هامسەرۆکایەتی کەجەکەی ئەرەیاۋناش ئەنفال تەنیا تاوانەو قڕکەردەی نیا، هامکات کۆمکوژی ژەنۍ و ئیکۆلۆژییا، واتش: "بە پەسینای بانگەوازەکەو ڕابەر ئاپۆی پېسە پارادایمو ئەوەکۊشای، متاومۍ ڕا جە ئەنفالی تازەی گېرمۍ".
هامسەرۆکایەتی کۆنسەو ڕاوەبەری کەجەکەی بۊنەو ١٤ و نیسانی، ساڵیاڎو یاڎکەردەیۆ قوربانیاو کۆمکوژی ئەنفالی کە ڕژێمو سەدامی ٣٧ ساڵۍ چێوەڵی جە پانیشتوو کوردەسانینە ئەنجامش دا، ئەرەیاۋنێوەش وەڵا کەرڎۆ.
ئەرەیاۋناکەو کەجەکەی پی جۆرەنە: "ئێمە ئینایمۍ ٣٧ ەمین ساڵیاڎو قڕکەردەی ئەنفالینە کە ڕژێمو سەدامی جە دژو پانیشتوو کوردەسانی ئەنجامش دا. چی قڕکەردەینە، ١٨٢ هەزار کوردۍ بە تایبەت ژەنی و زاوڵۍ بە شێوێوە دڕندانە گەشمەرڎۍ کریۍ. ئەنفال تەنیا تاوانەو قڕکەردەی نییا، بەڵکم قڕکەردەی ژەنا و قڕکەردەی ئیکۆلۆژیکیا. چونکی جە هەرێمۍ گرنگی جوگرافی پېسە پانیشتینە، شۊنەماو ژیۋای سروشتی و دەگایەکا گەلو کوردی بەشێوێوە کاولکریۍ کە ئیتر دەردەو ژیوایکەردەیشا چنە نەمەن. ئێمە ڕژێمو بەعسو سەدامی و ئا زیهنیەت و سیاسەتەو پەشتیشۆ بۆ شەرمەزار مکەرمۍ. خوڎای گۊرە ڕەحم پا کەسا بکەرۆ کە چا قڕکەردەینە گیانشا جە دەسدا. سەرەو ڕێزی پەی یاڎیشا منامنمېرە، سەرەوەشی جە گەلو کوردی و بەتایبەت کەسوکارو قوربانیا مکەرمۍ.
قڕکەردەی ئەنفالی تەنیا هرووژمېوە قڕکەردەی نییا کە جە تاریخێوە نزیکەنە دژو گەلو کوردی ئەنجامدریان. ئا سیاسەت و زیهنیەتەی کە نکۆڵی جە بیەی و ئازادی گەلو کوردی مکەرۆ، هەروەختۍ دەرفەتش ئێستەبۆوە، هامشێوەو ئەنفالی هرووژمو قڕکەردەی و کۆمکوژیش ئەنجامدان. مەڵامەتی سەرەکی قڕکەردەیەکا پېسە ئەنفالی، بەرژەوەندیی هێزەکاو مۆدێرنیتەی سەرمایەدارین کە سەدێو چێوەڵی جە لۆزانەنە بەرکۊت، چنی ئا کارەکتەرە ڕەگەزپەرس و نەتەوەپەرس و ئایین‌پەرس و فاشیستانەو دۊڵەت_نەتەوەی کە جە هەرێمەکەنە پېسە بریکارو ئا هێزا مامەڵە مکەرا. پی مەڵامەتۆ، دماو لۆزانی جە چوار پارچەو کوردەسانینە تاوانەو قڕکەردەی ئەنجامدریا. دماو کۆمکوژییەکا دێرسیمی و دۆڵەو زیلانی و هەڵەبجەی و ئەنفالی و شەنگالی و سینامەو عامودای، دماجار کۆمکوژی دەگاو بەرخ بۆتانی جە ۋەرنیشتەنە ئەنجامدریا.
گەلو کوردی دژو ئی زیهنیەت و سیاسەتە قڕکەرەی کە بناغەش لۆزانا، ئەوەکۊشای و مڎرامانی گۊرەش کەرڎەن، بە قوربانیدای گۊرەی، بیەی و ژیۋای ئازادی ۋێش پارېزنان. کاتێ جە سەدەی تازەنە هەرێمەکە سەرجە نۆ دیزاین مکریۆوە، پیلان و پیلانگێڵنیی جۆربە جۆرو هێزە هەرێمییەکا دژو بیەی و ئازادی گەلو کوردی، ڕووە مڎا. جە قۆناغێوە چامنە تاریخیەنە ڕابەر ئاپۆ پەی پارېزنای گەلو کوردی جە قڕکەردەیەکا پېسە ئەنفالی و هەڵەبجەی و شەنگالی و کۆمکوژی ئیکۆلۆژی و ژەنا، پەی ئانەی ستراتیجی تازەو ئەوەکۊشای دەسنیشان بکەرۆ، بانگەوازو "ئاشتی و گلېرگەی دیموکراتیک"یش کەرد کە پېسە مانیفیستۆو سەدەی نامۍ بریۆ. پېسە گەلو کوردی و گرڎو گەلا هەرێمەکەی، بە خاوەنداری چی بانگەوازەیە، بە ئەوەکۊشای پەی ئازادی ڕابەر ئاپۆی، پەسینای بانگەوازەکەی پېسە پارادایمو ئەوەکۊشای و پێکئاوردەی چێوە پەنەوازەکا جە گرڎو بوارەکا ژیۋاینە، متاومۍ ڕا جە ئەنفالی تازەی گېرمۍ و بیەی و ئازادی گەلو کوردی و گەلا هەرێمەکەی مسۆگەر بکەرمۍ. سەرو ئی بناغەیە واوەی بەڕێزۆ یاڎو گەشمەرڎا قڕکەردەی ئەنفالی مکەرمېوە، قەول واوەی مکەرمېوە بە گۊرەکەردەی ئەوەکۊشای ئازادی و گلېرگەی دیموکراتیکی، خاوەنداری جە یاڎیشا بکەرمۍ".
