دەسەو ڕاوەبەریی گلێرگەو ئێزدی ئەورووپانە (کەجەئێ-ئە)، ئەورووپانە هجوومەکەو ١٧و ئەیلوولیش شەرمەزار کەرد.

ئەرەیاونایەکەو کەجەئێ-ئەینە ئامان:  

" ١٧و ئەیلوولوو ٢٠٢٣ینە فڕۊکەی سیخوڕی بێفڕۊکەوان، کە یەکلا بیەنۊ سەر بە تورکیاین، هجوومش کەرد سەروو سەیارێوە پارێزنای گلێرگەی ئێزدی و ئەنجامنە ٣ ڕۊڵۍ ئێزدیۍ گەشمەرڎۍ بیۍ.مشۊم گردوو دنیۍ بزانۊ کە ئەرڎۊغان هجووم مەکەرۊ سەروو هێزێوە تیرۊریستی'، مشۊم گرد کەس بزانۊ، ئەرڎۊغان هجووم کەرۊ سەروو گلێرگەی ئێزدی و جەنگەواناو ئازادی کەرۊ ئامانج. مزانییۊ کە گلێرگەی ئێزدی و جەنگەوانەکێش دژوو داعشی وێگێرییشا کەرڎەبۍ و خاکی مەبارەکوو وێشا دژوو ئا ڕێکوزیا دڕندەیە ڕزگار کەرڎەبۍ. ئا هجوومۍ وەرگێری جە تیرۊرۍ نییەنۍ، بەڵکوم خودوو هجوومەکا تیرۊریستیینۍ.

ئانە سەیرا ئانەنە، کە حکومەتی ناوەندیی عێراقی و تۊڕەی هامکاری و خیانەتکارەکا، کە بانگەشەو باڵادەسیی پانیشتوو کوردستانی کەرۊ، بە ئاشکرا هامبەشوو ئینەینە. پێکئاما هەرێمایەتییە ئیمپریاڵیستی و فاشیستییەکۍ، کە بە سیستماتیک گەل و پێکئاما ئایینیەکۍ جبەروو وێشا دلێنە بەرا، هەوڵۍ مدا جوگرافیاو وەرکەوتوو دلێڕاسەی فاڕا پەی جەحەننەمی.

ئانە کە مایۍ قبووڵکەرڎەی نییەنە ئانەن، کە وەراوەروو ئا ئەقڵیەتە دڕندانەیۊ جیاتیی ئانەیە هەڵوێست و ناڕەزایەتی نیشانە بدریۊ، بە پێچەوانەوە هێزە جیهانییەکۍ پەشتیوانی چا فاشیزم و تۊتالیتاریزمەیە کەرا. جوگرافیا و گەلوو شەنگالی، کە ڕێکوزیاێوە دژەئینسانی پێسە داعشیوە گیریا و ڕووبەڕوو جینۊسایدی کریاوە، بە ڕەنجێوە گەورە وێش ڕزگار کەرد، بە کرڎەوە وێڕاوەبەریی دیموکراتیکش بەدەس ئارد و گەرەکشانە بەڕسمی بشناسیۊ. ئا داواکارییە ڕەواو گلێرگەو ئێزدییە لاو حکومەتی فاشیستی ئەرڎۊغانیوە تورکیانە قبووڵ مەکریۊ و بەرڎەوام ڕووبەڕووۍ هجوومی کریاوە. وەراوەروو ئانەیۊ مشۊم ڕای گردینی دیموکراتیکیی دنیۍ، ڕێکوزیایەکاو مافەکاو ئینسانی، ڕێکوزیا چالاکەکاو بوارە پەیوەندیدارەکا و دەوڵەتی مشۊم دەموودەس دژش مرڎاوە.

ئێمە چەمەڕوانێنمۍ، کە پەشتیوانی جە داواکارییەکاو وێڕاوەبەری و وێپاریزنای ئێزدییەکا کریۊ".

س.ز