کۊمیتەو پەیوەنڎیەکا بەروو کەجەکەی:"دەوڵەتوو ترکی هەم جە عېراق و هەم جە سوریا، مافوو سەروەری حەردووە ۋڵاتەکەیش پاشېل کەرڎەن، گەرەکشا ئەرەگیریەکەیش حەردووە ۋڵاتەکەنە درېژە پنە بڎۊ".
کۊمیتەو پەیوەنڎیەکا بەروو کەجەکەی، سەبارەڎ بە ڕووەدایەکا کەرکوکی و دېرەزۊری، ئەرەیاۋنېوەش ۋەڵاکەرڎۊ.
کەجەکە ماچۊ:'' دماو هجومەکا داعشی، عېراق و سوریا بە پشېویۍ گۊرەرە ۋیەرڎۍ، تا ئیسەیچ سەقام گیرۍ نەبیېنۍ، ئیسەیچ کەرکوک و دېرەزۊر خزیانە دلۍ گرژی و جەنگېوە تازەی.
دیارا گرژیەکۍ دېرەزۊری ۋېڕسکۍ نیەنۍ ، ئی گرژیۍ ڕاسەوخۊ پەیوەنڎیشا بە سەردای هاکان فیدانی وەزیروو بەروو تورکیایۊ هەن کە ٢٢-٢٤ و ئابی سەردای بەغڎای و هۊلېریش کەرڎ. قسەکۍ ئەردۊگانی و هاکان فیدانی جە حەرڎووە مېڎانەکەنە، جە هەمان وەختەنە نیازوو چەمەڕاییەکا دۊڵەتوو ترکی بەروزا.
جە درېژەو ئەرەیاۋناکەینە ئامان:
هاکان فیدان بانگەشەو ئانەیش کەرڎ، ئا جەنگەی جە کەرکوک هورگیسیا و بەمەڵامەتشۊ ٤ کەسۍ مەرڎۍ، بە دەسوەڵېوستەی پەکەکەی بیەن. حەرپاسە ئەردۊگان، وەختۍ ڕوسیا گېڵۊوە، سەبارەڎ بە گرژیەکا دېرەزۊری ئەرەیاۋناش، پېشهاتېوە فرە عال وگونجیان، پی جۊرە پاڵپەشتی ۋېش بەربڕی پۍ ئا چەتا ئی جەنگەشا هورگیرسنان.
دۊڵەتوو تورکی جە عېراق و سوریا، مافوو سەروەری حەردووە ۋڵاتەکەی پاشېل کەرۊ و جە حەردووە ۋڵاتەکەنە ئینا ئاستوو ئەرەگیرینە، پېسە ئەرەگیرکەرڎەو قوبرسی جە ساڵەو ١٩٧٤، گەرەکشا ئەرەگیری ۋېش عېراق و سوریانە درېژە پنە بڎۊ. هاکان فیدان ئا وەختەی سەرۊکوو میتی بۍ، کوشتەی و کۊکوشی و گرڎ جۊرە ڕېبازېوە جەنگی قیزەونی و ئیستیفزازی بەکار ئارۍ، ئیسە ئی هەرمانە قیزەوناشە بەنامۍ وەزیروو بەری و چېروو نامۍ دیبلۊماسیەتینە درېژە پنە مڎۊ.
بەرەی تورکمانی و پەدەکە ڕاسەوخۊ چنی میتی هەرمانە کەرا
جە کەرکوک کورڎ، عەرەب، تورکمان، ئاشوری، سریانی و ئەرمەن سەڎان ساڵېن پېوەرە مژیۋا. هاکان و ئەردۊگان نامۍ "شاروو تورکی" و تورکمانی سەروو شاروو کەرکوکی-رە بڕا، تاوەکو ئامانجە ئەرەگیری و کۊلۊنیالیستیەکاشا شاراوە، پەدەکە و خانەواڎەو بارزانی بەکارمارا. چی ساڵا دماینە گەرەکشانە کەرکوکی کەرا بە ناوەنڎېوە سیخوڕی پۍ میتی و ئیستیفزازو ڕەوایەتی دای بە ئەرەگیری و ئەرەنیشتەیی جە پانیشتوو کورڎسانی. کەرکوک حەر جە قەیڎمۊ چنین ئیتنیکۍ و باوەڕیۍ و چاندۍ جیاوازېش دلۍ ۋېشەنە هۊرگېرتېنۍ، بە حۊڵ و تورکیای خەریکا کریۊ بە ناۋەنڎو جەنگی و گرژیەکا.
بەرەی تورکمانی و ۋەرپەرسا پەدەکەی ڕاسەوخۊ چنی میتی هەرمانەکەرا. حۊڵ مڎا ڕەوایەتی بڎا بە دیکتاتۊریەتی ئەردۊگانی دۊڵەتوو ترکی کە دلۍ گلېرگەو عېراقی و حکومەتوو بەغڎاینە بۍ ئەرزشا.
تورکیا جە ڕاو بڕۍ کەسایەتیا تورکمانیۊ کە کەرڎېنېش بە چەتۍ و ئینۍ بنەو دەس و ۋېسەنە، حەرپاسە بەپشتگیری خانەواڎەو بارزانی، گەرەکشا فشار جە ئیدارەو بەغڎای کەرۊ. کەرکوک شارېوە ناوازەو دۊڵەمەنڎا، بە تاریخوو ڕاسی گلېرگەی و هەمە ڕەنگیەکەیش خۊتان تەجروبېوە ژیۋایا. پۊکەی مەبۊ ڕا بڎریۊ دۊڵەتوو فاشیستی ترکی و هامپەیمانەکاش شارېوە ناوازەی پېسە کەرکوکی کەرا بە مېڎانوو سیخوڕی و ڕاوەبەردەی دەسەڵاتوو ۋېشا. پەنەوازەن گەلا کەرکوکی جە ۋەران ۋەروو گرڎ جۊرە دەسوەردایۍ بەرینە و دژ پا سیاسەتە ئەرەگیریا کە گەرەکشانە گەلا بڎا گژۍ یۊترینیرە هەڵۋېس برمانا، بناغەو ژیۋای هامبەشیشا و ئیدارەو ۋېشا بەقوەت کەرا و کەرکوکی کەرا بە قەڵاو ئاشتی و برایەتی و دیموکراسی و ئازاڎیی . ۋېشا ڕېکوزاو کۊشیای کەرا.
بەشکەرڎەی کەرکوکی پۍ سەروو خاکی و کۊڵانۍ و ۋیری و باوەری و ئیتنیکی و نفوسۍ و ژمارەو ئەرەنیشتا، موزایەدېوەن پۍ داهاتوو نەوتۍ، ئینەیچ کەرکوکی و عېراقی وزۊ دلۍ قەیرانېوە.
گەل، ئیتنیکی جیاواز، باوەڕوو ئاینی جیواز، ژەنا و گەنجا کەرکوکی تواناو ئانەیشا هەن پېوەرە ژیۋایۍ هامبەش جە کەرکوکەنە بنیاڎ بنیا ، دلۍ ئاشتی و ئارامینە ئیراڎەو ژیۋای نیشانە بڎا و ۋېشا ڕاوەبەرکەرا.
ئانۍ ئاشتی و ئارامیشا پۍ کەرکوکی گەرەکا، تەنیا هەرمانۍ کە بتاۋا کەراش ئانېنە، دژ بە ئەرەگیریەکا دۊڵەتوو ترکی عېراقەنە مرڎاوە. مشۊم ٩٠ قەرەقولەکەو ترکیای عېراقەنە بەرکریا. تورکیا هۊلېرش کەرڎەن بە باخچەو پەشتۍ ، پۊکەی مشۊم هەڵۋېست دژوو هەژمونی ئابوری، چاندی و سیاسی تورکیای سەروو پانیشتوو کورڎسانینە نیشانە بڎریۊ. دماو ئانەی ئەرەگیری و دیکتاتۊری ئەردۊگانی سەروو خاک و عېراقی-ۊ دمایش پنە ئاما و جە کەرکوک دوروزیاوە ، ئا وەختە ئارامی جە عېراق، کەرکوک، سوریا، لیبیا، حەرپاسە جە تەماموو ۋەرکەوتوو میامینی مۍ ئاراوە''.
