هامسەرۆکایەتی کۆنسەو ڕاوەبەری کەجەکەی سەبارەت بە دیڎارو ٢٣ۍ ئۆکتۆبەری چنی ڕابەر ئاپۆی  بەیاننامێوە نویسیاش وەڵا کەرڎۆ. جە بەیاننامەکەنە ئاماژە پانەی کریان کە گۆشەگیری بەردەواما و ئەرەیاۋناش کە تا گۆشەگیریی سەرو ڕابەر ئاپۆی بە تەمامی هۆرنەگیریۆ و هەلومەرجو تەندروسی، ئەمنیەت و ئەرەکۆشای پەی ڕابەر ئاپۆی مەیسەر نەکریۆ نمەکریۆ قسۍ سەرو وەڵێکۆتەیەکا بکریۆ.

دەقو بەیاننامەکەو کەجەکەی پی جۆرەنە:

ڕۆو چوارشەمەی جە مانگەو ئۆکتۆبەرینە چەمپنەکۆتەیۍ چنی ڕابەر ئاپۆی ئەنجام دریا، بڕۍ پەیامۍ کە ڕابەر ئاپۆ گەرەکش بۍ چنی ڕای گرڎینی بەش بکریۆ، وەڵا کریاوە، دماو پەنج ساڵا چەمپنەکۆتەی چنی ڕابەر ئاپۆی فرە گرنگا، چی چەمپنەکۆتەیەنە هەواڵ زانای ڕابەر ئاپۆی پەی ئێمە، گەلەکەیما و دۆسەکێماش فرە دڵوەشۍ کەردۍ، بەڵام پېسە ڕابەر ئاپۆ ڕۆشنش کەردۆ، گۆشەگیری هەر مەنەن و بەردەواما.

مشۆم مەرج و هەلومەرجی تەندروسی، ئاسایش و کارو ڕابەر ئاپۆی مەیسەر بکریۆ

ڕابەر ئاپۆ بە ڕۆشنی دیاریش کەرڎ کە ۋەرپرسیاری تاریخی ۋێش جابەجێ مکەرۆ و ئەرەیاۋناش کە ئەگەر هەلومەرجەکۍ مەیسەر بکریا، ئاڎ دەورو ۋێش جە چارەسەری سیاسیی دیموکراتی کێشەو کوردینە گێڵنۆنە، مشۆم ئی هەڵوێسە جە لایەنو گرڎ کەسێوە عال بیاویۆنە، ئانۍ کە پەی ئاشتیی و چارەسەریی کێشەکەی هەڵوێس بەربڕانۍ، بانگەواز مکەرا و پەشتگیری مکەرا مشۆم نزیکبیەیۆ پەنەواز پەی ئی هەڵوێسەو ڕابەر ئاپۆی نیشانە بڎا، پەی ئینەیچ مشۆم وەڵۍ گرڎ چێوێنە هەلومەرجی تەندروسی، ئاسایش و کار مەیسەر بکریۆ، هەتا ئی هەلومەرجۍ مەیسەرۍ نەکریا و چنی ڕابەر ئاپۆی هەلومەرجو دیالۆگی و گفتوگۆی خێرای وەش نەکریۆ، ڕاس نییا کە چەمەڕا بکریۆ ڕابەر ئاپۆ دەورو ۋێش گێڵنۆ و بە نیەتی عالۆ هۆرنمەسەنگیۆ.

دڵنیاکەردەیۆ ئاشتیی بە قبوڵکەردەی ڕابەر ئاپۆی پېسە لایەنێوە مکریۆ

تەرەفو چارەسەری دیموکراتی کێشەو کوردی ڕابەر ئاپۆن، ئاشتیی جە تورکیایچەنە بە قبوڵکەردەی ڕابەر ئاپۆی پېسە تەرەفی مکریۆ، ئێمە پېسە تەڤگەری قەناعەتما چامنەن کە دیموکراتیبیەو تورکیای بە چارەسەری دیموکراتی کێشەو کوردیوە بینیان، چارەسەری کێشەو کوردیچ بە دیموکراتیبیەو تورکیایۆ بینیانۆ و چڼین جارۍ ئی هەڵوێسەما نیشانە دان.

بە ئامانجگێرتەی ۋەرنیشتی پارادۆکسێوە گۆرەن

وچیۆ کە چالاکییەکەو ئەنقەرەی جە لایەنو تەڤگەرەکەیماوە کریان، ئەگەر ئی چالاکییە جە لایەنو هێزەکاو ئێمۆ کریابۆ، هەپەگە ئەرەیاۋنای پەنەواز مڎۆ، بەڵام گەرەکشانە پاسە نیشانە بڎریۆ، بە دڵنیاییوە ئی چالاکییە هیچ عیلاقێوەش بە پرۆسەو وەڵێکۆتەیۆ نییا.

سەرکۆتەی و وەڵێکۆتەی بە ئەرەکۆشای مۍ دی

مشۆم گەلەکەما و دۆسەکێما بە زانای ئی حەقەتینیە هەڵسوکۆت بکەرا، گرڎو ئا چێوا کە تا ئیساتۍ بەدەسما ئارڎێنۍ بە ئەرەکۆشای ئامێنۍ دی، گرڎو دەسکۆتەکا کە ئێمە دەسما وستێنۍ، ئەنجامو ئەرەکۆشای ئێمەن، چیولای گرڎو سەرکۆتەی و وەڵێکۆتەیەکا کە ئێمە بەدەسشا مارمۍ بە ئەرەکۆشای بۆ، مشۆم ئێمە پی هۆشیارییە تاریخیۆ هەڵسوکۆت بکەرمۍ و وەڵێوستەی ئەرەکۆشای بکەرمۍ بە بنەما.