سیاسەتمەداروو کوردی کەنعان ئایاس، کە ئەڵمانیانە گیریان، واتش گەلوو کوردی 'پەی شکۊو ئینسانیەتی ' زیاتەر جە ٢٠ هەزار گەشمەرڎاش جەنگوو داعشینە دێنۍ و واتش:" جە گرد لاێوە زیاتەر فاشیزموو ئەردۊغانی شکۊو ئینسانیەتی پاشێل کەرۊ، بەپاو دەستووری ئینە تاوانێوە گەورەن، ئشیا ئارۊ چێگە ئەردۊغان داڎگایی کرێی نەک من."

ئەڵمانیا کە پەیوەندیێوە قەوەتی ئابووری و سیاسییش چەنی دەوڵەتوو تورکی هەن، چی دماییاوە چوارچوەو  سیاسەتوو تاوانبارکەرڎەی کوردینە، سیاسەتمەداروو کوردی کەنعان ئایاسش گێرتەن. کەنعان ئایاس  ١٥و ئازارینە قوبرسنە سەروو داواو دەوڵەتوو ئەڵمانیای گیریا و دریا دەسوو ئەڵمانیایوە. کەنعان ئایاس جە زیندانوو دامتۊروو هامبۊرگینە گیریا. ئایاس مەیدانی سیاسیی کوردینە ئشناسیان، پێسە وتارڎەری بەشداریی فرەو پانێڵ و سیمینار و کۊنگرە و کۊنفرانساش کەرڎەن. بەتایبەتی کورڎساننە، تورکیا و ئەورووپانە و پەرسە سیاسیەکاو وەرکەوتوو دلێڕاسەیش شیۍ کەرڎێنیوە و ورێش سەنگنێنۍ.  

وەختۍ بواروو سیاسەتی دیموکراتیکینە تورکیانە هەرمانە کەرۊ، ساڵەو ٢٠٠٩ینە چوارچوەو دۊسیەی بنەڕەتیی کەجەکەینە تورکیا فرە سکاڵۍ یاسایێش دژش کەرڎێوە و جە ٣ی تشرینوو دووەمینە دەسش پەنە کەرد. داڎگاییکەرڎەکەی ئایاسی هەتا ٢١وو کانوونوو دووەمی بەرڎەواما و ١٦ ئەرەنیشتێن.

ئایاس 'وانەو کەرامەت'یشپەی داڎگای واتۊ.

کەنعان ئایاس جە ئەرەنیشتەی ئەوەڵوو داڎگاو ویلایەتوو هامبۊرگینە سەرنجەش پەی مەسەلۍ 'کەرامەت'ی کێشتە و خاڵەو 'مەبۊ دەس وزیۊ دلۍ کەرامەتوو ئینسانەکا' کە خاڵەو یوەموو مادەی دەستووریی ئەڵمانیایش یاد ئاردۊ، واتش، خاڵەو ئەوەڵوو ئی دەستوورەیە فرە تایبەتەنە، ئی خاڵۍ وەرپەرسبیەێوە گرنگ وزۊ گەرڎەنوو گلێرگەی و دەوڵەتوو ئەڵمانیای. نەپارێزنای کەرامەتوو ئینسانی جە دەستووروو تورکیاینە هەمان کارەکتەر نیشانەش مدۊ، کە سەد ساڵین بەسیستماتیک لاو دەوڵەتوو تورکیوە پاێل کریێنە، تەنانەت بییەی گەلوو کوردی تا ئی دماییەیچە بابەتوو قسەوباسی بییەن، گەلوو کوردی هەوڵێش دێنۍ چێروو فشارێوە قورسی و نکۊڵیینە وێش سەلەمنۊ".

ئایاس ئاماژەش پانەیە دان، کە گەلوو کوردی ڕووبەڕوو قڕکەرڎەی کولتووری و فیزیکی بییەنۊ و یادش وستۊ، کە کۊشیای کوردی پەی پارێزنای کەرامەتیین، کە لاو فرەو دەوڵەتاوە بەتایبەت ئەڵمانیایۊ پێسە 'تیرۊر'ی تەماشە کریۊ. کەنعان سەرەنجەش پەی کۊشیای گەلوو کوردی پەی پارێزنای کەرامەتوو ئینسانیەتی کێشتە و یادش ئاردۊ، کە گەلوو کوردی دژوو داعشی جەنگوو 'پارێزنای کەرامەتوو ئینسانیەتی'یش کەرد و واتش:"داعش فرەتەرین هجوومش کەرڎەن سەروو کەرامەتوو ئینسانی و ڕووبەڕوو تەرسێوە گەورۍ کەردۊ. ژەناو کوردی پەی  ژیواێوە بەکەرامەتی جەنگوو داعشیشا کەرد و بە دروشموو 'ژەنی، ژیوای، ئازاڎی' بە سەرکەوتەیشا یاونا. کورد پەی ڕزگارکەرڎەی ئینسانیەتی جە دەسوو بەڵاو داعشیوە زیاتەر جە ٢٠ هەزار گەشمەرڎا و دەیان هەزار بریندارێش دێنێ".

'کورد دژوو فاشیزمی کۊشیۊ، ئەردۊغان بکوشا'

ئایاس واتش دژوو داعشی هامپەیمانیێوە وەش کریان، زیاتەر جە 30 دەوڵەتا بەشدارییشا دلێنە کەرڎەن ، کە ویرێش ئارڎێوە، ئی هامپەیمانییە کوردی پێسە هێزێوە ئازاڎیی موینۊ.  

ئایاس واتش، کە ئەردۊغان چەکش پەی داعشی کیانان و سەرنجەش وستە سەروو هەڕەشەکاو ئەردۊغانی پەی  سەروو وەڵاتە ئەورووپییا و دماتەر کۊکوشییەکاو داعشی. ئایاس واتش، ئەگەر کورد داعشش دلێنە نەبەردۍ، داعش بە سەرکرڎایەتیی ئەردۊغانی دەس گێڕی ملوو گردوو وەرکەوتوو دلێڕاسەیرە و کەرێش بە بەحروو ونۍ. هەرپاسە باسوو تاوانە جەنگییەکاو ئەردۊغانیش کەرد و واتش:" هیزی کورد هێزوو ئازاڎیی بۍ وەختێوە وەرگێری وەنەو ئینسانیەتی کەرۍ وەراوەروو فاشیزموو داعشیوە، هێزوو کەرامەتی بۍ، پێوە چەنی هێزەکاو هامپەیمانا جەنگش کەرد، وەلۍ وەختۍ فاشیزموو ئەردۊغانی ئەرەگیرکارییش کەرد و کۊکوشییش کەرد، ئا وەخت کورد بی بە تیرۊریست؟ ئەردۊغان وەرەچەماو گردوو دنیێوە کۊکوشی و جەنگوو کۊکوشی کەرۊ. پێویسا گردما وەراوەروو فاشیزمی و کۊکوشیی ئەردۊغانیوە مردمۍ، ئانۍ کە ئارۊ هەڵوێستێوە مەرمانا سەوای دەسوو ئی فاشیزمیوە زەرەمەندۍ با، چێگە نەک من، ئشیا ئەردۊغان داڎگایی کریۍ."

کەنعان ئایاس واتش، کە ئەڵمانیا سەروو داواو دەوڵەتوو تورکی دژوو چالاکاو کوردی، چی دمایچۊ من دۊسیەش دەس پەنە کرەدەن و واتش، کە کورد دژوو فاشیزمی وەرگێری جە وێش کەرۊ و ئینە قەت مەبۊ بە 'تیرۊریزم'.