هامسەرۊکایەتیی دەسەو ڕاوەبەرایەتیی کەجەکەی سەبارەت بە هجوومی چەکداری پەی سەروو نوێنەرایەتیی پانیشتوو کوردستانوو کۊنگرەی نەتەوەیی کوردستان (کەنەکە)ی، کە جە ئەنجامنە لە هەولێرنە دەنیز جەودەت بولبون گەشمەرڎە بی، ئەرەیاوناێوەش وەڵا کەرڎۊ.

کەجەکە ئەرەیاونانش، "ئیتر نە بە قسۍ شەرمنانۍ، بەڵکوم بە قەوەتۊ پێویسا گردلێوە ئاماژە بە ڕاسییەکا کەرا. بکەن. ئێمە ناچارێنمۍ بە خیانەت بواچمۍ خیانەت، ئەگەر بتاومۍ ئینەیە کەرمۍ، تاومۍ واچمۍ خیانەت خیانەتا و هەڵوێس نیشانە بدەیمۍ، دماتەر وەڵۍ بە شکسی و کارەساتە گەورەکا گێرمۍ. پاسە یەکڕیزی و یۊبییەی کوردی وەش کەرمۍ،  جە دۊخێوە پێچەوانەنە ڕا بە کارەساتی و خیانەتی گەورەتەری مدەیمۍ، ئانەیچە بۊ بە گەورەتەرین زەرەر و خراپەکاری وەراوەروو دۊخوو کوردی و کوردستانی".

ئەرەیاونایەکەو هامسەرۊکایەتیی دەسەو ڕاوەبەرایەتیی کەجەکەی پەی گەلوو کوردی و ڕای گردینی دیموکراتیکی ئینەن:

"پێسە کە ڕای گردین هەستشا پەنە کەرڎەن، دەوڵەتوو تورکی هجوومەکێش زیاتەرۍ کەرڎێنۍ، چی دمایۊ سلێمانی و هەولێریچنە هجوومۍ کەرۊ، دوۍ ڕوۍ چیوەڵتەر  جە وەرنیشت و شەنگالنە هجوومش کەرد. هجوومەکۍ گەشمەرڎێشا چەنە کەوتێوە و لایێوە تەریچۊ دەوڵەتوو تورکی بۍ مرڎای دژوو  جمیەرەکەیما و گەریلای هجوومۍ کەرۊ. گەریلا دژوو ئا هجووماو  دەوڵەتوو تورکی وێگێری کەرۊ، جە کەسایەتیی ئانیشانە کە چا هجوومانە تیرۊرۍ کریۍ و گەشمەرڎۍ بیۍ، گردوو گەشمەرڎاو شۊڕشی و دیموکراسی بە ڕێز و پەنەزانایۍ گەورەوە یاد کەرمێوە، دڵسۊزی و وەفاداریما بە کۊشیای و یادوو گەشمەرڎا ئەوەخوای کەرمێوە، بەدڵنیاییوە گەلی وەڵاتپارێزنوو کوردستانی  جە حەقوو ئا کرڎەوا جە دوژمنی و ئا خیانەتکارا وەش مەبۊ کە چەنی دوژمنی هەرمانە کەرا.

هجوومەکۍ نەک بە هێزوو دوژمنی بەڵکوم بە پەشتیوانییەکاو خیانەتیوە کریا

بەداخۊ گردوو ئا هجوومانە پەنجۍ خیانەتی دیارەنە، ئا هجوومۍ نەک بە هێزوو دوژمنی، بەڵکوم بە پەشتیوانیی خیانەتکاراوە کریا. ئا هجوومۍ خیانەتکارا کە گەشمەرڎێشا چەنە گناوە، ئێشش فرەن وەلۍ ڕاسیین. پەیوەندیی بارزانییەکا و دەوڵەتوو تورکی خیانەتێوە ئاشکران و ئا هجوومۍ و گەشمەرڎەبییەیۍ گردش هینۍ ۊم گرد کەس ئا ڕاسییە بوینۊ و قبووڵش کەرۊ. ئەگەر ئا دۊخە زیاتەر چەمپۊشییش وەنە کریۊ و هەڵوێستی پێویست نیشانە نەدریۊ ئا وەختە ئێمە پێسە گەلی گنمۍ دۊخێوە ئازاراویتەر و خراپتەر. ئەگەر هەڵوێستی پێویست دژوو خیانەتی نیشانە نەدریۊ، ئا دامۍ  سەروو خیانەتیوە سازە کریێنە میاوۊ ئەنجام. کورڎێوە نییا، کە نەزانۊ ئا دامۍ چێشەنە. ئا دامۍ پلانەو دەوڵەتوو تورکینە پەی دماییئارڎەی بە کوردی و کورڎایەتی جە ڕاو رێگەی کۊکوشی و جینۊسایدیوە. دەوڵەتوو تورکی و دەسەڵاتداریی ئاکەپە-مەهەپەی ئا پلانا میاونا یاگۍ. سیاسەتی بنچینەیی دەوڵەتوو تورکی مەگەر ئانە نییا؟ ئاشکران کە ئانەنە. ئانۍ چەنیش جماوە هامکارۍ ئا پلانێنۍ. ئانەیچە ئاشکران. پەوکای ماچمۍ ؛ سەرباروو ئانەیە کە موینییۊ، کە پەیوەندیی بارزانییەکان چەنی دەوڵەتوو تورکی هامکاری و خیانەتا، ئا دۊخە بە بەرجەستەیی باس مەکریۊ و هەڵوێستی پێویس نیشانە مەدرییۊ.  تا ئی وەختە بەدڵنیاییوە ئانە نەکریان. پێسە ڕاگێری چانەیە کریان، کە گەل هەڵوێست و ناڕەزایەتیی قەوەت وەراوەروو خیانەتیوە نیشانە بدۊ.  

پلانەو دەوڵەتوو تورکی ئەرەگیری و دەسملەرەگێرتەی تەماموو پانیشتوو کوردستانین

دماو ئانەیە هاکان فیدان سەرۍ عێراقی و پانیشتوو کوردستانیش دا و دیدارێش کەرڎۍ، هجوومەکۍ زیاتەرۍ بیۍ. ئا ڕووەدایۍ جە ڕوای ویەرڎەنە هەرێموو برادۊسینە ڕووەشا دا بەرش وزا، کە پلانۍ تازۍ بریا ڕاوە، کە دەوڵەتوو عێراقیچ چا پلانانە بەشدارییش پەنە کریۊ. جە هەرێموو برادۊستینە هەوڵۍ دریا بلا دلۍ مەیدانەکاو گەریلایۊ، فشار وزیۊ سەرووگەلی کە ماڵ و حاڵیش جیا بازۊ. ئاشکران کە ئینە ئامادەکاریین  پەی هجوومی و بەشێوەن جە پلانەو ئەرەگیریی دەوڵەتوو تورکی. ئانە کە کەرکووکیچەنە کریۊ کەرکوکیش دەکرێت بەشێوەن چا پلانۍ. بەپێچەوانەو بانگەشەکاو بارزانییەکاوە ئا هەوڵۍ پەی نەجاتدای کەرکووکی نییەنۍ، بەڵکوم پەی ورگێرتەی پشکێوە نەوتەو کەرکووکینۍ، دایشا بە دەوڵەتوو تورکی. ئا پلانۍ سەروو کەرکووکیوە میاونیا یاگۍ پلانۍ دەوڵەتوو تورکینۍ.  وەروو ئانەیە دەوڵەتوو تورکی بە چند قسۍ ناڕەزایەتیی گولانەی ڕوودایەکەی پەرڎەپۊش کەرۊ، چونکوم دەوڵەتوو تورکی ساعیبوو مامەڵەکەرڎەێوە چانەی نییا، کە گەرەکش بۊ کەرکووکی پێسە بەشێوە جە کوردستانی، کێشەکاش چارەسەر کریا. پلانەو دەوڵەتوو تورکی ئەرەگێرتەی تەماموو پانیشتوو کوردستانین.

جگە جە چند شارێوە، کوردستان لاو بارزانییەکاوە کەرستێوەن پەی بازرگانی

بارزانی بە تەمامەتی جە سیاسەتەکاو دەوڵەتوو تورکیوە تلیان چۊوە. وێش پێویس مەکەرۊ، کە باسوو سیاسەتەکاو دەوڵەتوو تورکی و مامەڵەکەرڎەیشا وەراوەروو کورڎاوە کریۊ. مشۊم ئیتر ئا ڕاسییەو بارزانییەکا لاو گردوو کورڎاوە بوینییۊ. بە واتەی ئانەیە بارزانی و پەدەکە کورڎێنۍ، ئا ڕاسییە پێسە پێویسی مەوینییۊ. هەرپاسە دۊخێوە دەروونییچ خوڵقییان.  ئینە جە وەختێوەنە بارزانییەکۍ حیچ ئامانج و نیگەرانیێوەشا پەی کوردستانی نییا. تەنیا چند شارێوە کوردستانی چێروو کۊنتڕۊڵیشانە با بەراشاڕاوە پەی وێشا، ئیتر گرنگ نییا پەی وارڎەی  خێرەو چند شارێوە سەرجەموو مەنتێقەکای تەروو کوردستانی لاشاوە ئامێرۍ و کەرەسەو بازرگانی و مامەڵەی و سەوداینۍ. ئەر پاسە نەبیۍ و ئەر دەرڎە و مەراقشا کوردستان بیۍ، هاکان فیدانیی گێرێنۍ باوەشی؟ هاکان فیدان بکوشا. گرد ڕوۍ لەیەکش مدۊوە بزانۊ کە چەنی متاوۊ خاستەر کورڎا کۊکوش کەرۊ. بارزانی خێرامای وەنەو بکوشێوە چینەیە کەرۊ و گێرۊش باوشی و بۊ بە هامدەمش، ئینە وەسێن پەی ئانەیە کە خەڵک بەڕاسی بارزانییەکا بشناسۊ.

 دژوو خیانەتی هەڵوێستی ڕاس و پێویس نیشانە مەدریۊ

ئێمە گەرەکامەن ئانەیە نۊعۍ دەسنیشان کەرمۍ، ئەگەر تا ئیساتۍ دژوو خیانەتی هەڵوێستێوە  ڕاس و پێویس نیشانە دریۍ و ڕا وەنەو ناڕەزایەتیی گەلی  نەگیریۍ، دۊخەکە نەیاوۍ ئی ئاستە، دوژمن نەتاوۍ  گنۊ دلۍ پلانێوە هجوومبەرانۍ چینێوە، ئا گردوو ئێشییە نەچەشییۍ و ئا گرد زەرەرە نەگنێوە. سەبەبەکەیچش ئانەن، کە ڕۊشنویرۍ، نویسەرۍ و هونەرمەندۍ کە هۊشمەندی، دەنگ و ویژدانوو گلێرگەینۍ، ڕێکوزیێکۍ و پارت و ئەرەمەرزیێکۍ دژوو خیانەتی هەڵوێستی پێویسشا نیشانە نەدان. ئا دۊخە قەوە بە بە خیانەتی بەخشۊ و بۊ بە مایۍ ئانەیە خیانەت ڕۊ دماو ڕۊی قووڵتەر بۊوە. ئا ڕاسییە مشۊم بوینییۊ.  گرد کەس پرسیارە جە وێش کەرۊ، کە خیانەت ئا ئازایەتییەشە چکۊو ئارڎەن و شۊنەو جوابوو ئا پرسیارێرە گێڵۊ. ئەگەر ئانە بە بێشک و گومان کریۊ ئا وەختە گردکەس ئەنجامێوەش دەس گنۊ.

ناچارێنمۍ بە خیانەتی واچمۍ خیانەت

هەولێرنە هجووم کریا سەروو نویسگەو کەنەکەی، ئەنجامنە نوێنەروو کەنەکەی پانیشتەنە هامڕا دەنیز جەودەت بولبول گەشمەرڎە بی. ئانە فرە مانادارا، کە هجووم دژوو کەنەکەی کریان. کەنەکە پەی دەسەبەرکەرڎەی یۊبییەی نەتەوەیی کورڎا ئینا دلۍ هەوڵداێوە گرنگینە. ماوەی ویەرڎەنە  پا ئاڕاستە هەرمانۍ فرە گرنگۍ کریێنۍ. یۊشا سازکەرڎەی کۊنفڕانسی سەد ساڵەو پەیمانەو لۊزانی بۍ شاروو لۊزانینە. کە دلێشنە واتەواچی گرنگۍ ئامۍ ئاراوە، پەی یۊبییەی و یەکڕیزیی گەلوو کوردی قەرارۍ گرنگۍ بەرۍ شیۍ. پەیمانەو لۊزانی بە ماناو پارچەکەرڎەی کوردستانی و ئەوەڵوو نکۊڵی و سڕیەیۊ گەلوو کوردینە. کۊکوشیی کورڎا جە ڕاو ئا پەیمانێوە دەسش پەنە کەرد. جە سەدەم ساڵەو ئا پەیمانێنە، چا شارەنە کە پەیمانەکێش چەنە  ئیمزا کریا هەرمانۍ چینۍ، دیاریکەرڎەی ئا بناغە سەرەکییا، کە پەیمانەو لۊزانی جە جینۊسایدی و دوژمنایەتیی کورڎا پەشتیش پەنە بەسییۊ و دەسنیشانکەرڎەی ئیرادەو ئەرەمەرزنای یۊبییەی کورڎا دژوو ئادی، فرە گرنگ بۍ. وەلۍ بارزانی بەشدارییش چا چا کۊبییەیۊنە نەکەرد. وەروو ئانەیە ئەوەی بارزانییەکۍ حیچ مەراق و پەرۊشیێوەشا پەی یۊبییەی کورڎا نییا. بەپێچەوانەوە داراو ورسونیشتێوە چانەینۍ، کە سەروو جینۊسایدوو کورڎاوە مژیوا و گەرەکشانە ت ئانە بەرڎەوام بۊ. ئەگەر پاسە نەبیۍ پێسە گردیما ئادێچۍ دڵشا پەی یۊبییەی کورڎا دۍ وەنە، ئشیا ئادیچۍ پێسە ئێمە پێسە پا هەرمانۍ دڵوەشیۍ بیێنۍ. وەلۍ دۊخوو بارزانییەکا پێسە نییا. نەک هەر بە قسۍ ئێمە، بەڵکوم کرڎەوەکێشا نیشانەشا مدا کە چێشێنۍ. تاکە چێوێوە کە ماچاش، ئانەنە کە مشۊم ئینە بوینییۊ، نەک بە  قسۍ شەرمنانۍ، بەڵکوم بە بەقەوەتی مشۊم ئیتر گرد کەس ڕاسییەکەی دەسنیشان کەرۊ. ئێمە ناچارێنمۍ بە خیانەتی واچمۍ خیانەت. ئەگەر تاومۍ ئینەیە کەرمۍ، بە خیانەتی واچمۍ خیانەت و هەڵوێس ورگێرمۍ، ئا وەخت ڕاگێری جە شکسی و دۊڕنای و کارەساتی گەورەی کەرمۍ. پێسە متاومۍ یۊبییەی کورڎا بیاونمۍ یاگۍ. جە دۊخێوە پێچەوانەنە ڕا وەرڎەموو کارەساتی و خیانەتی گەورەتەرینە کریاوە، ئینەیچە بۊ بە زەرەر و خراپەکاریی گەورە وەراوەروو دۊزوو کوردی و کوردسانی.

هجوومەکەو سەروو فڕۊکەخانەکەیچ بە ئامانجوو زیاتەر وەڵابییەیۊ میتین هەرێموو سۊرانینە

سەبارەت بە هجوومەکەو سلێمانییچ گەرەکمانە واچمۍ، بارەو ئا هجوومیوە تا ئیساتۍ زانیاریی وەرفراوان و تەمامەتیما لاوە نییا.  زانیاری ئانە هەن، کە هجووم کریان سەروو فڕۊکەخانێوە و هجوومەکە گەشمەرڎێش چەنە کەوتێنێوە. هجوومەکاو سەروو سلێمانی پەی چەمتەرسنای خەڵکیوو سلێمانیینۍ، تا پێسە مەنتێقەو بادینانی دەوڵەتوو تورکی و میت هەرێموو سۊرانیچنە وەڵۍ باوە، هەوڵداێوەن پەی بەشداریپەنەکەرڎەی یەنەکەی جە پەیوەندیی هامکارینە چەنی دەوڵەتوو تورکی، پێسە پەدەکەی. وەروو ئانەیە خەڵکی وڵاتپارێزن و نیشتمانپەروەروو سلێمانی و هەرێموو سۊرانی تا ئیساتۍ دەستبەرڎارۍ هەڵوێستی نیشتمانپەروەری نەبیێنۍ، هجوومێوە تازە کریان سەرشا، بەتوندی ئا هجوومی  شەرمەزار کەرمۍ. بڕوای تەمامەما هەنە کە خەڵکوو مەنتێقەو سۊرانی و سلێمانی درێژە پا هەڵوێستە وەڵاتپارێزنییەیشا مدا و بە حیچ نۊعێوە گومانیما چانەیە نییەنە.  جە هجوومەکاو سەروو سلێمانی و هەرێموو سۊرانینە هەرپاسە پلانەکێچ، چا بارەوە متاوییۊ هەست پانەیە کریۊ، کە دەوڵەتوو تورکی ئینا دلۍ چە لەیکدایۊێوەنە. دژوو ئا هجووما وەڵۍ گرد چێوێوەنە مشۊم خەڵک جە مەنتێقەو هەرێموو سۊرانی و سلێمانیینە هەڵوێسشا بۊ.  

ئێمە ئا هجووماو دەوڵەتوو تورکی کە سەروو دەساو خائیناوە کەرۊشا، بەتندی شەرمەزار کەرمۍ. مشۊم ئیتر گرد کەس وەراوەروو خیانەتیوە هەڵوێسی قەوەت برمانۊ. دەوڵەتوو تورکی جە سیاسەت و کۊنسێپتوو جینۊسایدوو کورڎانە پەشتی بە خیانەتی بەسۊ و پێسە بەرۊش ڕاوە. ئیتر ئینە بەڕۊشنی دیارا. تاکە ڕاو مردنای ئیسیاسەتەیە و شکسپەنەئارڎەی پی کۊنسێپتەیە ڕاگێریکەرڎەی و وەرگێرتەین بە خیانەتی. ئەگەر ڕێکوزیا وڵاتپارێزنە کوردییەکۍ، حزب، رۊشنویر، نویسەر، هونەرمەندۍ دژوو خیانەتی هەڵوێستی قەوەت و دیارشا بۊ و گەلوو کوردستانی هەڵوێستی قەوەتش بۊ ئا وەخت وەر بە خیانەتی گیرییۊ، سنوورڎار و بێکاریگەر  بۊ و جارێوە تەر داواما ئەوەخوای کەرمێوە، وەڵاتنە و بەروو وەڵاتیچۊ گەلەکەما مجییۊرە سەروو جادەکا، دژوو خیانەتی ناڕەزایەتیی قەوەت نیشانە بدۊ، داوا وەنەو حزب، ڕێکوزیا، ئەرەمەرزیا و کەسایەتییەکا کەرمۍ، کە پەی ئا مەبەستی سەرمەشقۍ با".

س.ز