هامسەرۆکایەتی دەسەو ڕاوەبەری کەجەکەی بۆنەو ساڵیاڎوو کۊکوشیەکا قامیشلۆی و کۊڵانەو غازی پەیامێوەش وەڵاکەردۆ. کەجەکە ئا کەسێشە ۋیرئاردێوە کە جە هەردووە کۊکوشیەکەنە گیانشا جەدەسدا و ئانەیچش وست روە کە جە هجوومەکەو شێلادزێنە جگە جە دەوڵەتوو تورکی، پەدەکەیچ ۋەرپرسیارا.

ئەرەیاۋناکەو هامسەرۆکایەتی دەسەو ڕاوەبەری کەجەکەی پی جۆرەنە:

"١٢و ئاداروو ١٩٩٥ جە کۊڵانەو غازی ئیستەنبوڵینە، جە ١٢و ئادارو ٢٠٠٤یچ جە ساحەو قامیشلۆینە جە تەرەفوو هێزەکاو دەوڵەتە فاشیستەکاوە کۊکوشی ئەنجام دریۍ. جارێوەتەر نەفرەت چا کۊکوشیا کەرمۍ و گرڎوو گەشمەرڎا ئاخێزی و دیموکراسی کە چا دوووەکۊکوشیەنە گیانشا جە دەسدا بە رێز و حورمەتۆ یاڎ کەرمێوە.

سیاسەتەکاو کۊکوشی ئارۆ جەتەرەفوو ئاکەپە-مەهەپەیۆ درێژەشا پنەمڎریۆ

کۊکوشی غازی پێسە درێژکراوەو کۊکوشیەکا دەوڵەتوو تورکی قڕکەری کۆلۆنیالیستی جە دژوو کوردی، عەلەوی و سۆسیالیستەکا کریا و پێسە فرەو کۊکوشیەکا تەری، جە کۊکوشی غازیچەنە گەل و کۊشیای هامبەششا کریا ئامانج. چنی وەڵێکۊتەی کۊشیای جە کوردسانەنە، جە تورکیایچەنە کۊشیای سۆسیالیستی و دیموکراسی جە ساڵەکا ١٩٩٠ سەروو بنەماو کۊشیای هامبەشی دەسشپنەکەرد. ۋەروو ئانەی گلێرۊبیەی و یۊگێرتەی کۊشیای کوردسانی و تورکیای ئەقڵیەت و سیاسەتوو فاشیستی و کۆلۆنیالیستیش وست چێروو تەرسۍ، دەوڵەتوو تورکی سەرەتا بە بەکارئاردەی هێزە ملیشیاکا و دماتەریچ راسەوخۆ جە ڕاو هێزە ڕسمیەکا پێسە پۆلیسی و جەندرمەیۆ هجومش کەرد سەروو گەلی، کۊکوشیێوەگەورەش کەرد. ئی سیاسەتەو دەوڵەتی ئارۊیچ نەفاڕیان و جە تەرەفوو ئاکەپە-مەهەپەیۆ درێژەش پنەمڎریۆ. دەسەڵاڎداری فاشیستوو ئاکەپە-مەهەپەی بە سیاسەتوو جەنگی تایبەتی هجووم و کۊکوشی درێژە پنەمڎۆ. بەڵام ئارۊیچ پێسە هێزی مشۊم پێوەرە دژوو ئا سیاسەتا مردمێوە. عالتەرین جواب پۍ کۊکوشیچ ئانەنە کە گەل زیاتەر هامپەیمانی و یۊبیەی دیموکراتیکی ۋێش بەقوەت کەرۆ.

گەرەکشابۍ جە ڕاو کۊکوشی قامیشلۆیۆ جەنگوو دلێینەی بارانۍ ئاراوە

دماو کێڵێوە تۆپەو پەیا جە قامیشلۆنە، هێزە نەژاڎپەرستە نەتەوەپەرسەکۍ هجومشا کەرد سەروو کوردەکا و کۊکوشیێوە دڕنڎانەشا ئەنجامدا. جە ڕاو ئا کۊکوشیەیۆ ئامانجەکە ئانەبۍ کە گەلا بڎا گژۍ یۊترینیرە و بەینوو خەڵکینە جەنگ هۊرگیسنا. وەختۍ تەماشەو ئاژەو سوریای کەرمۍ، ئارۆ عالتەر درک پانەی کریۆ کە کۊکوشی قامیشلۆی چێش بیەن. جەنگوو دلێینەی کە جە ساڵەو ٢٠١١ یۆ دەسشپنەکەرد، جە ساڵەو ٢٠٠٤ینە جە ڕاو کۊکوشی قامیشلۆیۆ گەرەکشابۍ دەسشپنەکەرا، بەڵام جە ئەنجاموو دووربینی و مامەڵەی دروسوو جمیەری و گەلوو کوردی ڕا جە جەنگی گیریا. ئەگەر نزیکایەتی ڕاسوو کوردا نەبیۍ تا ئا وەختە جەنگوو دلێینەی دەسپنەکەرۍ، تەماموو سوریای وڕۍ. ۋەروو ئانەی وڕنای ۋەرنیشتی بە ماناو هۊرشێونایۆ و وڕنای گرڎوو سوریاین. ئەگەر دماو ساڵەو ٢٠١١ یۆ سوریا بە تەمامی نەکۊتەن دەسوو هێزە فاشیستەکا، ئانە جە سایەو مدرامانی و رزگاری ۋەرنیشتیۆ مسۆگەر بیەن. بەڵام دەوڵەتوو سوریای نەتاواش پێسە پێویسی ئەزمون و ئەنجام جە کۊکوشیەکەو قامیشلۆینە بەدەسبارۆ و سیاسەتوو نزیکایەتی جە دەوڵەتوو تورکی قڕکەری و کۆلۆنیالیستی تورکی و حکومەتوو تەیب ئەردۆغانی درێژە پنە بڎۆ.

ئا سیاسەتە سوریاش بەرەو کارەساتی بەرد و بی بە مایۍ وەشبیەو ئاژەو ئارۊی. دەوڵەتوو تورکی و تەیب ئەردۆغانەنۍ کە سوریاشا وستەن ئاژێوە کە ئارۊیچ ڕا مەڎا سوریا چی ئاژەنە رزگارش بۆ.هجوومەکۍ دەوڵەتوو توکی پۍ سەروو ۋەرنیشتی و سوریای و هجوومە بەردەوامەکۍ داعشی و چەتەکا تەری، هجوم و کۊکوشیەکا سەروو ۋەرنیشتی پۍ ئا ئامانجەینۍ. جە لێوەتەرۆ، پەشت بەستەی دەوڵەتوو سوریای بە چارەسەری دیموکراتیکی چنی ۋێڕاوەبەری سەرنیشتی و ۋەرکەوتوو سوریای و هەڵوێسی گونجیا ۋەرا ۋەر بە دەوڵەتوو تورکی، متاوۆ سیاسەتوو ئەرەگیری دەوڵەتوو تورکی بێکاریگەر کەرۆ. سوریا متاوۆ گرڎوو قۊرتەکا ۋێش بە تایبەت پرسوو کوردی جە ڕاو دیموکراتیکبیەی، دیالۆگی و ئەرەنیشتەیۆ چارەسەر کەرۆ. ئێمە بڕواما پانەی هەن و پەشتیوانی چانەی کەرمۍ. عالتەرین جوب پۍ کۊکوشیەکا جە کەسایەتی ئا کەسانە کە جە قامیشلۆنە کوشیۍ، چارەسەرکەردەی قۊرتاکا سوریاین سەروو بنەماو دیموکراتیک بیەی و بنیاڎنیای ژیۋای هامبەشی سەروو بنچینەو یەکسانی و یەکریزی.

دەوڵەتوو تورکی و پەدەکە چی کۊکوشیەیە ۋەرپرسیارێنۍ

دەوڵەتوو تورکی قڕکەری کۆلۆنیالیستی بە هجومەکەیش پۍ سەروو شێلادزێ کۊکوشیش ئەنجامدا. چا هجوومەنە دووۍ دەگانشینۍ بە نامەکا سەعید موبارەکی و ئاراس فەرەجی گەشمەرڎۍ بیۍ. فەرماندەیی قەرارگەو ناوەندی پارێزنای گەلی (نەپەگە)ی و کۆمیتەو پەیوەندییەکا بەریما جە بارەو کۊکوشیەکەیۆ ئەرەیاۋنێوەشا دا. ئا کۊکوشییە ئامانجوو هجوومەکا دەوڵەتوو تورکی پۍ سەروو پانیشتوو کوردسانی ئاشکرا کەرۆ. دەوڵەتوو تورکی جە سەرنیشتوو کوردسانی چێش کەرۆ، گەرەکشا جە پانیشتوو کوردسانیچەنە کەرۊش، گەرەکشا هجووم کەرۆ سەروو پانیشتوو کوردسانی و چایچ قڕکەردەی ئەنجام بڎۆ. پەدەکە جە هەمان وەختەنە هامکاروو قڕکەردەی کوردان کە سەروو دەسوو دەوڵەتوو تورکی ئەنجام مڎریۆ. گرڎوو ئا هجووما بە پەشتیوانی و هامکاری پەدەکەی ئەنجام مڎریا. ۋەروو ئانەی پەدەکە شان بە شانوو دەوڵەتوو تورکی ۋەرپەرسا چا کۊکوشیە".