هامسەرۆکایەتی کەجەکەی ئەرەیاۋناش ئا هەنگامې کە ڕابەر ئاپۆ جە ئېمەش گەرەکێنې جابەجاشا مکەرمې و واتش؛ ئێمە ئی هەنگامە تازې بە ۋەرچەمگێرتەی گەلەکەیما و گەلا منیەیمې.بەڵام مەشۆم چانەی بیاوانە کە پرۆسەکە بەشێوێوە یەکلایەنە وەڵې نمەگنۆ.
هامسەرۆکایەتی کۆنسەو ڕاوەبەری کەجەکەی جە ٩و تەمموزو ٢٠٢٥ بە ئەرەیاۋنێوە نویسیا جوابو بانگەوازە ڤیدیۆییەکەو ڕابەر ئاپۆیش داوە کە ئینە دەقو ئەرەیاۋناکەیا:
ئەرەیاۋناو هامسەرۆکایەتی کۆنسەو ڕاوەبەری کەجەکەی:
"ڕابەر عەبدوڵا ئۆجالان پەی وەڵێوستەی پرۆسەو ئاشتی و گلېرگەی دیموکراتیکی، بانگەوازێوە تازەش کەرد. ئی بانگەوازە هېزی وەڵا کریاوە و ڕای گرڎیی جە دلېینەکەیش ئاگاڎارکریاوە. وەڵې گرڎ چێوێنە وەشحاڵێنمې کە سەڎا و دیمەنو ڕابەر عەبدوڵا ئۆجالانی یاوا بە جبەری. ئێمە باوەڕیما هەن کە ئینە پەی گەلەکەیما و گرڎو دۆساما بەهەمان شێوە یاگې دڵوەشی بیەن. پی بۆنۆ کە ڕابەر عەبدوڵا ئۆجالان جە لایەنو گەل و دۆساوە بە جۆشو خرۊشۆ گرنگیش پنە مڎرییۆ، بە ڕێزو ئیحترامۆ سڵامشا ۋنە مکەرمې و حەسرەتو وەشەسیایی و پنەزانای ۋێماشا پێشکەش مکەرمې.
ئی بانگەوازە کە جە لایەنو ڕابەر ئاپۆیۆ دەسش پنەکەردەن، دووەم بانگەوازا جە دماو بانگەوازی ٢٧و شوباتو ٢٠٢٥. ئی بانگەوازە هامشێوەو بانگەوازییەکەو ٢٧و شوباتی تاریخیا. ڕابەر ئاپۆ چا بانگەوازە تاریخیەنە پڕۆسەو "ئاشتی و گلېرگەی دیموکراتیک"ش جە ڕوو ڕێباز و مەرامە بنەڕەتیەکاشۆ گلېرکەردۆ، ئا وەڵێکۊتەیې تا ئیساتې یاوێنې بەرهەم و ئا هەنگامە پەنەوازیې پەی ئایندەی مەشۊم بنریا، پێشکەش کەرد. ڕابەر ئاپۆ جارێوەتەر بە واتەی: "بەردەوام پاڵپەشتی جە 'بانگەوازو ئاشتی و گلېرگەی دیموکراتیک'ی مکەرو کە جە ٢٧و شوباتو ٢٠٢٥ ئەرەیاۋېیا" ئیرادەی بەهێز و ئاشکراو ۋێش نیشانەدا. ئێمە پېسە تەڤگەری ئازادی ئی بانگەوازە تاریخیەو ڕابەر عەبدوڵا ئۆجالانیما هۊرسەنگنا و بەپەنەوازش مزانمې ئا دەرەنجامې کە سەرش یەکدەنگێنمې بە ئاشکرا پەی گەلەکەیما و ڕای گرڎیی وەڵا بکەرمېوە.
ئێمە پاڵپەشتی تەمامو وێما پەی پرۆسەو "ئاشتی و گلېرگەی دیموکراتیکی" کە بە بانگەوازو ٢٧و شوباتو ٢٠٢٥ ئەرەیاۋییا، نیشانە دا و بە تەمامی ئەرکەکاما جابەجێ مکەرمې. تا ئیساتې بە گوێرەو باوەڕی ۋێما پەی بانگەوازو "ئاشتی و گلېرگەی دیموکراتیک"ی و ئەرکی تاریخی کە پەی بەدیئاوردەی مەرامەکا ئی بانگەوازیە، قەراری ستراتیجیما دان و چا چوارچێوەنە هەنگامەما هۊرگێرتێنە. گەلەکەما بە وریایی و فامۆ و بە باوەڕیێوە بەرزۆ پەشتەو ئی پرۆسە تاریخیەیۆ کە ڕابەر ئاپۆ پەرەش پنەدان مردان. ئەچی قۆناغێنە کە یاوێنمێش پنە، کۆمارو تورکیای و حکومەتو ئیساتې هەڵای بەگوێرەو پەنەوازیەکا پرۆسەکەی و ئا هەنگامې کە ئێمە گێرتێنمانە ۋەر، حیچ هەنگامېوەشا هۆرنەگێرتەن. ئێمە ئینیشا موینمې و مزانمې. چنی ئانەیچ، بە پاو ئا باوەڕەی کە بە مەرامەکا 'بانگەوازو ئاشتی و گلېرگەی دیموکراتیک'ی بەدەسئامێنې، ئێمە پاڵپەشتیما جە پرۆسەکەی کەردەن. هەرپاسە بە فامێوە گۊرۆ هەوڵما دا ئی هەڵوێسەیە درێژە بڎەیمې. باوەڕیما چامنەن کە ئا کۊششېما کە چی بوارەنە دیارێنې، پەی ئی بانگەوازە تاریخیە تازەیە، ئەرەیاۋنمېش کە هەنگامەی ڕۊشنتەرە کە ڕابەر ئاپۆ جە ئێمەش گەرەکەنە جابەجێش مکەرمې. ئێمە ئی هەنگامە ڕۊشنې، پېسە هەنگامەکا تەری کە هۊرماگێرتێنې، پەی نیشاندای پېوەس بیەیما بە ڕابەرعەبدوڵا ئۆجالانی نیشانە مڎەیمې و پا باوەڕییەی کە گەلەکەما و مرۆڤایەتی بە ڕاو مانیفێستو گلېرگەی دیموکراتیکی بە ئازاڎیی بژیۋا، هەنگامە هۊرگێرمې.
ڕابەر ئاپۆ جە بانگەوازییەکەو ١٩و حوزەیرانو ٢٠٢٥ ینە ئەرەیاۋناش، پەنەوازا گرڎ کەسې ۋەرپرسیاری ۋێشا جابەجێ بکەرا و ئا هەنگامە پەنەوازیې کە مەشۊم بنریا دەس نیشانې کەردې و ئانەی کە چنی پرۆسەکە بلۊ وەڵێوە وست ڕووە. پۊکەی پەنەوازا دەس نیشانکەردەیەکا ڕابەر ئاپۆی ۋەرچەم بگیریا و چنەشا بیاومێنە. ئی بانگەوازە تەنیا عیلاقەش بە ئێمەوە نییا، بەڵکم جە هەمان کاتەنە پەی دۊڵەتیچا، بەتایبەتی پەرلەمان، گرڎو ئەرەمەرزیا سیاسییەکا و کەسانی ۋەرپەرسیچ گێرۊوە. تا بە ئارۆ ئێمە بەگوێرەو ۋەرپرسیاری تاریخی ۋێما و بە فامێوە بەرزۆ هەنگامەی ستراتیجیەما هۊرگێرتێنە.
ئیساتې، قەرارما دان ئا هەنگامې کە ڕابەر ئاپۆ جە ئێمەش گەرەکێنې، جابەجێشا بکەرمې. ئێمە ئی هەنگامە تازې بە جە ۋەرچەمگێرتەی گەلەکەیما و گەلا منیەیمې. بەڵام مەشۊم چانەی بیاومېنە کە پرۆسەکە بە شێوێوە یەکلایەنە یان تەنیا بە هەنگامنیای ئێمە مەلۆ وەڵێوە. پۊکەی پەنەوازا بە شێوێوە ڕاس و دروس جە پرۆسەکەی نزیکۍ باوە و هەنگامەی پنەوازە هۆرگیریۆ. سەرو ئا بنەمایې مەشۆم گێرتەی ڕابەر ئاپۆی کە پرۆسەو گلېرگەو دیموکراتیکیش پەرە پنەدان، دمایش بې و ئازاڎ بکریۆ. چونکی ئەر ڕابەر ئاپۆ ئازاڎ بکریۆ، ئی پرۆسە متاوۆ بلۊ وەڵێوە و بیاوۆ بە مەرامەکاش. هەرپاسە بە پێچەوانۆ محاڵا بە بەردەوامبیەو ئاژەو ئیساتې پرۆسەکە بلۊ وەڵێوە. دووەم، پەی سیاسەتو دیموکراتیکی و سەروەری یاسای، پەنەوازا گرڎو ئا هەرمانا کە پەنەوازێنې بکریا. پەنەوازا سیاسەت و پەڕلەمان چی بوارەنە دەسوەڵێوستەی بکەرا و پا جۆرە هەنگامە هۆرگێرا. پرۆسێوە و وەڵێکۊتەیې ماناڎار تەنیا پی جۆرە بەدی مې.
جە ئاکامەنە، جە کاتێنە کە ئێمە ئیرادەو ۋێما پەی هۊرگێرتەی ئی هەنگامە تاریخیې نیشانە مڎەیمې، هەرپاسە بە پەنەوازش مزانمې بە هەمان فامو ۋەرپرسیاریۆ ئانەی کە پەنەوازا بکریۆ ئیسرارش بکەرمېوە. هیواڎارێنمې ئانەی واتەنما چنەش بیاوانە و چا بارۆ هەرمانەش سەر بکریۆ. ئێمە پا باوەڕیۆ هەنگامە هۊرگێرمې کە پېسە چنی تا ئیساتې هۊرماگێرتێنە، چیولایچ پەی ئانەی دەسکەوتی گۊرە پەی گەلەکەیما بۆ، بەردەوامې بیمې. ئێمە هەڵای پا باوەڕیەی کە ئی هەنگامې جوابو وێش مێزۆوە و پرۆسەو "ئاشتی و گلېرگەی دیموکراتیک" سەرگنۆ هەنگامە هۊرگێرمې.
١٠و تەمووزو ٢٠٢٥
هامسەرۆکایەتی کۆنسەو ڕاوەبەری کەجەکەی."
