خیانەت دلۍ کورڎانە؛ جە ئەنکیدۆیۆ پەی مەسعوود بارزانی
"ئەنکیدۆی زاگرۆسنشین خیانەت جە یانەو و گلێرگەو و خەڵكو ۋێش مکەرۆ و بۆنەو ئارەزوو حەزەکا ۋێشۆ، بەرەو بەهەشتو زاگرۆسی ڕووەو گلگامێشی ئەرەگیریرە مکەرۆوە".
خیانەت جە وەڵینگەو کورڎینە یاخوڎ بە شێوێوە گرڎیی دلۍ وەڵینگەو میزپۆتامیای و خاکو زاگرۆسی قەڎیمینە خاوەن ڕەگوڕیشێوە قەڎیمین و کە پەنەوازا پەی ۋەنایۆی ئاژەی هەنووکەیی پانیشتوو کورڎەسانی و وەشبیەو هێڵۆو خیانەتی بە سەرمەشقی بنەیانەو بارزانی و خودو مەسعوود بارزانی و کوڕەکاش، بە هەند هۆربگیریۆ.
ڕابەر ئاپۆ ماچۆ، میتۆدو میتۆلۆژیای میتۆدو ڕۊسنکەرڎةیۆ حەقیقەتین. سا چێگۆ متاویۆ ئانە ڕۆشن بکریۆوە پەی ئەنەیاوای جە وەڵینگەو خیانەتی جە سەڎەو ویسی و سەڎەو ویس و یەکینە جە لایەنو بنەیانەو بارزانیۆ پەنەوازما بە ئەنەیاوای جە تاریخو ئی ناوچەیە هەن تا بتاومۍ جە ڕەگوڕیشەو خیانەتەکا پەدەکەی و بەتایبەت خیانەتو ٣١و ئابی بیاومێنە کە مژاری سەرەکی بابەتەکەیمانە.
جە وەڵینگەو میزۆپۆتامیاینە، گلگامێش بە هامکاریی و چەمساغی ئەنکیدۆی کەشەکا زاگرۆسی ئەرەگیر مکەرۆ، بێگومان ئی داستانە ڕەگوڕیشەش دلۍ تەماموو میتۆلۆژیاکا تەرو میزۆپۆتامیاینە هەن و گرڎ پەی ئەنەیاوای جە ئاژەو وەڵینگەو ئا کاتیە مگێڵاوە پەی ئی داستانیە. ئەنکیدۆی زاگرۆسنشین خیانەت جە یانەو و گلێرگەو و خەڵكو ۋێش مکەرۆ و بۆنەو ئارەزوو حەزەکا ۋێشۆ، بەرەو بەهەشتو زاگرۆسی ڕووەو گلگامێشی ئەرەگیریرە مکەرۆوە، ئی ڕووەدایچە جە وەڵینگەنە پېسە یوەم خیانەتی دلۍ کورڎانە و بەتایبەت جە وەڵینگەو زاگۆرسینە تۆمار کریان.
چێگۆ، ئاڕاسەو مژارەکەیما بەرەو سەڎەو ٢٠ ی و ٢١ ی فاڕمێوە، دماو پەنج هەزار ساڵا بنەیانەو بارزانی بە چڼین خیانەتۍ یۆ شۆنەو یۆیرە یۆ پېسە خیانەتو ٣١و ئابی، سەرمەس و پارچەکەرڎەی و سەرمەشقین پەی ئەرەگیری و گلگامێشەکا سەردەمی.
چا چوارچێوەنە سەرسەعبو ڕۊو ٣١و ئابو ١٩٩٦ پەدەکە بێشەرمانە دەسو دیکتاتۆرتەرین و بکوژتەرین دەسەڵاتو سەردەمیش گێرت و ئارڎش دلۍ هۆلێری، سەروازا بەعسی و چەکڎارەکۍ پەدەکەی دەس دلۍ دەسی جاڎە و کۆڵانەکۍ شارەکەیشا خەڵتانو ۋنۍ کەرڎۍ.
جە ڕۊو ئا خیانەتەینە ١٥٠ تانکۍ و ٣٠ هەزار سەروازۍ ڕژێمو بەعسی عێراقی جە موسڵ و کەرکووکۆ بەرەو هۆلێر کۆتێڕا. وەڵۍ ئی ئامایچەنە مەسعوود بارزانی بەبێ ئانەی هیچ شەرمێوە جە ۋنەو گەشمەرڎا بکەرۆ جە نامێوەنە وەفاداریی ۋێش پەی سەددام حسێنی فاشیستی بەربڕۆ و ماچۆ؛ سەرۆکی ئێژام، پەنەوازا بە عەقڵ و سەرکۆتەیتاوە ڕێوە بیزیۆ پەی ئانەی ڕا جە دەسوەردای ئێرانی جە ئاژەو دلێینەو عێراقینە بگێری، داوا جە تۆی ئازیزی و وەشەسیایم مکەرو، تکا مکەرو کە ئەمرە بکەری سوپاو عێراقی دژوو ئا هێزە بیانیا کە هامکاریی جەلال تاڵەبانی مکەرا جمنینە.”
هەرچڼنە، پەدەکە بانگەشەو نەتەوەییبیەی و ناسیۆنالیست بیەی مکەرا بەڵام سەرۆکەکەشا چا کاتەنە فرە بە ڕۆشنی جە کۆنگرێوە ڕۆنامەوانینە ماچۆ؛ ڕەنگە جە مابەینو ئێمە و عێراقینە بڕۍ ناکۆکیۍ فرە وردۍ بانۍ، بەڵام خاڵەی هامبەشەی هەرە گۊرێما پارێزنای خاکو عێراقین.”
ئی خیانەتە کە کۆمکوژیێوە گۊرەش چنە کۊتۆ و پاو چن سەرچەمێوە جیاوازی زیاتەر جە سی هەزار کەسا بە مەڵامەتو ئا خیانەتیۆ کوشیۍ یا بێسەرو شۆنۍ بیۍ.
ئانەی زامو ئا خیانەتەیە ساڕێژ نمەکەرۆ و یاڎو کورڎیشەنە نمەبەرۆوە، یوەمشا فەخرکەرڎەی بنەیانەو بارزانى و پەدەکەین پانەی کە جە ٣١و ئابینە کەردشا، دووەمشا بەردەوامبیەین سەرو هەمان هێڵۊو خیانەتی.
ئیساتێچ مەسعوود بارزانی جە ڕاو مەسروری کوڕیشۆ کە سەردارێوە ماوە سەرشیەو حکومەتێوە هەرمان ڕاییکەریا بێشەرمتەرین چەمساغ و پێشقەڕەوڵی پەی دۆڵەتێوە ئەرەگیری پېسە تورکیای مکەرا و خاکو پانیشتوو کورڎەسانیشا سەرو لێوانێوە ئاڵتونیۆ پێشکەش بە خەلیفە تازەکەو عوسمانی کەرڎەن. ئینە بێجگە چانەی کە جە دماو کۆمکوژیی شەنگالیوە تا ئیساتۍ و جە ماوەو ئی دە ساڵەینە خیانەت و وێورەتەی نەمەنەن بنەیانەو بارزانی پەی دۆڵەتو تورکیش تاقی نەکەراوە، ئینە بەدەر چانەی غوڵامێوە دڵسۆزو ئەنقەرەین و بەشێوەنۍ چا پیلانا کە ئیسە پەی تێکدای و ئەرەگیرکەرڎەی ۋەرکۆتوو مېیامینی بە گرڎیی و پانیشتوو کورڎەسانی بە تایبەتی مگیریۆنە ۋەر.
