کەجەکە هجوومەکاو دەوڵەتوو تورکیش شەرمەزارێ کەردێ و واتش: "هەرمانە گنۆ سەروو شانەو گردوو چینەکاو گلێرگەی، گردوو هێز و لایەنە سیاسییەکاو پانیشتوو کوردستانی و عێراقی، کە وەراوەروو هجوومەکاو دەوڵەتوو تورکیای و خیانەتوو پەدەکەی هەڵوێست ورگێرا."
کۆمیتەو پەیوەندییەکاو کۆما جڤاکێن کوردستان کەجەکەی، دەربارەو هجوومەکاو دەوڵەتوو تورکی، پەی ڕای گردینی ئەرەیاوناێوەش وەڵا کەردۆ و بەشێوەشنە ئامان: " بێگومان ئی کۆکوشییە، کە ئارۆ شێلادزێنە ڕووە شدا، ئەنجاموو کۆبییەیۆ ئەنتالیاین، کە دلێشنە دەسەڵاتداراو پەدەکەی مێمانێ ئەردۆغانی و هاکان فیدانی بێنێ و وەعدوو بەکرێگیریای و خەیانەتیشا دێ پەنە. ئەگەر ڕەزامەندی و ئەرێکەردەی و سیخوڕیی پەدەکەی و بنەیانەو بارزانی نەبۆ تورکیا هیچ وەختێو نمەتاوۆ پاسە خەڵکی بیتاوانی گەشمەردە کەرۆ."
درێژەو ئەرەیاونایەکەو کۆمیتەو پەیوەندییەکاو کۆما جڤاکێن کوردستان کەجەکەی پێسنەن:
" پەی ڕای گردینێ و جارێوە تەر بۆنەو بۆردومانوو سوپای فاشیستێ و ئەرەگیکەرەو تورکیایۆ ٢ هاموەڵاتێ پانیشتوو کوردستانی خەڵکوو شێلادزێ بە نامەکاو "سەعید موبارەک دێویکی" و "ئاراز فەرەج زێباری " گەشمەردێ بیێ و یۆ تەریچ بریندار بی. مانگێوە چێوەڵتەریچ دوێ هاموەڵاتێ تەرێ خەڵکوو ئاکرێ بە نامەکاو "عارف تەها "ی و"بەشیرعومەر عەلی"ی سوپای ئەرەگیرەو تورکی گەشمەردێ کەردێ. دلێ مانگێوەنە ئی چوار هاموەڵاتێ دەڤەروو بادینانی تورکیای گەشمەردێ کەردێ. هەمان وەختەنە چی مانگێنە چند هاموەڵاتێوە تەرێچ هەرێموو سۆران و سلێمانیینە بیێ قوربانیی هجووم و تیرۆروو دەوڵەتی فاشیستوو تورکیای.
بێگومان ئی هجووم و تیرۆر و ئەرەگیریێ دەوڵەتوو تورکیای ئەنجاموو سیاسەت و زیهنییەتوو جینوسایدی و کۆکوشیین، کە زیاتەر جە سەد ساڵان سەروو گەلوو کوردیوە پەێڕەوشا کەرۆ و گەرەکشا بییەی و شناسنامەو کوردی سەروو نەخشەو جیهانیوە بسڕۆوە. تورکیا پەی بەدیئاردەی ئی ئامانجەیشو خۆی پێویسش بە کوردی بەکرێگیریای و وێورەشی هەن، کە بۆ بە کەواسوروو وەروو سوپاکێش، سیخوڕییش پەی بکەرۆ و گردوو تاوانەکاش پەی پۆشۆ. بەداخۆ دەسەڵاتوو پەدەکەی نەک حەر لە دژوو ئی کۆکوشییانە هیچ هەڵوێستێوەش نییا، بەڵکوم بە گوتاری سیاسی و هەم جە ڕاو چاپەمەنی و میدیای دەسەمۆیۆ ئی تاواناو تورکیایە پەردەپۆش کەرۆ، پاکانەشا پەی کەرۆ و ڕەوایەتییشا مدۆ پەنە و پێسە گەورەتەرین خزمەت بە دەوڵەتی فاشیستوو تورکیای کەرۆ. وەختێوەنە کە دەسوو دەسەڵاتی فاشیستوو تورکیای بە ونەو کوردی سوورا و ڕۆڵاو کوردی گەشمەردێ کریا دەسەڵاتداراو پەدەکەی دەس دلێ دەسوو ئەردۆغانی و هاکان فیدانینە ئینێ کۆوەبییەینەی. بێگومان ئی کۆکوشییەی کە ئارۆ شێلادزێنە ڕووەش دا، ئەنجاموو کۆبییەیۆ ئەنتالیاین، کە دەسەڵاتداراو پەدەکەی مێمانێ ئەردۆغانی و هاکان فیدانی بێنێ و وەعدوو بەکرێگێریایی و خەیانەتیشا دێوە پەنە. ئەگەر ڕەزامەندی و ئەرێکەردەی و سیخوڕیی پەدەکەی و بنەیانەو بارزانیی نەبۆ تورکیا هیچ وەخت نمەتاوۆنێ پاسە خەڵکی بیتاوانی گەشمەردە کەرۆنێ.
پەدەکە تەنیا سیاسەتوو کوردیش بەش نەکەردەن، تەنیا بە خەندەقدایوەنەی کوردستانش بەش نەکەردەن، بەڵکوم بە هەڵوێست و سیاسەتوو وێش ڕەنگەکێچش بەشێ کەردێنێ، ڕەنگەو ونەو کوردیش بەشە کەردێنە و گەرەکشا ئێش و ئازارەکاو کوردیچ بەش کەرۆ. پەوکای پێویسا گردما بواچمێ، کە ئێش و خەموو شیلادزێ و ئاکرێ و سلێمانیی ئێش و خەموو گرد کوردێوە نیشتمانپەروەرین و یەک هەڵوێستێ بیمێ. چێنە ئەرک گنۆ سەروو شانەو گردوو گلێرگەی، ژەنی، گەنجێ و گردوو هیز و لایەنە سیاسییەکاو پانیشتوو کوردستانی و عێراقی، کە وەراوەروو هجوومە تیرۆریستییەکاو دەوڵەتوو تورکیاین و بەکرێگیریای و خەیانەتوو پەدەکەی هەڵوێست ورگێردێ. بەتایبەت چی قۆناخەنە هەلوێستوو ڕۆشنویرا، هونەرمەندا، نویسەرا، ڕێکوزیایەکاو گلێرگەی مەدەنی، ڕۆنامەنویسا و قەڵەمە ئازادەکا فرە گرنگ بۆ. پێویسا ئانەیە بزانمێ کە حەرهەڵوێستێوە متاوۆ گیانوو هاموەڵاتێوە بپارێزنۆ و حەر بێهەلوێستی و بێدەنگیێوەیچ ڕاوەشکەربۆ تا هاموەڵاتێ زیاتەرێ بابە قوربانیی کردەوە تیرۆریسییەکاو ئەردۆغانی و تورکیای. هەرپاسە دەوڵەتوو عێراقی و دەسەڵاتداراو ئی وەڵاتەیە پێویسا وەراوەروو تیرۆروو هاموەڵاتاو کوردینە بێدەنگێ نەبا و گیانوو کوردی و بییەی و ئازادی و کیانوو کوردی نەکەرا قوربانیی کەردەیۆ ڕاو گەشەپەنەدای پەی پیلانە گڵیاوەکاو ئەردۆغانی.
ئاخرۆ، ئی کۆکوشییە کە ئارۆ شێلادزێنە ڕووەش دا بەتندی شەرمەزار و ڕسوا کەرمێ و وەعدوو و پەیمانە مدەیمێ، کە بە پەرەدای بە کۆشیای و مدرامان هەقەو ونەو گەشمەردە سەرەبەرزەکاما کەرمێوە. هەرپاسە پەرسە و سەرەوەشیما ئاراستەو گردوو گەلوو کوردستانی و بەتایبەت گەلی وێگیروو شێلادزی و بنەیانەی بەڕێزوو گەشمەردا "سەعید موبارەک دێویکی" و" ئاراز فەرەج زێباری" کەرمێ و وێما بە هامبەشوو خەم و پەژارەیتا مزانمێ. ئاواتەوازێنمێ گیانوو گەشمەردەکاما بە بەهەشتی بەرینی شاد بۆ و بە هومێدوو هەرچی زووتەروو خاسبییەیۆ و تەندروسی پەی بریندارەکا.
چەنی ڕێزی
- کۆمیتەو پەیوەندییەکا کۆما جڤاکێن کوردستان کەجەکە
٨وو ئاداروو ٢٠٢٤."
