دووۍ ساڵۍ ویەرۊ ملوو کۊکوشکەرڎەى پۊلێوە گەریلایاو ئازادیرە لاو پەدەکەیۊ خەلیفاننە، تا ئارۊیچ پەدەکە یەک کەلێمەش چا بارۊ نەدرکنان و جەنازەو گەشمەرڎەکایچش نەدانۊ.
شەوۍ دێرەو ٢٨ سەروو ٢٩و ئابوو ٢٠٢١، تیمێوە حەوت کەسیۍ گەریلاکاو پەکەکەی نزیکوو ئاوەو زاپینە خەلیفاننە گنا کەمینەو هێزەکاو پەدەکەیۊ و پەنج گەریلۍ گەشمەرڎۍ با، گەریلێوە بە برینداریی گنۊ دەسوو هێزەکاو پەدەکەی و گەریلێوەیچ وێش ڕزگار کەرۊ.
هەر زوو پەکەکە لەسەروو ئا ڕووەدایە پەنجۍ تۊمەتیش پەی پەدەکەی کێشنا، ڕۊو ٣ۍ ١٠و ٢٠٢١، ناوەندوو ئەرەیاونای و چاپەمەنیی هەپەگەی ئەرەیاوناێوەنە ورڎەکاریی ڕوودایەکەیش وست ڕووە و ئاماژەش پانەیە کەرد، شەوەو ٢٨وو ئابی گرووپێوە گەریلای، کە جە حەوت کەسا پێکۍ ئامێبێنۍ، گەرەکشابۍ قەندیلۊ بلارە بادینان، دەورووبەروو سەعات ٢:٣٠ نیمەشەوی، وەختێوە گەریلاکۍ گەرەکشابۍ ئاوەو زاپی ویەرنا، ڕووبەڕووۍ هجووموو هێزەکاو پەدەکەی بیێوە.
هەپەگە ڕۊشنیچش کەرڎۊ، بۍ ئانەی چەکدارەکاو پەدەکەی حیچ هۊشیاریێوە بدا، یان گولـلۍ هۊشداریی تەقنا، ڕاستەوخۊ جە چوار لێوە گولـلەوارانێشا کەرڎێنۍ، جە ئەنجاموو ئا هجوومانە بە زانیاریی ڕۊشن، پەنج هامڕێما گەشمەرڎۍ بیۍ، ئەگەری فرە هەن، هامڕێوەما بە برینداری گیریابۊ، هەرپاسە هامڕا حەقی، کە یۊ جە ئەنداماو گرووپەکەی بییەن و شایەتوو ئا ڕووەدایەنە، تاوانش بە زەحمەتێوە فرە چا هجوومەیە ڕزگارش بۊ.
ڕۊو ٦وو ١٠و ٢٠٢١یچ هەپەگە جە زوانوو حەقی زیلانیوە، ئا گەریلایە کە جە هجوومەکەنە وێش نەجات دابۍ، ورڎەکاریی هجوومەکەیش وست ڕووە.
حەقی زیلان واتەبێش: نزیکەو ١٠٠ مەترا جە ئاوەو زاپی دوورۍ کەوتیمێوە، کتوپڕ بۍ حیچ هاگادارکەرڎەیۊیۍ بەهەسیی دریایمۍ وەروو دەسمجوو دەستڕێژى گوللـا و یاگەکێما دەردنەوارڎۍ بۍ، چونکوم پەشتیما جە ڕووبارەکەیۊ بۍ وەرڎەمیچما چۊڵ بۍ، ئەوەڵ نەزاناما کۍ هجوومش کەرڎەن سەرما، دماتەر زاناما سەروو تەپەکاو نزیکوو ئا یاگێوە بە چەکی قورس کریێنمۍ ئامانج.
پێسە زیلان باسش کەرۊ، چەکداراو پەدەکەی دما فیشەکشا نیان گەریلا بریندارەکاوە، بە نۊعێوە چەکدارەکۍ بە زرەپۊشەکاشاوە لوێنۍ یاگۍ کەمینەکۍ و بە چەکی ئێم ١٦ جارێوە ١٢ فیشەکۍ و جارێوەیچ نۊ فیشەکێشا نیێنۍ گەریلاکاوە، تا ئانێچکە هەڵای زیندێنۍ گەشمەرڎۍ با.
ڕۊو ١٣و ١٠و ٢٠٢١یچ ئاژانسوو هاوارنیوزی، زوانوو سەرچەمێوە کە گەرەکش نەبۍ نامێش بۍ، ئاشکراش کەرد، ئاشکرایکرد کە عەزیز وەیسی، فەرماندەی گردینوو هێزەکاو زێرەڤانی و فەرماندێوە تەروو پێشمەرگەو پەدەکەی بە نامۍ دلۊڤان ڕووباری، ئەمرەو هجووموو سەروو ئا گەریلایاشا بەرە کەرڎێنە و چەکداراو ڕۊژ-وو سەر بە پەدەکەیچئەمرەکێشا یاونێنە یاگۍ.
ئاژانسوو هاواری نامۍ بڕۍ چا چەکداراو ڕۊژ-یشە وەڵا کەرڎێنۊ، کە هجوومەکەشا کەرڎەن و ئینێنۍ، شێران ڕەمەزان سیما، میڤان عیسا ئیبراهیم، ئیسماعیل محەمەد ساڵح و ڕائید عیسا.
ڕۊو ٣ێ١٠و٢٠٢١، هەپەگە شناسنامەو ئا شش گەریلایاشە ئەرەیاونا، کە هجوومەکەو خەلیفانینە گەشمەرڎۍ و بریندارۍ بیۍ، چوارشا خەڵکوو سەرنیشتوو کوردستانینۍ و دوێچشا خەڵکوو وەرنیشتوو کوردستانی، کە (تۊڵهەڵدان ڕامان، شۊڕش مێردین، ئاخین مەزرۍ، شۊڕش جۊلەمێرگ، بروسك مونزور و سەرڎەم جودی)ینۍ.
کەسوکاروو دووە گەشمەرڎەکاو وەرنیشتی، جە ٥ تشرینوو یوەمیوە جە دەروازەو سیمڵکاینە چادرێشا ورڎۍ و داواو جەناەزەو ڕۊڵەکاشا کەرڎە، وەلۍ تا ئیساتۍ وەرپەرساو پەدەکەی هیچ جوابێوەشا نەدێنێوە، یەک کەلیمەشا سەروو ئا هجوومەو خەلیفانی نەدرکنان.
ئارۊ دووۍ ساڵۍ ملوو ئا هجوومەو پەدەکەیرە ویەرۊ، تا ئارۊیچ پەدەکە بە هەمان سیاسەتوو دژ بە کوردی و نۊکەریی تورکیوە بەرڎەواما و هەرێموو زاپینە شانەوشانەو سەراوازاو تورکی هجووم کەرا سەروو هەرێمەکاو گەریلای و شۊڕشگێڵنۍ و ئازادییوازاو کوردی بەئەرەگیر و "تیرۊر" مشناسا و سەرا و دڕندە و فاشیستە تورکایچ پێسە ش یانەوەی.
س.ز
