندێشە و ئەرەمەنەی ئازاڎوو ڕابەر ئاپۊی تەرسێنۍ.
ئاخریچۊ عەلوش سەرنجەش پەی گۊشەگیریی سەروو ڕابەروو گەلوو کوردی، عەبدوڵڵا ئۊجالانی کێشتە و واتش: ئێمە مافوو وێما گەرەکمانە. مشۊم گرد یاگێوەنە ڕووە کەرمۍ مەیدانەکا، هاگاما جە ڕابەرەکەیما بۊ و ئازاڎیی ڕابەر ئاپۊی مسۊگەر کەرمۍ. ئازاڎیی ڕابەر ئاپۊی ئازاڎیی ئێمەن. جە زانکۊکاو دنیێنە فەلسەفە و ئەندێشەکاو ڕابەر ئاپۊی ونییا و قسەوباسشا بارەوە کرییۊ.
س.ز
